БАХТЭВЭРЕ Э ХЭЛГ КИ, hЕСТЫШЕ ХАНЭЛИ ТОЛЫШ!

Разделы

Архив

Пн Вт Ср Чт Пт Сб Вс
123
45678910
11121314151617
18192021222324
25262728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 40 голосов)
Изменить размер шрифта Decrease font Enlarge font
image

 

БАХТӘВӘРЕ  Ә ХӘЛҒ КИ, ҺЕСТЫШЕ ХАНӘЛИ ТОЛЫШ!


  Ым һәғиғәте ки, шаире һар хәлғи дыл. Чумчыко иминә дыл хәбә гәтеjдә андом дәжеәдә. Әв рост кардеjдә "Jаһу!", ҹар кәшеjдә бә аләми ки, нохәше ым андом, мыолиҹә быәнине. Шаирән жәго. Ыштә хәлғи дарди иминә сәрәсәкәсе шаир. Шаире чәj дарди жәго росниjәкәс ки, һандәкәсон дечәj кәломи сәрәсеjдән ыштә хәлғи егыниjә ружи, чәj дард-сәри, ғәдо-бәло.

  …Чәмәһон веjни һәлә һич дынjо димәдә ныбеәдә, быәкәсон веjниjән һәлә шинә һанәдә беәдә, бахтәвәр-бахтәвәри бәштә "озорбоjҹоныжим" вотеәдә, бә тырки нывыштеәдә, бә тырки ғоллығ карде-карде ыштәни һәрәбахт зынеәдә, бә вахти ки, дынjоәдә веj одәмон һич толыши номи нызнеәдә Ханәли Толыш нывыштеjдәбе бә толыши чәj ыштәни дардон. Ғыjә кәшеjдәбе ки, бочи ым хәлғ егыниjә бә жыго гонә руж, бочи ни чәj һәвари кәшәкәс, чәj һуғуғи мыдофиә кардәкәс, ни бә толыши соjб бешәкәс. Ым ә вахтонбин ки, Х. Толыш "Бефәрә авлод" вотеjдәбе ыштә Вәтәни шодоә, ғычи нуни думо бә мәһолон дәрбәдәр егыниjә толышә мердон, шымши евырдынеjдәбе, ти жәjдәбе бә бәштә толыш нывотәкәсон, шин-шини нозә кардеjдәбе бо ҹывонон, сәдо кардеjдәбе әвони Толыши роәдә бә мыборизә, нәғыл вотеjдәбе шиш-шини бо толышә һырдәнон, де нәғыли зывони сәроснеjдәбе әвони ки, толыше чы зәмини иминә соjб, әвән соjб бешәнине бәштә Вәтәни, "Веjән jолә дастәмон, Бә иjәнды рәсдәмон. Ыштә һәхи бәстемон. Ә руж һәлә омәни, Вәтән, чәшкә әмәни!" - воте-воте бә һәвәс вардеjдәбе толыши мәрдә зоон, мәрсиjон нывыштеjдәбе бә толыши, һандеjдәбе әвони Ашурәдә, сәдо кардеjдәбе Имоми бә Толыши комәг, маһне нывыштеjдәбе бә толыши, "Муjәхолоны рыштә, Бә вә еһаштә,  Пегындәш бәмы, Һа маштә-маштә!" воте-воте тариф кардеjдәбе толышә речинон, Вәлиша де зәрфәти вотәjнә, ыштә әғылон хыртәо обырниjе-обырниjе "де сәнҹәхи" китоб вадоjдәбе ки, толышон баһандын ыштә Инә зывонәдә. Һәни чичон кардеjдәныбе? Гирәм кардәшнәбәj чымы бә пе пеһандәjон һич гылә, вәс әкәj бә Толыши чандә гылә нәслон чәj кәшә толышә филмон, чәj "Додо" (Хыдо рәһмәт быкә бә Додо!) ки, че дынjо һар вырәдә жиjә толышон кәонәдә һесте әв. Һар гылә толыш кәj пенсәдә ноәше Х. Толыши кәшә филмон бәнә вәjу вәjәречи, бәнә тәбәрыки, фәхр кардеjдә деjәвон. Фәхр кардеjдә ки, кинофилмон һестин толыши зывонәдә, Х. Толыши – Ханәли даj кәшәше ә филмон! Еһанә кардәшнәбәj ым коонән, вәс әкәjн бо Толыши чәj перосниjә выләпәрә зоон иjән кинон, ә әғылон ки, һар гыләjнишон гыләj ғәләjе бо Толыши. Конҹо беjдән быбун, ғоллығ кардеjдән бәштә хәлғи, бәштә Толыши!

  Хыдо гыләj меҹузәjе Х. Толыш! Кеjнә раст бош бәj, диjәныш сыреjдә, нур воjдә чәj нураниjә симоо. Кон вәзjәтәдә беjдәш быби, әһволы чок беjдә әj винде бәпештә, деәj кәлмәj сыхан карде бәпештә. Жыбызын, дынjо пәше бо Х. Толыши! Чыконҹоj ым жимони һәвәс бәjку? Чичику зу сәjдә, илһом сәjдә ым одәм? Jәни чәjку jан дәвардеjдән чы дынjо дард-сәрон? Jәни нише чәj һич дарды-сәр? Бочи диjәныш сыреjдә һежо, нур воjеjдә симоош һежо?

  Хыдо нуре Х. Толыши симоәдә, Толыши ғырjәте чәj хунәдә, чәj бовәjе бә Хыдо ижән бә ружи ки, озод быәнине чәj хосә Вәтән – Толыш! Ыштән бовә кардеjдә быми, әмәнән деәj бә иҹо бовә кардеjдәмон бәштә Сипириши сыхани. Һандеjдәмон чәj шерон, "де кәминә ов кырнеjдәмон" деәj бә иҹо, перохнеjдәмон "Мәлык Мәммәди - Толыши сиjо дынjоо", озавзиjеjдәмон "бәнә сәмәни", озавзиjеjдәмон ки, "Вәтән чәш кардеjдә әмәни", рәсәнинимон бәштә Вәтәни, бәштә хәлғи һәраj де Х. Толыши сипиришәти, дечәj сыхани, дечәj шери бә иҹо!

  Ымруж 70 сор тәмом беjдә Х. Толыши моәку быә ружику. Бахтәвәре ә хәлғ ки, һестыше Ханәли Толыш, бахтәвәре Толыш ки, һестыше жыго гыләj сипириш, жыго гыләj шаир, жыго гыләj пыә, жыго гыләj мерд, жыго гыләj сыхани сәрроф! Са сор быжи, хосә Ханәли даj! Әнә быжи ки, озод бывинд Толыши, озод бывинд әмәни! Гырдә быкә әмәни һәммәj бәштә сә, ижән боәмон быныштәмон ышты кәj дырозә әjвонәдә, быныштәмон ышты ләми жиjәдә, шин-шини пешомәмон ышты һәлолә чаj, бәһәмон ышты һәлолә тикә, гуш быдәмон бәшты нураниjә соһбәтон, бә jод биjәмон дәвардә ружон, "де сәнҹәхи китоб вадоә" ружон, бывотәмон, бысырәмон, шоjво быкәмон ки, озод быә чәмә хәлғ – Толыш, чәмә Вәтән – Толыш, чәмә шаир – Х. Толыш, чәмә зывон – Толыш! Быжи, Ханәли даj, са сор быжи!

 

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (3 добавлено)

  • Опубликовано Дориюш, 05 Сентябрь, 2010 12:15:31
    Табрик кардамон! Ман тоҷикам аз Тоҷикистон. Хушҳолам, ки мебинам мо мардумони эронӣ ҳанӯз ҳамдигарро мефаҳмем. Поянда бошед, азизони толиш! Ҳамеша зинда бошед!
  • Опубликовано Холмилинский, 03 Март, 2010 11:44:17
    Табрик кардамон, табрик кардамон! Хыдо ба Шыма омур быда, Ханэли муаллим! Руж а руж быбо Шыма hашто сори, наве сори, са сори, садо пенчоh сори бывиндо чама Толыш! Галамыjон hич кыл ныбо! Успехов и новых поэтических чудес в Вашем неповторимом творчестве! Поздравляю! Будьте здоровы!
  • Опубликовано zabil, 03 Март, 2010 00:16:45
    Ханәли дај һа быжи,Базнеш кардеј са быжи,Лап ты дысада быжи!

Главные новости

|