ДАРД КУБОКИ ДАРД НИJЕ, ТОЛЫШИ ДАРДЕ!

ДАРД КУБОКИ ДАРД НИJЕ, ТОЛЫШИ ДАРДЕ!
Толыш кәj хыванде, ләлә!

  …Куләтонән гыләj Куләтонеһа! Ғызләво роjсә мандеjдәш, чәш новнеjдәш, орәхе зынеjдәни ки! И тыкыш шеjдә пемандеjдә бә бандон! Одәмонышән һежо бәнә бандонин – барзыбылынд, пурыпынд, сырәдиjән иjән шинәләвз…
Әмә ыштә саjтәдә һаканә нывыштеjдәмон Масали барәдә, чы рәjони сәриҹро һакимиjәти кардә әмәлон барәдә. Чы нывыштәjон һәммәj һестышоне иглә ном: Ым хонәхо чокнә пиjеjдәше, жәгоән тожнеjдә ыштә аспи бы мәһоләдә! Нымандә зылләтон вардеjдә бә мәхлоғи сә, лап де кылә корти пуст кардеjдә әвони! Һизәперомәти кардәкәсонән ҹәзо доjдә лап бә миjонә әсрон подшон лоjиғ ! Бәмә камко бәкарде һәм вахт, һәмән коғәз ки, чәj кардә әмәлон һәммәj барәдә бынывыштәмон бә и кәрә. Әве нывыште пиjеjдәмоне футболи барәдә…
  Бәвотешон, футбол чыконҹо беше бә миjон? Сәбр быкән, есә бәзнешон…

  Бә Боку һәниjән хош бо вотәjнә (одәмику чанә шикат бәше бә Боку?!), ым гавзиjәли сәриҹро бә ғәрор омә ки, футболә кеш дәвоны Масали кәмәндон арәдә. Шәртышән ым быә ки, ғалиб омә кәмәндә сәнине һәм пул, һәмән ки, бә  “жығом” чиче,  “ИКӘСӘ” (jәғын ыштән сәбәрәсешон, ки воте пиjеjдәме…) ном Кубок! Һа чич бәка, быбуjәни. Һәнәкон кардә бин, охоjәдә мандин дыглә кәмәндә: Куләтони кәмәндә де Ишығи идорә кәмәндә (кырти:  толышон де тыркон!).

  Бә гири һеjран куләтоныжон, имкон ныдошоне ки, әвон ыштә чәши окән, чәсбони жәшоне гыләj гол! Чич быкән, чич ныкән ки, куләтоныжон ныбән ын һәнәки, рәjони нымоjондон егынин бә даст-почә! Һәрәсон витин һакими сәпе ки, зә, ханихәроби зоә, бәты вотәмонбехо, куләтоныжон беәjән че сәриҹро сиjо сиjоһиjәдән, чумчыко бәләдиjә сәчынонәдә выжниjәшоне ыштә пиjә одәм, есә кубокиjән әвон быбон, бәвәдә бәгыне чәмә кә, чич кардеjдәш быкә, куләтоныжон ныбән ын һәнәки!  

  Һакимән чич быкә, манде мәтәл, һич ниjәдә доше гыләj  “пеналти”  бә куләтоныжон бә. Һисоб бе 1-1.
Һакими һежо пиjеjдәшбе ки, нишо быдә мәркәзи, “быжән-быжән”  егыниjе бә мәхлоғи арә. Толышон һуррәҹ кардышоне емәjн бә стәдион. Аләм гыниjе бәjәнды.

  Чандибәчандон де тәһәри ашиш кардышоне ҹәмат, бә ғәрор омәjн ки, сәнибәтон бино быкән һәнәки. Рози бин. Һәнәк бино бенҹән куләтоныжон жәшоне гыләjән гол! Ләзи дәнывардә һакими ижән пиjәше  “пеналти”  тәjин быкә бә куләтоныжон бә, ижән  “быжән-быжән”  егыниjе. Ижән аләм гыниjе бәjәнды. Арәдә кубокән манде жипо һырд бе.

  Чанди бывотым, охоj һәнәк сә бе де  “һич-һичи”. Тәклиф кардышоне ки, иминә вырә быдән бә дыглә кәмәндә, пулиjән бахш быкән чәвон арәдә. Бәчәмәкиjонән куләтоныж бәвотен! Вотен, не ки не! Jа ғалиб омәнинимон, jаанки дәбәбохтемон! Охоj ғәрор жыго бе ки, һар кәмәндә быжәны пенҹ гылә 11 метрә зәрбә. Ғоччәғә куләтоныжон иjо кардышоне ыштә зынәj, jәни ғалиб омәjн де 7-6 һисоби!

  Әмма деми сә ныбе чәмә һикоjәт. Вәдә омәj рәсәj бә  “жығоми”  ном быә кубоки бә ғалиби едаште, мәлум бе ки, нә Кубок ни, нәәнки әj едаштәкәс! Рәjони нымоjәндә жыго бешәбе арәо ки, һич жыбызын быәниjбән стәдионәдә!
Ымән бошмә Мәсали сәриҹро Кубоки охоj! Иjоән ижән мәлум бе ки, чы хонәхон дард Кубоки дард ниjе, Толыши дарде! Чәвон дыл әтәки, тырк манде-манде, Кубок рәсәбәj бә Куләтони толышон! Куләтоныжонән сыбут кардышоне ки, толышон һәни 5-6 сори бәнав быә толыш нин! Чы зәмини соjб һәғиғәтән толыше, Кубокән бәj рәсәнине!  Әли Насири вотәjнә: