КОММУНИЗМИ СОЭНЭВО ИЈЭН ЧЭМЭ ТЕЛЕВИЗИЈЭ

КОММУНИЗМИ СОӘНӘВО ИЈӘН ЧӘМӘ ТЕЛЕВИЗИЈӘ

ТМВ_03_10_2016_

            Чымы азизә быјон ијән һовон!

            Чымы ымружнә гәп ғејри-ади бәбе бошмә. Аз есә овардедәм иглә бәшмә не, һәмән бә Озорбојҹони хысуси хыдмәт органон вәдә дум чадоәкәсон, бә одәмохшәрә шәјтонон ки, шәв-руж ыштә һанәдә виндедән ки, кејнә бә зәвол боме Толышстони Милли Телевизијә!   Әвон ранго бә ранг дәшедән, тожә-тожә кәләкон пәјдо кардедән, пусты-лу кардедән ыштәни ки, чокнә бә кәзәли бәд бијән ым телевизијә, пәл быжәнын бәчәмә кој!

            Чымы азизон! Шымә бызношон ки, чиче чәвон ән јолә ованд, ыштәнән бәсырешон! Охонә һафтәдә әвон де һәзо чәми әј зынедән карде ки, ЈУТУБәдә чәмә бәрномон ашмарди кам кардедән! Ымијән бывотым ки, ејни вахтәдә Озорбојҹони шәјтони идорон һыҹум тәшкил кардедән бәчәмә сајт “Толышпресс. орг”и. Бы ружонәдә ижән арыштәшонбе сајт, мытәхәссисон де зубәзу бәрпошон карде сајти ко! Ә шәјтонон жыго зынедән ки, демијән јолә зәрбә бәзнен жәј бәчәмә телевизијә ијән бәчәмә Милли һәрәкоти ныфузи! Бәчәвон һич ағылән омедәни ки, иминәни, есә нә әмә ыштән, нәәнки чәмә тәмшокорон һәни Јутубәдә бәчәмә бәрномон дијә кардәкәсон һич гыләјни дијән кардедәнин бә дијә кардәкәсон ашмарди! Охо чәмә хәлғ бы бәрномон иглә Јутубәдә не, һәмән ҹо сосиал шәбәконәдә дијә кардедә! Һаканә бы бәрномон дијә кардәкәсон рәседән бә са һәзо ијән һәнијән сапе! Һәлә әј вотедәним ки, ым бәрномон дастбәдаст нәведән, һар вырәдә толышон де интизори чәш кардедән әмәни! Һәм Толышстони ыштәнәдә, һәмән диаспорәдә толышон вејни есә мынтәзәм дијә кардедән бәчәмә бәрномон, һәмән певыло кардедән әвони!

            Кали кәсон вотедән ки, һичмәсә, Јутубәдә мымкун ни жыго гыләј ко, јәне дијә кардәкәсон ашмарди кам карде! Әвон иддо кардедән ки, гуја хакерон һыҹум зынедәнин карде бә Јутуби! Әмма әмә чок зынедәмон ки, инсони сохтә һар чиј де инсони дастијән мәһв бедә карде. Мәһвән ныбо карде, һич ныбо зәб ғандедән бә һар гылә техникә!

            Һар чокнә бедә быбу, чәмә дустон шо, дышменонән пәришон быбун вотәјнә, бәшмә бывотым ки, охонә ды мангәдә бәчәмә бәрномон дијә кардәкәсон ды милјон бән! Шәк ни ки, ым чәмә Милли телевизијә веј јолә ованде! Һәмән ым әј нишо дојдә ки, чәмә хәлғи вејни һәни һәмрәғе бәчәмә телевизијә, ыштәни ҹо тәсәввур зынедәни карде чәмә бәрномонку! Ым нишо дојдә ки, чәмә хәлғи вејни ғәбул кардедә чәмә идејон, чәмә сәбәсожә Толышстон сохте идејә! Мәһз ымән һежо бә тарс дәғандедә чәмә дышменон, вәлвәлә дәғандедә бәчәвон дылон!

            Чымы азизон! Хыдоку  нијони ни, бәндәку чы нијони? Чәмә охонә ды-сеглә бәрномә мәруз мандә бә Озорбојҹони шәјтони идорон мәғсәдиујғунә, планинә һыҹумон. Интаси ым ко дыроз дәнибәкәше. Быдә ә мәлунон жыго бызнын ки, дештә де шәјтонә әмәлон зијон бәзнен жәј бәчәмә бәрномон кејфијәти. Әмә чок зынедәмон ки, Озорбојҹони һәмон идорон зыне-зыне веј кардедән бә Ирони әкс бәрномон доә Јутуби “ҜүнАз” телевизијә ијән “Јолә Озорбојҹон” номәдә сәрсәмә идејә тәблиғ кардә ҹурбәҹурә ахмәх-ахмәхә пантыркә видео-чәхон дијә кардәкәсон ашмарди. Демијән әвон бә дастпочән ки, тәсир быкән бә Иронәдә жијә тыркон! Һәғиғәтән бә видео-чәхон дијә кардәкәсон веј камин. Чумчыко Иронәдә жијә тыркон ыштән зәһләшон шедә Озорбојҹони тырконку, әвон чок зынедән ыштә довләти ғәдри! Реаләти ыме ки, Озорбојҹони ыштәнәдә кали пантыркон дијә кардедән бәвон. Мандә ҹәмат ыштәнән дијә кардедәни, чумчыко Озорбојҹони тыркон есә вәшику нимәјжони әштедән, бәчәвон нәзән ни ки, Ирони тыркон чокнә жиједән!   Һәмән Озорбојҹони тыркон һәм бә мыолиҹә шедән бә Ирон, һәмән веј одәмон ыштә выжорәкој кардедән Иронәдә! Әве әвон чок зынедән ки, Ирони тырконән умуж быкон бә Озорбојҹони, ә фәғыронән вәши бәмарден ијо! Әве бә Ирони әкс быә жәго видео-чәхон и мангәдә һафто-һафто пенҹ кәсисә веј одәм дијә кардедәни! Демијән чә шәјтони идорон ноә мојә бә һич бешедә! Әве әвон суни сурәтәдә веј кардедән бәвон дијә кардәкәсон ашмарди ки, бывотын, әвонән де гыләј кој мышғолин! И кәрән виндедәш ки, ибердәмәдә бә чәхон дијә кардәкәсон ашмардышон кардә дыса һәзо-сеса һәзо кәс! Аз ыштән чандә кәрә дығғәтым доә, виндәме ки, шанго бә фылон чәхи висты пенҹ кәси дијәш кардәбе, маштәво ә рәғәмышон кардә дыса пенҹо һәзо!

            Мәлум мәсәләје ки, ым суни гыләј које, һәғиғәт ни! Әмма Озорбојҹони шәјтони идорон даст кәше фикәдә нин ыштә мырдолә әмәлонку!

            Умумән фик быдомон, ым песохтә довләт бә дынјо омә ружику һежо һәнәкыш кардә де рәғәмон! Мәсәлән, әмә чок зынедәмон ки, Иронәдә ыштә кәонәдә тырки, мәхлоғи дыләдә фарси гәп жәкәсон, бәштә тырк не, ироныж вотәкәсон ашмард ҹәми пенҹ милјонисә веј ни! Әмма Озорбојҹони һукмәт бәвон һәммәј ном нојдә “озорбојҹоныж”, һәмән иддо кардедә ки, һичмәсә әвон әјо чыл милјонин! Шымә чок зынедәшон ки, ым ади гыләј вәрсәғеје, вәзәријәте! Јаанки ҹо мисал бијәмон. Ымијән чок зынедәшон ки, Иронәдә кали тыркон Озорбојҹони тәблиғоти тәсири жијәдә жыго зынедән ки, Бобок тырк бә! Әве әвон һа сор петатедән бә Кәлһејбәри тоно быә Бәззи ғәлә. Интаси ијо омәкәсон вист-си кәси шыр-шындырисә веј бедәни! Әмма Озорбојҹони һукмәт һасор нывыштедә ки, мәвотбән, и милјон тырк петатә бә Бәззи ғәлә! Ым бәдбәхтон хошышон омедә ыштәни бә даст дәнојку! Әвон ыштән нывыштедән, ыштән һандедән, ыштәнән шојво кардедән! Бә нәзәр быстәнән ки, ә чијон нывыштәкәсон һәммәј хәјли пул сәјдән һукмәтику, әве әвон милләти һајәдә нин, ыштә лузи һајәдән!  Ым чы тыркон кардә ко!

            Чымы хосә хәлғ! Фик быдән ки, Озорбојҹони һукмәт ком ко бәчәј хәјебо, әјо веј кардедә рәғәмон, ком ко бәчәвон хәј ныбо, лап кам нишо дојдән рәғәмон! Һежо пегәтәмон Озорбојҹонәдә жијә толышон ашмарди! Дынјо һар вырәдә есә зынедән ки, ды милјон ним толыш жиједә Озорбојҹонәдә! Әмма әвон чан кәс толыши нишо дојдән? Ҹәми сады донзә һәзо! 

            Әве, әвон виндедәдә ки, һәзо-һәзо одәмон дијә кардедән бә Толышстони Милли телевизијә бәрномон, чәвон дыл тәкедә! Һәмән бә нәзәр быстәнән ки, охонә вахтонәдә иглә толышон не, чандә һәзо тырконән дијә кардедән бәчәмә тырки бәрномон! Ым һукмәти лап ҹындо кардедә, әве мојә нојдә ки, бәчәмә бәрномон дијә кардәкәсон ашмарди кам быкә ки, быдә бывотын, дијә кардәкәс ни бәвон!

            Әмма шымә чок зынедәшон әмәни! Чымы азизгирамијон, һәлә да сор чыми бәнав һәмон ә һукмәт бәнә тујәкижә тикрор кардедәбе ки, “да-понзә кәс толыш егынијә бә мәјдон, чич бәзнен әвон карде?” Әмма чич бе чыми охој? Есә әвон бәштә сә жәјдән ки, һәзо-һәзо толышон һозын бә озоди ҹанги! Де һич ҹо воситә һукмәт гәте зынедәни толышон нави! Әве чәвон ҹо ро мандедәни, дәмандедән бо шәјтонәти карде!

            Интаси чәвон һич гылә кәләк әзыни чәмә Телевизијә нави гәте, чәмә Милли һәрәкоти нави гәте! Әвон һич ҹурә мане әзынин бе бәчәмә телевизијә ијән һәрәкоти ғалибијәтинә шемони! Ыми чок-чоки ыштә јодәдә огәтән, чәмә хосә толышон!

            Һа чымы азизон! Бы вырәдә бәчымы јод омедә Карл Маркси ијән Фридрих Енгелси “Коммунистә партијә манифесто” иминә ҹумлә. Аз һәлә әғыл беәдә, чымы пыә и кәрә һандәшбе бомы ә китоб. Чәвон око доә образ әбәди мандә чымы јодәдә. Бунән, чич нывыштедәбин әвон: “Гыләј соәнәво нәведә Авропәдә – коммунизми соәнәво. Чы канә Авропә һәмә ғыввон гыләј мығәддәсә иттыфоғәдә и бән ки, чәшо еғандын ым соәнәво – Ромә Папә ијән чар, Меттерних ијән Гизо, франсызә радикалон ијән алмани полисон”.   Бәвәдә аз ыми мәсеәдә, ыштән-бәштә думотым карде ки, Меттерних кије, Гизо кије, чар чичонәје ијо, Ромә Папә чичонәје?  Бәчымы чәши вә омәј “Һәзо ијән иглә шәв” нәғыләдә быә әнһорә ҹын! Жыбызын, бә һәмон ҹыни мандедәбе ә соәнәво! Жыбызын, ә ҹын витедәбе де Авропә шәһрон кучон, бы јоли мердонән бәнә мәшһур ризгә филми образ Шапоклјаки сәһытән чәј!

            Һа чымы азизона! Ијо бәзнешон чымыку парсе ки, Толышстони телевизијә бәке, коммунизми соәнәво бәке? Бочи чәмә Лејла һовә ым гәпи жәјдә боәмә?

            Һәлбәттә, һич гылә әлоғә ни чымон арәдә, азән сәрәседәм ыми. Интаси нығыл-нығыли дығғәт быдошон, бәвиндешон ки, есә чәмә Милли телевизијә огардә бә һәмон коммунизми соәнәво, Озорбојҹони һукмәти идоронән бәнә бә шәри ғыввон сәһытән чәмә телевизијә! Әвон һәммәј дастбәдастышон доә ки, чәмә хәлғи чәшо еғандын чәмә азизә Телевизијә! Кешкә аз рәссам бәбәјм, һәмон образи речин-речини әкәшим, нишо әдәјм бәшмә, чәмә хосә толышон! Ымијән бызнән ки, бә вахти ә шәри ғыввон һичишон нызнәј карде де коммунизми соәнәво, әв охој ғалиб омәј! Де минволи, иншаллаһ әмәнән ғалиб бомемон, бәсохтемон ыштә сәбәсожә довләти!

            Охојәдә ымијән бывотым ки, һич ғәләт әзынин карде ә шәјтонон! Орзум әве ки, бахтәвәр быбу чәмә ҹәми хәлғ, һар гылә толыш! Фарси јолә шаири вотәјнә, Śabt ast bar jarīde-ye ‘ālam davām-e mā, јәне, “Хыдо мыәјјән кардедә чәмә манде ја марде”. Әмә Хыдо һәхи тәләб кардедәмон, һәхи роәдәмон, хыдо ыштән комәг быбу бәчәмә хәлғи! Амин!

            Быжијы чәмә хосә хәлғ!

Быжијы сәбәсожә Толышстон!

            Быжијы Толышстони Милли телевизијә!

Толышпресс ТВ: ТМВ_02_10_2016_КОММУНИЗМИ СОӘНӘВО ИЈӘН ЧӘМӘ ТЕЛЕВИЗИЈӘ