ШИНЭ БО !

 

 

 

 

ШИНӘ БО!

Ымруж Мир Әли Насири соре

Деғыж

 

И сор бәнав маги бохчә то карде,

Ыштә дәдә-бобон тоно ро карде,

Де толышон әдовәты чо карде?

Толышы чо сәғыр һаште, Шинә Бо?

Маги шәрбәт чы рә чаште, Шинә Бо?!

 

Бы дынјо дим шаир омә, шаир шә,

Чандә шаир бәвиндемон жыгошә,

Кам шаири бәнә бәты ном бешә!

Толыш бәшты һеле әште, Шинә Бо,

Беты толыш гырд бепеште, Шинә Бо!

 

Бәнә бәты шаир һәни әбыни,

Быбахшын Толыши шаирон мыни,

Тәјли мандә ышты ныштә тахт һәни!

Бә тахтәдә ки бәныште, Шинә бо?

Ки “Гиләво” бәнывыште, Шинә Бо?!

 

Де јоли јол, де әғыли әғылбиш,

Бо дышмени зәһә, дусти ноғулбиш,

Тәргы карде әмә, шинә нәғыл биш!

Чан дыләдә уму каште, Шинә Бо,

Чандә дылон тарсы шыште, Шинә Бо!

 

Деғыжим аз, деты нәфәс сәјдәбим,

Бәшты һәво чамедәбим, нәвдәбим,

Бә дышменон дыли аз доғ жәјдәбим!

Бәчымы дыл теғ еныште, Шинә Бо,

Чымы пешты ты арыште, Шинә Бо!

 

Бә јаһубиш, “милләт тыни мәсдәни”,

Есә-есә мәсејдәбе хәлғ тыни,

Фидо карде ҹоны боштә Вәтәни!

Толыш есә гыләј мыште, Шинә Бо,

Хәлғи дылы бочи быште, Шинә Бо?!

 

Ышты шерон илһам дојдән бә хәлғи,

Бә озоди ванг кардедән әмәни,

Толыш тыни һич вахт әјво әкәни!

Бә дышмени вај бәныште, Шинә Бо,

Ышты Толыш сәпо бәште, Шинә Бо!