БЫhЫРЫМ БЭЛО, НЫhЫРЫМ БЭЛО

БЫҺЫРЫМ БӘЛО, НЫҺЫРЫМ БӘЛО

Вери әһволотон

-Әло! Мирфәјаз, балә, тыниш?

-Бәле, мәсејдәм, сәлом, чымы хосә Гули нәнә, азим! Ты чокнәјиш?

-Әлејкумәссәлом! Чымы балә, чокнә бәбем? И кәрә омејдәниш бә ди, Нәнә пәши гәтәше боты! Телефон зәһримори чәмијән зынејдәним ки, ыштән занг быкәм бәты. Ә гәдә зоә омәј бәчәмә кә, доме бәј занг карде. Ты чокнәјиш?

-Шинә Нәнә, бәрк гаме ијо, нәфәс сәј бејдәни! Чы хәбә-әтә һесте Веријәдә?

-Балә, ијо жыго сыхан нәвејдә ки, беријә кардәоне чә Азади зоә? Чәвон кәдә бәрк бә до-дымжонин ки, вотејдән ки, че Вәли нәвә бесәјвонә Мирфәјазе “гули гордынијәкәс”, әве чәмә зоә омутәкәс, дојдә бәј һәво, әвән дымжон дојдә бә Лики рәјкоми одәмон, бә сыә кылон дымжон, пејаршијејдә бәвон...

-Шинә Гули нәнәм! Ышты вотә мәсәлон омејдән бәчымы јод! Ты әвотиш ки, ду быбу, гуш кор бәбе, еһанә һаруж гыләј тожә сыхан нымәсо!

-Чыбызным, һа чымы хосә балә, мәсәме, азән нороһат бим.

-Нороһат мәби. Әве, әружи һежо чә Азәри пыә Азади ыштән нывыштәше дијәдә ыштә мәсә гәпон интернетәдә. Бәмынән вотејдә ки, “шымәнишон бәчымы зоә һәво доәкәс, әј һушкә кардәкәс, “шаирон” кардә әв, дојдәшон бәј бә рәјкоми ковонон дәдрујә гәпон жәј”.

-Баләма, ымон быһтон вотејдән бәты, шәр ғандејдән! Охо аз вотәме бәшмә ки, бә ро бемәшән де һәромзодон, әвон лап бәшты дим бәманден! Ыштәку мығәт быби!

-Бә Балә ҹон, бә Гули нәнә ҹон, аз дечәј зоә һич коәдә нимон! Арәдә әвиндимон ијәнды чајхононәдә, кали ҹо выронәдән бәмы һич дәхыл ныбә әгыни бәчымы чәши...

-Дијәро бынәв чәвонку, һоди быби, Баләма!

-Гули нәнә! Әв дејәмә һич вырәдә ни, һич коәдә ни, әв чы Әли Кәримли партијәдәј, “ҹәбһә, ҹәбһә” әвотинһа, һа, әв әјој. Аз есә бој, “Азәри-Толыши ијәти”јәдәм, ыштә зувышкәј кардејдәм чәмә хәлғи роәдә. Чәмә ијәтијәдә имкон әдәнин ки, чәмә узвон гыләјни бышу дымжон быдә бә кијсә, пејаршијы бәј! Зангым карде бә Азәри, вотыме бәј ки, зә, чичин ым гәп-мәпон, һәвәлә-гәвәлон, вот-вожон, маштәнә ружи ајб әбыни чән бәты, бочи сәроснејдәниш ыштә јолон? Воте, којы ныбу, бәшты аид һичи ни әјо, гәпе, һа жәјдәнәни...

-Быһырым бәло, ныһырым бәло вотејдән быми, чымы Балә! Де һар кәси әшт-нышт мәкә ки, быдә динҹ быбун чәмә гушон, әмони руже!

-Чымы чәшонсә, Хосә Гули нәнә!