АВГУСТЭ МАНГИ 7-ДЭ

АВГУСТӘ МАНГИ 7-ДӘ

Деғыж

Зәмин-осмон бә шојвобе,
Выл окашбе дашти, мәзә.
Мәхлоғ һәммәј гырдә бәбе, -
Сырәкәс ки, бәмәкәс ки!
Толышон әштәбин сәпо,
Августә манги һафтәдә!

Һафто чо сор дәвардәбе
Нонзәминә сори бәпешт.
Балә Мәммәд, Дәдә Зылфи,
Че Бејгәғә кәшә зәһмәт
Ғәбул бәбе Хыдо тоно,
Августә манги һафтәдә!

Бә јод омәјн веј толышон,
Шәғоләсе ном бә гәвонбе.
Гуларә Инә, шаир Вәлиша,
Заһирәддин, Огтај, Фикрәт,
“Авестә” вотдәбин һәммәј,
Августә манги һафтәдә!

Гуларә Инә дутә бојдәғ,
Нәведәбе дастонәдә.
Әли Насир һандедәбе
Толыши Һимни барзәдә.
Ланконәдә вәјәвандбе,
Августә манги һафтәдә!

Ә руж гыләј јолә ружбе,
Толыши Мәҹлис обәбе!
Әләкрәм, Микајил, Әждәр -
Толыши јолә сәркәрдон
Ныштәбин рәјосәтәдә,
Августә манги һафтәдә!

Сипиришон әштин сәпо,
Чәшоно арс еме-еме
Вотен: -“Толыш мухтар быбу”!
Дыса һавдә депутати
Сәдо доше бы тәклифи
Августә манги һафтәдә! 

Аз Деғыжим, вотдәм бәшмә:
Јодо бемәкән ым ружи!
Рост быкән чәмә пәрчәми,
Һуррәҹ быкәмон бә Вәтән,
Озод быкәмон Толыши
Августә манги һафтәдә!