Чанг бэбе! Деки бэпе чанг быкэн толышон?

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 94 голосов)
Изменить размер шрифта Decrease font Enlarge font
image

 

 

 

Ҹанг бәбе! Деки бәпе ҹанг быкән толышон?

Free_Talyshistan

 

            Чымы гирамијә быјон ијән һовон! 

            Ијунә манги висты шәшәдә һәрби парәд бе Бокујәдә. Тыркон ид кардышоне ыштә орду са сорнә јубилеј. Чымы ком ни дечәвон иди, быдә ыштә коәдә быбун, һәлә быдә ыштә аспи бытожнын чәмә дәдә-бобо зәминонәдә! Чымы ко де чәмә толышоне! 

            Әмма һәлә толышон һәхәдә гәп ныжәнә, пиједәме бәшмә јод бијәм, чичоныш воте Илһам Әлијеви бә идәдә. Әј вотыше ки, “Хәрәбоғи ҹанги әнҹәх иминә мәрһәлә сә быә, әмә озод бәкардемон ыштә зәминон”. Гирәм ым һәтто пучә тарс-ларзән быбо, әмә ыштә пирпази есәтику бәпе быгәтәмон, һоһы быбәмон бә ҹанги!

            Бәвотешон ки, “Илһам Әлијев 15 соре һежо бәнә тујә кижә тикрор кардедә ым сыханон, әмма чич быбу? Кыве чәј озод кардә зәминон?” Илһам Әлијев дәнгул-дәнгули бәштә синә жәјдә ки, “бы чандә сорон дыләдә понзә кәрә зијод быән чәмә һәрби харҹон”. Әмма бәчәј чәш быбун анә пулон ки, һыријәше анә авжор ијән һәрби техникә, Озобижонәдә һәни бо гәм ној вырә мандәни, интаси әв ыштә ым техникә һәммәј нишо дојдә бә мәмләкәти мәрдоми, ҹо гыләј ғәләт карде зынедәни! Әве, һа быдә вәрсәғе гәп быжәны, һич ғәләт кардәкәс ни! 

            И тәрәфо розим дешмә вотәјон, чымынән шәкым ни ки, Илһам һич ғәләт кардәкәс ни, зәмин огордынијәкәс ни, ҹанг чәј һынә ни! Әмма ымијән бызнән ки, ым хыјнә чә хыјноно ни! Илһами ҹо чорәш мандәни, әв бы незә вәомәдә һукман бә ҹанг бино кардәнине! Чумчыко Хәрәбоғи сәбәсожәти дынјо тәрәфо зыне ымру-маштә мәсәләје! Әмерикә президент Доналд Трампи бы ружонәдә вотыше ки, “Крым – чы Русијә зәмине, чумчыко урусә зывонәдә гәп жәјдән әјо жијәкәсон”. Чәј зомо Кушнер бы незони Фәләстини проблеми һәлл карде әрәфәдәј. Истисно әбыни карде ки, ружон гыләјәдә Трамп бәјон бәкарде ки, “Хәрәбоғ чы ермәнијон зәмине, чумчыко ермәнијон жиједән әјо”. 

            Чымы гирамијон! Азән зынедәм ки, Илһам де ҹанги һичи әзыни карде! Әмма шымәнән ыми чок зынедәшон ки, әв һич ғәләтән нызно карде, мәхлоғи бә гуллә вә дој зынедә, әвони ғыр карде зынедә! Һич шәкым ни ки, бы сәфән жыго бәбе, әв бәштә пучә амбисијон хото һукман мәрдоми бә гуллә вә бәдо! Чымы шәхсән де ҹо хәлғон ком ни, быдә чәвон һар гыләјни боштә сәј чорә быкән, аз ыштә толышон ғәрәғәјди гәтәм, боәвон бәрк нороһатим! Парсе бәзнешон ки, бочи аз нороһатим? 

            Чымы азизон! Һодисон шемон нишо дојдә ки, бә Илһами чәмә хәлғи бә ҹанг барде һич еһтијоҹән нибәбе! Бочи? Чумчыко бәштә чәмә хәлғи лидер, навәжән вотә кали толышон ә кој бәвинден бо Илһам Әлијеви, мәһз әвон ебәгынен бә толышон нав, әвони һеле бәкарден бә Хәрәбоғи ҹанг! Һәлбәттә, чандә кәрә вотәме бәшмә ки, Илһам чанә ҹангән быко, и выжән зәмин сәј нибәзне, әмма одәмон ғыр бәкарде! Чымы нороһатәти әве ки, чә ғыр быәкәсон вејни чәмә толышон бәбен! 

            Боән, тикәјән бә нығыли бышәмон, бегули быкәмон ыштә нороһатәти сәбәби, каши бә дим бекәмон! Чумчыко есә вәзјәт жыгоје ки, ымружнә ружәдә әмә һәғиғәти нывотомон бәштә хәлғи, маштәнә ружи һәни ди бәбе, чәмә хәлғ дасто бәше, чәј зыбудә зоон ғыр бәбен бы ҹангәдә! 

            Пијо вотыме ки, манги висты шәшәдә һәрби парәд бе Бокујәдә. Илһами нымојишыш карде әјо ҹурбәҹурә авжорон ијән һәрби техникә, демијән тарс-ларзыш еһаште бә ермәнијон! Бәчәј чәш быбу чәј тарс-ларз, ермәни чәјку тарсәкәс ни, әвон вотедән ки, сыпә сәнәте дәрыве! Әксинә, ермәнијон бә чәшин ки, Илһам кејнә бино бәкарде ҹанги ки, әвон икәрәмәдә бон, быгәтын мандә зәминонән тосә Бәһрәмтәпә, чәјо ашиш-ашиши быжијын ыштә сәбәсожә довләтәдә, һәни һич тарс ныбән! Де минволи, Илһам чанә ҹангән быко, Хәрәбоғи огордыне нибәзне, Хәрәбоғи мәсәлә бәштә хәј һәлл нибәзне карде! Әмма, шымә һич шәкон ныбу ки, Илһам де ым ҹанги Толыши мәсәлә икәрәмәдә һәлл бәзне карде Озобижонәдә! 

            Бочи аз жыго фикир кардедәм? Чумчыко Илһам сәфәрбәр бәкарде һәмә навәжәнә толышә мердон, әвони ғыр бәдо карде бә ермәнијон, и поән куто ыштән бәжен, бәкыштен! Истисно әбыни карде ки, чандә кәс толыши һежо есә Озобижони орду тәбрик кардә толышон бәкыштен! Демијән Озобижонәдә толыши номи һәни гәтәкәс нибәбе! Пиједәоне дылисыхт бовә быкән быми? Бәвәдә фик быдән бә ыштәни бо Озобижони зәминон битовәти роәдә шәһид карде һозы быә вотә кали толышә лидерон кардә әмәлон, бәчәвон вотә сыханон, бәвәдә шымәнән һич шәкон нибәбе быми!  

            Бунән ым одәмон чанә ыштә ағылышон гин кардә ки, чәмә әвон дылисыхт тәбрик кардышоне Озобижони мәрдом де һәмон иди мыносибәти, гәвипури, дылипури овандышон орзу карде бәвон Озобижони зәминон битовәти бәрпо карде роәдә! 

            Һа, чымы азизә боон ијән һовон! Чымы нороһатәти әсос сәбәб һежо чәвон кардә ым тәбриконин! Сыхани рости, иминә нубәдә нороһат бедәм бо һәмон сәркәрдон ыштәни, дылым сутедә боәвон, бәболим омедә бәвон! Чумчыко әвон иминә Хәрәбоғи ҹангәдә анә зылләтышон кәшәј, анә толышон мардон мандин ҹанги мәјдонәдә, и тәрәфо ермәнијон жәшоне әвон, кутоән тыркон шәһид кардышоне әвон! Чәвон мыкофот ым бе ки, Озобижони һукмәти шодоше әвон бә зиндон, чәвон һар гыләјни камику да сор дустәғ бе әјо! Чә одәмон и поә һежо зиндонәдә бә Хыдо рәһмәт ше, и поә зиндоно перәхе бәпештә асбардыше, кали гылон сәғ мандән, әмма боәвонән тобә быәни! 

            Тобә быәбәј, әвон манги висты шәшәдә тәбрик нәкәјн Озобижони ә мырдолә орду ки, чәј һыҹубәтәдә әвон дустәғ быән зиндонәдә! Тикәјән де сојә зывони бывотом, сыпә даст кәшедә, әмма хынбә даст кәшедәни! Јәне, Озобижони һукмәт бә жәләвонон сә чанә мысибәтонән бијо, әвон һич ҹурә даст кәшедәнин чә мырдолә довләтику, һежо вотедән, боәмә ымән каме, әмәни ижән ја шәһид быкән, јаанки бә зиндон шодән, быдә әмә әјо быпыхәмон! Һәлә әј вотедәним ки, ым һәмон ә ордује ки, бә мәјдон бешә ружи маштәнәј һуррәҹыш карде бә Толышстон, хуни дыләдә тоснише чәмә Мығони Сәвети республикә! 

            Демијән жыго, мадәм ымружнә ружәдә ә хонәхон тәбрик кардедән Озобижони тыркон, чыјо жыго нәтиҹә бешедә ки, маштә-пашо тожә ҹанг бино быбо, бәвәдә әвон ижән һозын ки, бышун ҹанг быкән Озобижони роәдә! Чә Озобижони ки, әв дышмене бә толышон, әв мәһв кардедә чәмә хәлғи! Чә Озобижони ки, пиједәше мәһв быкә озодпәрвәрә ермәнијон, ә ермәнијон ки, ымружнә ружәдә чәмә хәлғи мыттәфиғин, ыштә дасто омә һар комәги кардедән ки, толышонән озод быбун тыркон зылмику, бахтәвәр-бахтәвәри быжијын ыштә сәбәсожә довләт Толышстонәдә! Ә ермәнијон ки, әвон пиједәшонни быжијын тыркон зылми жијәдә, пиједәшоне озод быжијын ыштә озодә мәмләкәтәдә, бәчәмә хәлғијән ыми орзу кардедән! 

            Чыјо жыго мәлум бедә ки, Озобижони орду јубилеј тәбрик кардә һәмон ә номердә толышон дышменин бәштә ыштә хәлғи, чумчыко әвон чәмә хәлғи дышмени һәвари кәшедән, һәтто чәвон мыкофот ижән зиндонән быбо! Жәләвонон һәхәдә вотедән ки, Хыдо одәми бәдбәхт кардеәдә, сыфтә чәј ағыли сәјдә чәј дасто! Чәмә хәлғи јолә шаир Әли Насирән, Хыдо рәһмәт быкә бәј, нывыштедәбе ки, “Һар милләт ыштә сәј гин кардә ружи, Ыштә марде һыкми дојдә мәвужи! 

            Чымы гирамијон! Чы тәбрикон ҹо номышон ни! Әвон ижән нишо дојдән ки, Хыдо сәше жәләвонә сәркәрдон ағыл! Чыми мәно ыме ки, ә одәмон ыштә мандә ағылышонән гин кардә, әве әвон ыштә хәлғи марде һыкми дојдән! 

            Фик быдән, бунән Бобок номәдә гыләј толышә балә де дыләдожи чичион нывыштедә жәләвонә толышон һәхәдә! Әј нывыштәше Фејсбукәдә: “Озобижони подшозодә бә ғәрор омә ки, шоу тәшкил быкә бо вәшјәни кәшә хәлғи сәј ғал карде проблемонку. Әмма һәммәјсә веј бәмә чочин омедә ки, чәмә кали толышә вәтәндустон тәбрик нывыштедән бы һодисә. Асудә вахтәдә “Стокһолми синдроми” һәхәдә баһандән, ым шымә һәхәдәј! 

            Чымы дустон, бә и дәғиғә тәсәввур быкән ки, насистә Алманијә гәтымыш кардә ССРИ, ид кардедә ыштә силоһинә ғыввон са сорнә јубилеј, дә гәтымкорон ҹанг кардә сәвети сәрбозонән тәбрик кардедән ијәнды де сорогарди әлоғодор.  Тәсәввурон карде? Әмма толышон дыләдә жәго “шәрәфинә” зоон вәс ғәдәрәдән, ыштәнән чә толышон дыләдә ки, әвон вәтәндуст вотедән бәштә, чә толышон ки, ым довләти һәватәше әвон, һәмән бә дастыш дәноә! Әмма дард бымәдәј ки, одәмон нәтиҹә бекардедәнин ыштә сәһвонку, һәтто бы парәдәдә и кәрән   бәчәвон јод дәнојдән ки, әнҹәх тыркон жије бәзнен бы довләтәдә, чумчыко әвон марш һандедән ки,Нә мутлујум түркүм дејәнә”! Ыштән нәтиҹә бекән боштә, әмә та ки тәмиз ныкомон ыштә рестон хәјонәткоронку, һич гылә толышә довләткорәти һәхәдә сыханән әзыни бе! Ешғ быбу бә Толышстони! Быжијы Толышстон! 

            Ым чәмә билә Бобоки нывыштәше. Бәчәј сыханон иглә әј зијод быкәм ки, “Стокһолми синдром” психоложи нохәшије, әв нәзәрәдә гәтедә тәҹовузкори ијән чәј ғырбони арәдә бә әмәл омә вәјнә симпатијә. Жәләвонон ғәбул кардедән тәҹовузкори идеалон, һозы бедән ки, ыштәни фидо быкән чәвон роәдә, һәмән бы вахти әв рози бедә ки, бәштә мәнофејон әкс бышу, пиједәшни ки, озод быбу.  

            Әве аз ымруж парседәм чәмә толышонку: Хәрәбоғәдә ҹанг быбо, толышон деки ҹанг бәкарден – де чәмә хәлғи дустә Арсахи ермәнијон, ја де чәмә хәлғи дышменә тыркон? Ым жыго гыләј ҹидди парсе ки, әмә бәпе ымружнә ружәдә быдәмон чәј ҹәвоби, чумчыко пешы ди бәбе, веј ди бәбе! Ымружнә ружәдә чәмә милли-озоди ҹанги ән јолә парс ыме, әве әмә ымружнә ружәдә бәпе ҹәвоб быдәмон бәј! Бочи? 

            Веј мымкуне ки, һәм Илһам Әлијеви, һәмән Озобижони довләти охонә ҹанг бәзне бе ым вәомә ҹанг! Ҹанг быбо, бәвәдә һич шәкон ныбу ки, выртивыло бәбе ә мырдолә довләт! 

            Бы вырәдә бәзнешон воте ки, охо ым веј чокә ко бәбе, Озобижон выло бәбе, демијән чәмә хәлғ озод бәбе, бочи әмә бәпе нышәмон бы ҹанг? 

            Чымы гирамијон! Аз ијо бә тырки пыә дымжон дојдәним ки! Охо аз шымәни бә даст дәнојдәним, ду вотедәним бәшмә! Аз ыштән вотедәм ки, ҹанг быбо, бызынән, Озобижони довләти охој рәсә, чәј Фатиһәшон доә! Интаси ијо гыләј мәсәлә бә нәзәр быстәнән ки, чымы пијәј әве ки, иминәни, чәмә толышон ғыр ныбун бы мырдолә ҹангәдә, дыминәни, чәмә толышон ҹанг ныкән дечәмә дустә ермәнијә хәлғи!    Демијән аз тәләб кардедәним ки, шымә ҹанг быкән ермәни тәрәфәдә, чәвон һич еһтијоҹышонән ни быми! Ыми ыштән бәзнешон, быпијеоне, бәкардешон, нибәпијеоне, нибәкардешон! Чымы вотәј ыме ки, шымә тыркон тәрәфәдә ҹанг мәкән, чәвон роәдә ҹанг мәкән! Чумчыко бә ҹангәдә шәһид быә зоон ајәндәдә һәлә лозим бәбен бәчәмә хәлғи, әвон һәјфин, бочи бәпе ғыр быбун чәмә дышменә тыркон роәдә? Чәјоән, ҹанги нәтиҹәдә Озобижони довләт выло бәбе, әмма ермәнијон бәжијен ыштә сәрзәминәдә, әвон ижән чәмә һамсијә бәбен! Де һамсијә дуст бе лозиме, дышмен бе лозим ни! Хыдо вотедә ки, боштә һамсијә ныпијә хәлғи бахтәвәр нибәкардем! Чыјо жыго мәлум бедә ки, чәмә толышон ҹанг быкон бә ермәнијон вәјнә, демијән боштә дышмен ғәзәнҹ бәкарден! Бәмә ым лозиме? Һәлбәттә, не! Бәмә лозиме ки, һәм Арсахи, һәм Ермәнистони, һәмән дынјо һәмә ермәнијон дуст быбун бәмә, даст быгәтын бәмә ыштә сәбәсожә довләти бә дәрһәл роснејәдә! Әмә бәпе жыго быкәмон ки, дејәмә дышмен ныбун чәмә һамсијә хәлғон ијән довләтон һич гыләјни – нә Ирон ијән ироныжон, нә Русијә ијән русијәвыжон, нә Арсах ијән чәј шәһрвандон, нә Ермәнистон ијән чәврәј ермәнијон! Хәлғ рушт бәкарде әмнијәтәдә, сулһәдә, дустәтијәдә, дышменәтијәдә рушт әкәни! Шымә һич шәкон ныбу ки, әмә руштымон пиједә боштә хәлғи, пиједәмоне ки, әв ружбәруж овҹ быкә ыштә сәбәсожә довләтәдә! Чымы пијәј һәмән әве ки, шымә ҹәвоб дојәдә бәчымы доә парси, чок-чоки но-пегәт быкән чымы вотә шәртон һәммәј, чәјо ағылмандә ғәрор ғәбул быкән һәм боштә ыштәни, һәмән бочәмә ҹәми хәлғи! 

            Ымружнә ружәдә чәмә хәлғи әнҹәх иглә сәростә ҹәвобыш бәзне бе бәчымы ноә парси: Әмә тыркон тәрәфәдә, тыркон роәдә, Озобижони роәдә, чәј бәдномә зәминон битовәти роәдә ҹанг әзынимон карде де ермәнијон! Ыми быкомон, бызнән ки, чәш винде-винде ғәб бәкандемон боштә ыштәни. Чумчыко ермәнијон бә ҹангәдә беәјән ғалиб бомен, әмма чәмә хәлғ арәдә сијодим бәбе ыштә һәмә һамсијон навәдә! Чумчыко чәмә һамсијә хәлғон – ироныжон ијән урусон һич гыләјни даст әгәтни бә тыркон, комәг әкәни бәвон, әвон һәммәј ыштә комәги бәкарден бә Арсахи ијән Ермәнистони, чумчыко әвон һәхи ҹанги кардедән, тыркон есә бој, ноһәхә ҹанг кардедән! Жәго гыләј шәроитәдә гирәм әмә бәнә сипијә кумәјжә егыномон бә мәјдон, дәнгул-дәнгули бышомон тыркон думо, Озобижони думо, ә хәлғон һәммәј ту бәкарден бәмә, бәвотен ки, бә мәһви лојиғе ым толышә хәлғ! 

            Һәлә әј вотедәним ки, дынјо ҹо хәлғон ијән довләтонән, сывој Тыркијә, ермәнијон һәвари бәкәшен бә ҹангәдә! Жәгобу, бәштә чәши вә бијән ки, дынјо хәлғон чәшәдә әмә ки бәбемон, чич бәбемон? Дынјо һәммәј зәһләш бәше чәмә хәлғику, һич незән әвони бәмә! 

            Әве аз ижән парседәм шымәку: шымә пијәј чиче, әве ки, чәмә толышә хәлғ тәнһо быманды бәнә чуки, һәмә хәлғон зәһләшон бышу чәјку, демијән сијоруж быбу әв, ја пиједәоне ки, озод быбу толышә хәлғ, быжијы ыштә сәбәсожә довләтәдә, ружбәруж овҹ быкә? 

            Һәлбәттә, чымы шәкым ни ки, толышон һәммәј пијәј ыме ки, озод ијән бахтәвәр быбу чәмә хәлғ! Мадәм ки жыгоје, бәвәдә чымы бәшмә мәслоһат: Гуш мәдән бә камсәрә одәмон ки, әвон шымәни бә ҹанг сәдо кардедән тыркон роәдә, Озобижони роәдә! Әвон демијән чәмә хәлғи марде һыкми дојдән! Рози мәбән ки, чәмә толышон ғыр быбун чәвон роәдә! Ҹанг мәкән тыркон ијән Озобижони роәдә!  Ҹанг быкән ыштә озоди ијән сәбәсожәти роәдә! Чыми мәноән ыме ки, бы незә вәомәдә Озобижон ҹанг быко де Хәрәбоғи, бәвәдә толышон һәммәјәво имтино быкән чә ҹангику, нышун бә ҹанг! Кијән мәҹбури ордујәдә һәрби хыдмәтәдә быбо, быдә әвон һәммәј оваштын бә Арсахи тәрәф, демијән ыштәни перохнын лабуд мардеку! 

            Мәхсуси овардедәм бәчәмә ҹывонон: Һовә бәшмә ғыбон, һәјфишон шымә, чымы боон, бә гуллә вә мәдән ыштәни тыркон ијән Озобижони роәдә! Шымә лозим бәбешон бәчәмә әзобкәшә хәлғи! Ыштә умри һәср быкән бәштә толышә хәлғи, ҹанг быкән чәј озоди роәдә! Жыго быкошон, озодә ијән сәбәсожә Толышстонәдә жимон карде шымә ғысмәт бәбе, шымә мыкофот бәбе! 

            Сәломәт бымандән! Хыдо ыштән бырәсы бәчәмә хәлғи имдоди!

                        Быжијы чәмә толышә хәлғ! 

                                    Быжијы сәбәсожә Толышстон! 

                                               Быжијы Толышстони Милли телевизијә!   

ВИДЕО: htТМВ: Ҹанг бәбе! Деки бәпе ҹанг быкән толышон? 

 

ИСТОЧНИК: Free_Talyshistan: Ҹанг бәбе! Деки бәпе ҹанг быкән толышон?

 

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|