ДЫ БОЭ НЭFЫЛ

ДЫ  БОӘ  НӘҒЫЛ

Бә ғәләм сәкәс: Әшрәфи Сәрхан

V

            Валлаһ-биллаһ, бәнә Ширијә маму чәмә Толышәдә нәғылбывот кам бәбе. Әв зонығисә әнышти, ыштә сијо бығон пејәрышти, чәјоән де гыләј шинә ванги бо нәғыл воте жыго бино әкәј:

            Гыләј һестбе, гыләј ныбе, ғәрәјз Хыдо дынјо димисә һички ныбе. Толышәдә Һусејн ијән Һәсән номәдә ды гылә боә һестбе. Корпәтиҹо чәвон дәдә-нәнә мардәбе, ды боә сәғыр мандәбин.

            Де ел-обә комәги Һусејн ијән Һәсән ружбәруж перәсәјн, бә һәдд-болоғ рәсәјн.

Сипиришон гырдә бин, боәвоншон мылк ҹо карде., него, кәл, гомушшон дој бәвон. Ды боә сәшон еновније, ружшон бә шәв, шәвшон бә руж умжән карде, зәминшон каште, боғ-бостоншон еғанде.

            Ружи чы ружон ды боә мәзәку омәјн бә кә. Мол-мәләшон вырәбәвырә карде. Рукә боә шангонәш пате, сурфәш оғанде, хорәкыш варде. Пеш хорәки рукә боә дамә бе:

            -Бојли, бәмә гыләј хорәк әпат, пинә-палу кардәкәс лозиме. Кәдәмон бәпе чо вошнијәкәс быбу.

            Јолә боә дамә ныбе, әнҹәх жибығон гыләј лыбутәсырәјш карде.

            Рукә боә әј дәрәсәј. Әјште ше ки, чы кужә сипиришон гырдә быкә бә и вырә, дејәвон мәслоһат быкә. Бә со дәшејәдә чы бәлети гәвәдә бәштә мамжени раст омәј. Мамжени хәбәш сәј:

            -Хәј быбу, чымы балә?

Һәсән дамә бе:

            -Хәје иншаллаһ! Шинә мамжен, чы Һусејни кәдор бе вахт омә рәсә. Бә маму бывот, быдә гыләј фикир быкә.

Мамжен сырәј:

            -Чымы балә, һич хывәт мәкә. Бәмы бывот һәлә, чы Һусејни пијә кинә кије?

Һәсәни чы Һусејни пијә кинә ном-нышоныш бәј воте. Мамжен сәғ быбу, де ел-обә адәти ше ә кинәш һоште бо Һусејни. Вәјәшон карде, вәјушон варде. Һусејн кәхыванд бе.

            Товсонәдә ды боә ыштә тахылшон гырдә карде. Әј кује бәпештә, биношон карде бо тахыли пај-бахш карде.

            Јолә боә ыштә дыликуш дәвоније ки, аз һәни кәхывандим, рукә боә һәлә субаје. Навәдә әчәјән вәјә карде, кәдор бе һесте. Харҹыш веј бәбе. Әве ки, чы тахыли и чәло боштәно, ды чәло чы рукә боә кујәсә екардејдәбе. Гәдә боән фикирыш карде ки: -“Аз субајим. Јолә боәм хыјзонсојбе. Харҹыш веј бәбе. Быдә ыштә хыјзони вәдә хәҹоләтәжә нымандо”. Әве чы тахыли и чәло боштә, ды чәло чы боә кујәсә екардејдәбе.

            Чы ды боә ын ко бә Хыдо веј хош омәј. Әве бәчәвон тахыли әнә хәј-бәрәкәтыш дој ки, һа бахшон карде, тахыл бә сә ныбе ки, ныбе…

            Шымәнән боәтијәдә, ел-обәтијәдә, авлодәтијәдә де ијәнды һежо меһрибон, тывох быбәнән, Хыдо бәшмәнән ғәзәнҹи хәј-бәрәкәт быдә!

            Осмонәдә се гылә сеф егыније: гыләј чымы, гыләј чы нәғылбывоти, гыләјән әчәј бынывышти.