КИ ПИЈЕЈДЭШБЕ БЫКЫШТЫ ЭЛИ НАСИРИ?

Разделы

Архив

Пн Вт Ср Чт Пт Сб Вс
123456
78910111213
14151617181920
21222324252627
28293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 25 голосов)
Изменить размер шрифта Decrease font Enlarge font
image

 
 

КИ ПИЈЕЈДӘШБЕ БЫКЫШТЫ ӘЛИ НАСИРИ?

Ымруж Мир Әли Насири соре!

Фәхрәддин Әбосзодә

 

            Сыхани рости, һич чәш кардејдәныбим ки, Әли Насири боме бә Москвә. Ружи ныштәбим кәдә, занг омәј бәчымы телефон. Әлибе! Һол-әһвол хәбә сәј бәпештә вотыше:

            -Деғыж, чәмә һәмрон дәвәт кардејдән мыни бә Москвә ки, бом нишо быдәм ыштәни бә һәкими...

            -Дәвәт кардејдән, лап чок, Хыдошон комәг быбу! Хәш бомеш!

            -Зә, ышты тоно бомем!

            -Лап чок бәкардеш, чәшонсәм вырә һесте!

            -Гыләјән мәсәлә вотем пијејдә бәты, һич зынејдәним чокнә бывотым? Тарсејдәм ки, бәштә хош ныво!

            -Ым чы гәпе, Шаир, бомы хоше Ышты һар вотә сыхан, бывот!

            -Чәмә гыләј ҹо боән пијејдәше бо демы, чич вотејдәш?

            -Чанд кәс бо деты, фәрғыш ни, деты омәкәс чымы гирамијә меһмоне!

            -Быдә бывотым кије ә одәм, чәјо бывот ыштә фикири!

            -Бывот, Шаир!

            -Чәмә фылон боә омејдә демы...

            -Вотымехо, чымы хуни-муни дышменән быбо, деты омејдәбо, хәш омејдә! Ками кардејдә ым сыхан Боты?

            -Әһсән! Һежо жәгоән зынејдәбим тыни! Фылон ружи фылон саатәдә Москвәдә бәбем!

            -Иншаллаһ! Нороһат мәби, һәмрон бебәшен бәшты нав!

            Ды-се руж дәварде бәпештә, ижән зангыш карде. Воте, чәмә ә боә һәни омәнин ныбе, әве ҹојли омејдәм!

            Жыгонә, Әли омәј бә Москвә. Хыдошон комәг быбу, Исмаил де Али бешин бәчәј нав, вардышоне Әв бәчәмә кә.

            Чәмә быјон гыләјни асбардәшбе әв бә гыләј ланконыжә һәкими. Тәғрибән 20 руж чәсони Исмаил омејдәбе де Али, бардејдәбин Әј бә нохәшхонә, шангоән вардејдәбин. Шаир ыштә анализон дојдәбе.

            Ружон ружони Исмаили вотыше ки, “зә, Миәллим, гыләј чочинә мәсәлә һесте, пијејдәме бывотым бәты!

            -Бывот, Биләма!

            -Ым чы чочинә којехо, һаруж маштә-маштә әмә омеәдә бә нохәшхонә, Озобижони Конгреси чандә гылә узвон соәдә бејдән! Аз ыштәнән һич зынејдәним ки, чәвон ки мардә әјо?

            Ланконыжә һәкими гәтегырән чочин омејдәбе бәмә. Чумчыко әј вотәшбе ки, “мәзунијәтәдәј, Тыркијәдәј”. Асбардәшбе ым ко бәштә гыләј ҹывонә ассисенти, әв мышғол бејдәбе де Әли! Интаси пешы зынәмоне ки, һәмон һәким шәни бә Тыркијә, ныштә ыштә боғи кәдә, чәјо “идорә кардејдә” просеси...

            Сыхани рости, хәјли нороһат бимон, но-пегәтымон карде ыштә арәдә, бә ғәрор омәјмон ки, ыштә еһтијоти быгәтәмон!

            Исмаил де Али һаруж тосә шәви и нимә ныштејдәбин чәмә кәдә (ҹо толышонән һаруж омејдәбин). Ружи шәви и аләмәдә бешин чәмә кәо ки, бышун бәштә кә. Әнәһој дәныварде, Исмаили зангыш карде бәмы ки, “чәсбони еши бә со!” Ешим! Мәлум бе ки, Али чәмә блоки пенҹәо едјәсә бә со, виндәше әјо гыләј шәкбәлујә одәм. Әве навәдә шә, әмма бә би бешеәдә, ә хонәхо виндәше әв, вите-вите шә, ныштә че бина бә сәдә мандә “09-и”, рәјрә ромәшоне, бешән арәо!

            Гырд нороһат бимон! Әмма чәмә дасто һәни чич әзни оме?

            Ружијән печоштә шимон бә Москвә гыләј јолә выжор. Чәмә толышә боон хаһиш кардышоне чымыку ки, “Шаири бијә бә выжор, быдә әмә тикәј Чәј хыдмәтәдә бымандәмон!” Ыштән омәјн, де машини бардышоне әмә. Хәјли ныштимон, дарды-дылымон карде. Пешы дештә машини вардышоне әмә бә кә. Бә кәј рәсе тикәвонәј мандәбе, Исмаили зангыш карде бәмы:

            -Конҹошон?

            -Рәсејдәмон бә кәј!

            -Зә, һежо ныштәмон кәдә, вотејдәм, пегәтәмон Шаири, бошамон гыләј вырәдә тәмизә һәвоәдә быныштәмон.

            -Чок!

            Исмаил омәј. Дыглә машин думојәнды егынимон, шимон бә Кузминкә парк, ныштимон әјо чәмә ҹо гыләј толышә боә “Товыстони кафеәдә”. Чәмә ә гылә боә рәјрә ше, әмә хәјли ныштимон. Исмаили ыштә машиныш огәтәбе рој бә тәрәфәдә, гыләј дукони навәдә.

            Шанговәсәј чокәс – Шаир, Исмаил, мы ијән Али – ныштимон бә машин. Тожә һежо дәро гынијәбимон, вотыме:

            -Зә, Исмаил, бензинә бу омејдә машино!

            -Ыштә дастоным моләј де канә, шодоме бә шәләхонә, мәвужи, чәј бује!

            -Зә, кәхәлизи балә, ышты машин “Жигули” ни ки, бензини бу шәләхонәо бо бә салон! Ым гырд ҹо бује!

            Исмаили гушыш ныдој бәчымы сыхани. Идомәмон карде бәштә ро. Беовандәтику әмә һәммәј пәпруз кәшәкәсимон! Пијәме гылә пәпруз бывошным, пешы вотем ки, “боән пәпруз мәкәшәмон, машин тәнбәку буј бәдо!” Жәгоән омәјмон бә кә.

            Исмаили ноше әмә соәдә, ыштән огарде ше.

            Маштәнәј чәсәј занг омәј бәчымы телефон. Исмаил мәһоли выло кардејдәбе! “Зә, чич быә ижән?”

            -Маштә-маштә омәјм ки, быныштым бә машин, бәнем машини жијәдә гыләј бензинә гол бә әмәл омә! Едјәсәјм, бәнем бензин нәсосышон бырнијә, бензин емә бә зәмин. Ты зинә воте бәмы, гушәләхәм карде, фикым ныдој! Хыдо бәчәмә димиш дијә кардә!

            Исмаили мытәхәссисоныш сәдо карде, машинышон барде бә лабораторијә, вотышоне ки, “гыләј зынә одәми де чәми бырнијәше бензиннәсос ки, бензин гәдә-гәдә ему. Хыдо бәшмә димиш дијә кардә, машин тыпәни! Гирәм пәпрузон вошнијәбәј, машин әтыпи!

            Бә ком вырә бәрәсе, жыгонә мәлум бе ки, пијәшоне бытыпнын әмәни һәммәј!  Исмаил ше бә шикат бә “органон”. Әјо жыгошон вотәбе бәј: -“Ты чәмә ҹонику чичы пијејдә, Исмаил? Әли Насир омеәдә, Озобижони хысуси хыдмәти органон ды кәс һәмко омә деәј иҹо! Тынән вардә Шаир бә Ф. Әбосзодә кә! Һәни чичы пијејдә?!

            Әмма деми сә ныбин Әли сәргозәштон! Чә ланконыжә һәкими ассисенти дыглә лынгыш даһаштәбе бә иглә шым, дод-әмон кардејдәбе ки, “әмәлијот кардәнинимон Шаири!” Вотыме бә Әли ки, аз һич ҹурә рози әбыним ки, чәху быжәнын бәты! Чумчыко чы кој мәсулијәт веј гоне! Анализон ҹәвоби быстәнәмон, ты беши быши бәштә кә. Шык бә Хыдо зооны һәни јолә мердин, мәслоһат быкә дештә һәмро, дештә зоон, әвон чич бывотон, жәгоән бәкардеш!” Һежо һәмон ружи зангыш карде бәмә Әли рукә зоә. Әвән нороһатбе. Бәјымән воте ки, “Чымы балә, Әли де соронән бымандо чымы кәдә, һич сыханым ни, бомы јолә фәхре! Шык бә Хыдо, чәмә толышон һәммәј чок-чоки мандејдән чәј хыдмәтәдә! Әмма аз рози әбыним ки, Әј әмәлијот быкән ијо! Боме иншаллаһ бә кә, әјо мәслоһат бәкардешон!

            Охонә ружи Исмаил де Али пегәтышоне ижән Әли, шин бә нохәшхонә ки, быстәнын анализон ҹәвоби! Шанго һәрәсон омәјн бә кә. Вотышоне ки, һәмон ә ассисенти пијејдәшныбе быдә бәмә анализон ҹәвоби, вотејдәбе ки, һукман әмәлијот кардәнинимон Әј!” Ыми воте бәпештә, витәбе нијо быәбе! Али де зубәзу пәјдош кардәбе әв, сәшбе чәјку анализон ҹәвоб!

            Маштәнә ружи Әлимон дәро карде бә Боку. Жыгонә, мәлум бе ки, Озобижони һукмәти нијәт ымебән ки, Әли быдә ијо кыште! Пешы ымымонән дырыст карде ки, кали толышонән дастышон быә бы коәдә!

            Әнәһој дәныварде, әмә выломон карде Озобижони Конгрес! Мәлум бе ки, Озобижони һукмәти пегордынијәшебән һәмон ә Онкологијә мәркәз бәштә “ғәссобхонә”, чандә кәсышон де һәкимон дасти кыштәшонебән әјо! Һәмон ә ланконыжә һәким пешы веј дастпочә бе, чандә одәмоныш сәғанде Исмаили сәпе ки, де тәһәри бышышты ыштә гыно! Әмма бә незымон ваныдој ә мәлун! Чәвон “вағә лонәмон” выртивыло карде!

            Хыдо ләнәт быкә бә мәрдимәзари! Хыдо рәһмәт быкә Мир Әли Насири!

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|