МЭРЭЗ

МӘРӘЗ

Бәһмән Салеһ

            Овшумә шәвбе. Мерзо Нәсир евоәбе бә со. Зәмин-осмон овсинәдәбе.  Овшуми занг еғандә, астовон чәш жәјдән, һар тон дәшә бә нығә рушнә.

            Икәрәдә обәј че дәрвозә бә. Һамсијә Һәпәнғоли дәше бә со. Ше дәше бә әдәбхонә. Дәшеш де беше и бе. Овтовә чәј дастәдә огарде бә пешо, беше ше.

            Мерзо Нәсири ве тәҹуб кардыше, ошандыше ыштә сә. Тикәј бәдигә дәше бәкә.

            Чәсони беше бә би бо дастнымож гәте. Омәј дәше бә әдәбхонә, виндыше, ыштә вырәдәј һәмонә овтовә. Ижән тәҹуб кардыше.

            Мәҹлисо бә кә омеәдә Мерзо Нәсири хәбә сәше Һәпәнғолику:

            -Сәм беныше чы овтовә әһволотику.

            Һәпәнғоли сы дәражијәј, вотыше:

            -Мерзо, әмоне, омәкә чымы сыри. Зынејдәш ки, тобә кардәме, нымож вотејдәм. Интаси чији ныдыздом, һыте зынејдәним. Бә шәв нышом гыләј холл-пожә, ја һамсијәку чији пеныгәтом бә со нывом, һан бардејдәни мыни. Һытејдәм, әштејдәм, ижән һәмонә ҹонәвә бардејдәм нојдәм бәчәј вырә. Мерзо, ымән гыләј мәрәзе чымы ҹонәдә. Мыни быбахш!