АВГУСТИ hАФТЕХО ЫМРУЖ!

 

 

 

 

 

 

 

АВГУСТИ ҺАФТЕХО ЫМРУЖ!

 

 

 

 

 

Деғыж

 

 

 

 

 

 

Һаканә пурғыбо бедәм, пидәме һеј быбәмым,

Интаси һич зынедәним, боки аз веј быбәмым?

 

Сәрзәмино тәро бәмон, мандәјән дасто шедә,

Быбәмым аз бо ғәрибон, ја бо мандәј быбәмым?

 

Мандәјон жыго зынедән, шәкәсон бахтәвәрин,

Чәвон дарди мы зынедәм, бәвон һәммәј быбәмым!

 

Сыредә чәшон гыләјни, ә гылә чәш бә роје,

Ҹылмә чокнә ебәм охо, тикәм зәһәј быбәмым!

 

Һәзо кәон тәјлин есә, чандә ди бекимсәнәј,

Бедәни ше-омә карде, ки окә бәј быбәмым?!

 

Выло бә чан һәзо хыјзон, мерд ијој, женән әјо,

Мерд бәштә рој, женән бәштә, боми ја бәј быбәмым?

 

Мердон шедәнин бә хәј-шәр, вәјон бедән бедәдә,

Чәшбәро мардедә моә, ки мукә әј быбәмым?!

 

Нә абру мандәни, нә ар, ым чы тало, чы тане?

Де тало бедәни зыне зоәј, кинәј быбәмым!

 

Шаир воте, нимәш мардә, нимәшән гардә охо,

Быбәмым бо мардәкәси, ја бо гардәј быбәмым?

 

Чандә гылә номердонән һәватедән толыши,

Быбәмым аз бо номерди, бо һәватәј быбәмым?

 

Кәси воте ки дијәдә мандәни һәни улох,

Милләт дасто шедә һәммәј, бәпе бо һәј быбәмым?

 

Августи һафтехо ымруж, толыши довләти руж,

Бә вахти оныгәте әв, вотеш ки рәј, быбәмым!

 

Ко-којку дәвардә һәни, һа быжән бәштә тонон,

Есә, бој, гуш быдә бәмы, росткә ты сәј, быбәмым!

 

Деғыжи дышмен бәрмалә, мәлуме чәмә дардән,

Ја бәчәј вај быныштәмон, ја бәштә хәј, быбәмым!