Хок бэшты сэ !

 

 

 

 

Хок бәшты сә !

Баләддин Вешо

 

(толышон дыләдә бәштә “толыш” бывот,

кәно бәштә “азәрбајҹаниж” вотә кәсон һәгигәтән нимә толышин...)

 

I

Вадәм тикәј ток бәшты сә,

Нимә толыш, хок бәшты сә !

 

Жыго бызын зәһрә кукәш,

Чуне шедәш, чубә букәш...,

Тарсә бызиш, ләвәчәкәш,

Бырәс жәјдә лок бәшты сә,

Нимә толыш, хок бәшты сә !

 

Осәм һәлә, ты фик быдә,

Әсли гин кај, чунеш шедә?

Оким вотдәш, замбох бедә,

Огардедә “пок” бәшты сә,

Нимә толыш, хок бәшты сә !

 

Кам бо ҹојон ләғ быби ты,

Сәј рост быкә, шәх быби ты,

Мардәниж, бәјшт, сәғ быби ты.

Еғрјә сијо ҹук бәшты сә,

Нимә толыш, хок бәшты сә !

 

Һа номердон лумә гылә,

Рој  шат шедәш, бәнәј шылә...

Дәшедәш бә кагон дылә,

Петырједә сук бәшты сә,

Нимә толыш, хок бәшты сә !

 

Дәрәсдәниж, ижән вотдә,

Бә гәв панбә дәжән вотдә,

Толыши гәп мәжән вотдә !
Женән бешә чок бәшты сә,

Нимә толыш, хок бәшты сә !

 

Зындәш һәјо чо кардәни?
Әв ғат кани, то кардәни.

Га вотедә ко кардәни,

Га вотедә лок бәшты сә,

Нимә толыш, хок бәшты сә !

 

Ты толышиж, фәһмы кыве?

Бәштә әсли рәһмы кыве?

Әгәм мердиж, зәһмы кыве?

Биным кока рәк бәшты сә,

Нимә толыш, хок бәшты сә !

 

Ҹо димәдәш, пегард бәштә,

Ты сој беши, быгард бәштә,

Ты мерд быби, огард бәштә,

Бенышу јол-рук бәшты сә,

Нимә толыш, хок бәшты сә !