ЧЫМЫ БАЛЭ ОМЕJДЭ

 

ЧЫМЫ БАЛӘ ОМЕЈДӘ

Ханәли Толыш

 

Де осмони ро кардә,

Пы-мо дыли шо кардә,

Бәнә выли окардә:

Чымы балә омејдә.

 

Чәш бакан охо чандә?

Вотдән ајропландә,

Бә осмони пемандә:

Чымы балә омејдә.

 

Вәрдышәдәј соәдә,

Нәзәш әнә роәдә.

Машин тормоз доәдә,
Вотдәм: баләм омејдә.

 

Бо кә рә-рә дәшыни,

Бо һамсијә әшыни.

Мәсәдә һар һәжини,

Вотдәм: баләм омејдә.

 

“Мыни рыкно мәкәнән,
Гәвә-гувә сәкәнән.
Чәшон дырыст окәнән,

Чымы балә омејдә”.

 

Нәнон дыл бә дод бедә,

Чәшон бә ро мот бедән.

Воте-воте фот бедән:

Чымы балә омејдә!

01.09.2018 с.