Инэ зывон

 

Инә зывон

Баләддин Вешо

 

Баләддин Вешо (“Веj шо”)
- моәку быә 1968-нә сори Ликәдә.
Нуперәсә вахтонку шер нывыштеjдә.
Тосә есә чапо бешән чәj “Банди выл”
ијән “Дынjо хосә дынjоj” номәдә китобон.

 

Бә ванг омәjш, дылы окаj,

Инә зывон, шинә зывон.

Хосә нәғмәш, һәжин лаj-лаj,

Инә зывон, шинә зывон.

 

Жидәш, ым ки росте, һестиш,

Тарых бәшты дасте, һестиш,

Чәнә Толыш һесте – һестиш,

Инә зывон, шинә зывон!

 

Чәшо емә софә арсиш,

Әве шәнин, әве барзиш.

Моә бә балә доә ғарзиш,

Инә зывон, шинә зывон!

 

Жидәш хәлғи вангәдә ты,

Жимони һа рангәдә ты,

Де әждәһон ҹангәдәш ты,

Инә зывон, шинә зывон!

 

Кәмон быбум - симониш ты,

Чымы мәзиш, имониш ты.

Ҹониш, номиш, жимониш ты,

Инә зывон, шинә зывон!

 

Зындәм веjон веjшон пидә,

Ышты ришә жәjшон пидә,..

Һич бе ныбә шеjшон пидә –

Инә зывон, шинә зывон!

 

Нодон, гушдә бы толыши,

Гәпыш овсин чы толыши.

Аһур бәжjе де толыши –

Инә зывон, шинә зывон!

 

Ки гуш доә бә шин ҹәһ-ҹәj,

Жыго вотдә: Тәмыш веj чәj –

Былбыли ванг ышты ләһҹәj,

Инә зывон, шинә зывон!

 

Ехроҹ гәтдә бефәр тыни –

Һар фәрзәнд ки, ғәд әзыни.

Нәзнәм тыни ҹон нәзыни,

Инә зывон, шинә зывон!

 

Ән шин маһне, шин бәстәш ты,

Вешо илһам, һәвәсдәш ты,

Азәриш ты, Авестәш ты,

Һәхи бә роj дәбастәш ты,

Инә зывон, шинә зывон!

Шинә зывон, инә зывон!