ОЗОДИ ИJЭН ТАРС

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 70 голосов)
Изменить размер шрифта Decrease font Enlarge font
image

 
 

ОЗОДИ ИЈӘН ТАРС

Фәхрәддин Әбосзодә

 

            Конҹо озоди һестебу, тарс һесте әјо! Чыми, камику, дыглә сәбәбыш һесте. Иминәни, озоди бә даст вардеј чанә гонән быбо, чәј нығо дој бәсә бәјсән гон ијән чәтине! Бәшәри тарыхәдә чандә гылә нымунон һестин ки, бәштә озоди рәсә хәлғон пешы огәтешон зынәни әв. Озодә хәлғон ијән чәвон довләтон һар вахти ыштә озоди гин кардејку тарсејдән! Есәтнә глобалә дынјоәдә ым мәсәлә тикәјән актуале.  Чумчыко есә һәм гәдә довләтон, һәмән һәтто јолә довләтонән гыләј чәши окә-викәдә гин бәзнен карде ыштә озоди! Әве вотејдән ки, озоди бә даст варде һостоне, әмма әј нығо дој чәтине!

            Дыминәни, ә тарс банде бә мәсулијәти. Чумчыко озоди һәмән јолә мәсулијәт тәләб кардејдә. Әве ғулон ијән нокон, чыми-чәј кәшәдә жијә одәмон ијән хәлғон һәммәјсә веј тарсејдән озодику! Чумчыко ә шәхсон ијән хәлғон һич хәбәшонән ни, озоди чиче? Әвон веј вахте пемужијән бә табејәти, бычыми-бәчәј сәрәнҹомон ијәнә асбардон бә вырә росније. Жәләвонә одәм һич мәсулијәт һисс кардејдәни бәштә әмәлон горәнә. Чумчыко әв әнҹәх иҹро кардејдә. Бы вахти чәј мәсулијәт әнҹәх һәмон сәрәнҹоми ијән асбарди бә вырә росније кејфијәтәдә ијән формәдә бејдә. Мәсәлән, әғә вотејдә, искани чај быдә бәмы. Бы коәдә че нокә мәсулијәт бәвәдәј ки, әв чанә рә ијән де кејфијәти, һәмән де сәлеғә бә вырә бәросне чәј сәрәнҹоми. Әмма чә чај бәчәј әғә ҹони хәјыш бәбе ја зијон, јәне чә ғәрори ыштәни мәсулијәт әғә гијәдә мандејдә, чәј һич аидијотыш бејдәни бә нокә!

            Чыјо жыго мәлум бејдә ки, бо нокә озоди гыләј јоләә дарде, бәлоје! Чумчыко озодә инсон һәм ғәрори ыштән ғәбул кардејдә, һәмән ыштән әј иҹро кардејдә ја әј иҹро дојдә карде бә ҹо кәсон. Јәне һәмә һолонәдә мәсулијәти әв ыштән кәшејдә! Һич вахти озод ныбыә, әнҹәх чыми-чәј сәрәнҹомон бә вырә роснијә одәмиро чымисә гонә ко әзыни бе! Мылхәс, озодә одәм ыштән кардејдә һар кој, ыштән чәј мәсулијәти кәшејдә, әмма ғул ијән нокә чыми-чәј вотәј кардејдән, әве мәсулијәт чиче, зынејдәнин!

            Хәлғонән жәгон. Нәзәр сәғандәмон бә навконә Сәвети хәлғон, лап һежо бә Озобижонәдә жијә хәлғон. Һафто сорбе ым хәлғон пемужијәбин ки, ғәророн һәммәј омејдән Москвәо бә Боку, ијо ныштә һукмәтән әвони асбардедә бә жинә лынгонәдә ныштә мәмурон, әвонән тәшкил кардејдән чә ғәрори иҹро. Сәвети вахтәдә хәлғон пештыпурбин ки, “Москвә һесте”! Әве, чәвон гыләј ишкил бә мијон бешеәдә, әвон шикат әкәјн бә Москвә, чәјо одәмон әвојн ја чәјо асбардин бә Боку, демијән һәлл әби һәмон мәсәлә.

            Веј одәмон есә сә арыштејдән ки, бочи Сәвети Иттыфоғику есијә тожә мәмләкәтон һич гыләјнијәдә нормал довләт ијән һукмәт ни? Чыми һәммәјсә јолә сәбәби нәвеј лозиме һежо бә озоди ијән мәсулијәти мәсәләдә. Чумчыко ә хәлғон вејни зынејдәнин ки, довләти чокнә сохтејдән, әј чокнә идорә кардејдән, һукмәти чокнә выжнејдән, чокнә әј дәгиш кардејдән, чокнә нәзорәт кардеј лозиме бә һукмәти? Әвон чандә дасорон дыләдә пемужијән ки, чәвон довләтән, һукмәтән “осмоно” егынијә боәвон, чәвонку һич хәбә сәкәсән быәни бы мәсәләдә! Бәчәвон һич ағылән омејдәни ки, бәпе әвон ыштән дастбәдаст быдән, бысохтын ыштә довләти, бывыжнын ыштә һукмәти! Бы тожә довләтонәдә һукмәти де ҹурбәҹурә роон ијән чәмон бә даст сә одәмон ки һестин, әвонән истифодә кардејдән жыго вәзјәтику, чичышон пијејдә, әјән кардејдән де мәхлоғи! Бы бәдбәхтә мәхлоғи һич ағылән омејдәни ки, әвон әнҹәх ыштән бәзнен дәгиш карде ыштә һукмәти! Чәвон һәлән нокә ијән ғули һоләдә манде сыбут кардә гыләјән дәлил бымәдәј ки, әвон есә шикат кардејдән бә президенти ја бәчәј жени ки, шымә боән, чәмә фылон ишкили һәлл быкән! Ым бәдбәхтон һич зынешонән пијејдәни ки, чә ишкилон сәбәбкорон һежо ә президент ијән чәј жен ыштәнин!

            Бы вырәдә омејдәм чәмә толышә хәлғи сәпе! Дыса сорисә веје ки, чәмә хәлғи гиныш кардә ыштә милли довләт, жијә чыми-чәј кәшәдә! Тәғрибән са сор Русијә империјә тәркибәдә, мандә са соријән ССРИ тәркибәдә! Пешынә 27 соријән толышон жијејдән песохтә Озобижони республикә тәркибәдә. Бы дыса сори дыләдә чәмә хәлғ анә пемужијә бә нокәти ки, гырд јодош бекардә че озоди тәм! Бомы чанә гонән быбо, бывотым ки, чәмә толышон вејни зынејдәни, һич зынешонән пијејдәни ки, озоди чиче, әв чокнә бејдә, бочи әмә пијејдәмоне ки, чәмә хәлғ озод быбу? Чә мандә толышонән и поә, мәвужи, зынејдә озоди чиче, әмма әјән зынејдә ки, озоди быә вырәдә мәсулијәт һесте, әве пијејдәшни ки, чәмә хәлғ озод быбу, чумчыко бәвәдә әвон бәпе ыштән ғәрор быдән, чәј мәсулијәтијән ыштән быкәшын! Чумчыко бо жәләвонон ҹо хәлғи кәшәдә жије веј роһате! Јәғын фикон доә Јутубәдә бә гыләј видео-чәхи. Әјо Илһам Әлијеви тобјә шоткомә кардејдә чәј чоминә президентәти, әмма ҹәми дыкәс рахс кардејдә мијонәдә, әвон дыјнәнән толышин – Һади Рәҹәблије ијән Һусејнбалә Мирәләмов! Чәвон кардә рахс че әсыл ғулон ијән нокон кардә рахсе! Чәвон рахс карде сәбәбән әве ки, әвон һәммәјсә веј шојво кардејдән ки, жыгошән мәсулијәт чиче нибәзнен, әнҹәх ҹо кәсон доә сәрәнҹомон, чәвон ғәбул кардә ғәророн иҹро бәкарден! Әвон тарсејдән озод бејку!

            Бы вырәдә омејдәм ыштә әсыл мәтләби сәпе. Гирәм әмә пијејдәмонбу, озод быбу чәмә хәлғ, бәпе, иминәни, сәроснәмон бәштә хәлғи, иминә нубәдә бәчәмә ҹывонон ки, озоди чиче, бочи әв лозиме бәчәмә хәлғи ијән бә һар гылә толыши? Дыминәни, ә мәсулијәти тарси бәпе бекәмон ыштә хәлғи ҹоно! Чумчыко тарсоә хәлғ озод әзыни бе, озоди һич дамејдәни бә жәго хәлғи! Тарсоә хәлғи озод кардејән һич мәнош ни, чумчыко әв нығо дој әзыни ыштә озоди, манг, сор, дасор дәбәварде, әв гин бәкарде ыштә озоди, ижән бәше дәбәмускије бә ҹо хәлғи согнә! Јәне вотем пијејдә ки, ҹо гыләј довләт бәзне озод карде гыләј хәлғи, әмма ә хәлғ ыштән огәте әзыни әј! Чыми ән чокә нымунә Озобижони тырконин! Хариҹи ғыввон озодышон кардә әвон, довләтышон сохтә боәвон, әмма әвон тосә ымружнә ружи и саатән ныштәнин чә довләти сәдә! Чумчыко ғуләти, нокәти чәвон хунәдәј! Әвон пемужијән ки, һежо ҹо хәлғон ијән ғыввон идорә быкән әвони! Әве һежо бәшмә вотејдәм ки, чы довләти охојыш ни, әв рә-ди мәһв быәнине, бәбејән! Чә хәлғи ыштә сәбәсожә довләтыш әзыни бе, әв һежо бәпе ҹо довләти тәркибәдә быжијы! Чумчыко ә хәлғ һич вахти озод быәни, озодәти чиче, зынејдәни, мәсулијәт чиче, зынејдәни, озоди дамејдәни бәј, әв бо озод жије омәни бә дынјо дим!

            Быдә чәмә толышон чок-чоки дијә быкән бә тыркон, панд быгәтын: Әмәнән бәнә бәвон ја бәпе һежо тарси дыләдә жијәнинимон, чыми-чәј навәдә нокә быәнинимон, јаанки ыштә милли-озоди ҹанги де зәфәри бә сә роснијәнинимон, ыштә сәбәсожә довләт Толышстони сохтәнинимон! Ҹо ромон ни!

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|