ЧЫМЫ 61 СИНИ ЭН JОЛЭ ДАРД !

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 90 голосов)
Изменить размер шрифта Decrease font Enlarge font
image

 
 

ЧЫМЫ 61 СИНИ ӘН ЈОЛӘ ДАРД!

Фәхрәддин Әбосзодә

 

            Ымруж декабрә манги 24, шанго саат 9-е. Маштә дабәме чымы 61 син! Дабәме вотеәдә ки, сыхани рости, 61 синым зинә – манги 23-дә дамә. Чумчыко аз зинә бә дынјо омәм. Әве чымы гирамијә боон гыләјни ымруж бәмы нывыштеәдә ки, “навбәнав тәбрик кардејдәм шымәни!”, сырә омәј бәмы. Әмма нә чәј, нәән ҹо одәмон гыношон ни. Гыно чымы ыштәније. Гыном әве ки, аз ыштән 16 синәдә паспорт пегәтеәдә, ыштән хаһишым кардә ки, паспортә мизи рәис чымы мовардә тарыхи декабри 25 бынывышты! Номыш чымы јодәдә ни, әмма шин-шини парсәј чымыку: -“Бочи декабри 25, охо ты манги 23-дә бә дынјо омәш?” Ыштәнән нызнәме, чич бывотым, хәјли бә думот шим, чәјо вотыме: - Зәһләм шејдә сејку! Одәм, хысусән мерд ја бәпе “5” быбу, ја “2”! Хәјли едјәсәј бәчымы чәшон дылә, чәјо там-тамижә нывыштыше: 25 декабр 1956-нә сор.

            Жыгонә, коғәзисә декабри 25-дә “омәјм” бә дынјо! Есә зәмонә жыгоје ки, әмә һәммәј коғәзисә жијејдәмон. Чумчыко һар гәмәсә коғәз (сәнәд) тәләб кардејдән чәмәку. Әмәнән ыштә кијәти, чичонәти сыбут кардејро, мәҹбуримон хәјли коғәз быновнәмон һежо дештә.

            Чәмә пыә-моон, дәдә-бобон һич нәзнин, манги чандәдә омән бә дынјо! Есә сәрәсејдәм ки, әвон һәммәј реал одәмбин, реал жијејдәбин, бәнә бәмә коғәзисә жијејдәныбин! Әмма әмә бекоғәз һичкимон, һичимон!..

            Мылхәс, мәвужи, дијәро егыним ыштә мәтләбику. Ымруж манги 24-је. Сард гынијә бәмы, нохәшим, олхартәм јонгоәдә. 5 руже олхартәм. Кали одәмон вотејдән ки, де һар гылә нохәши Хыдо бахшејдә чәмә гыләј гыно! Әзыним воте, росте ым хәбә ја дује? Һич вырәдә һандәмни, пәјдом кардәни чәј дырыстәти сыбут кардә дәлил. Әмма мәсәлә молјәт бымәдә ни. Мадәм ым мәсәлә омәј бәчымы јод, чокиш ыме, бынывыштым ыштә гынон һәхәдә.

            Чымынән јәне гыном һесте?- парсәјм ыштән-ыштәку. “Ым чы сыхане, һәлбәттә һестыме!” – әлбәһол ҹәвобым дој бәштә парси.

            Гынон ды ҹур бејдән: Һестин жәго гынон ки, одәм ыштән зынедә әвони. Жәго гынонән һестин ки, одәм ыштән һич зынедәни ки, кардәше жәго гыләј гыно. Мәсәлән, ты нызне-нызне, ныпије-ныпије бә и кәси хото гынијәш, јәне һич ыштәнән нызне-незне гыно кардә! Ә гынон һаштејдәм бә кәно, ыштә зынә гынон һәхәдә гәп жәјым пијејдә.

            Чымы зынәјку, бахтәвәре ә одәм ки, әв зынејдә ыштә кардә гынон! Чумчыко ыштә гынон зынә одәм бәпијеше ки, һәни ныкә жәго гыно, һәмән дастпочә бәбе ки, бышышты ыштә гыно. Гыно шыште бәс чокнә бејдә? Конкрет одәми аидијотәдә гыно кардәбу, бәпије ки, һәмон шәхс быбахшы ышты ә гыно! Ја Хыдо навәдә гыно кардәбу, дештә ҹо сәвобә әмәлон дастпочә бәбеш ки, һәмән дыво бәкардеш бә Хыдо ки, Әв быбахшы ыштә һәмон гыно! Хыдоән, чымы зынәјку, бәвәдә бахшедә ышты гыно ки, ты и кәрән һәни ныкош жәго гыно!

            Хыдо бәчымы димиш дијә кардә ки, чымы кардә гынон вејни аидин бәчымы ҹоһиләти вахтон. “Ҹоһиләти” вотеәдә, ыштә ҹывонәти сорон нәзәрәдә гәтејдәним.   Ҹоһиләти ә вахтонин ки, бәвәдә дијәробим ныможику, ибодәтику. 2000-нә сорику ныштәм бә нымож. Жыго зынејдәм ки, бы һавдә сорәдә жәго јолә гыном бәпе ки ныбу!

            Һички әзыни навбәнав воте ки, кејнә куч бәкарде чы дынјоо! Әве, Хыдо бәмә доә һар гылә ружи, саати, дәғиғә, санијә, ләзијән жәго жијеј лозиме ки, жыго бызын, әв ышты умри охонә руже, саате, дәғиғәје, санијәје, ләзе! Һәмән һаруж, һар саат, һар дәғиғә, һар санијә, һар ләзәдә һисобот дој лозиме бәштә ыштәни ки, чичоны карде, чичон мандин, чокнә карде, чокнә лозимбе карде, сәвобы чич бе, гыно чич? Һежо жыгомән кардә, жыгоән жијәм! Һар ныможымән вотә бәнә ыштә охонә ныможи! Дывом кардә бә Хыдо ки, Әв быбахшы чымы зынә ијән нызнә, зыне-зыне ијән әнәзынәтику кардә гынон! Ибодәтәдә нырәсәјоным быән, әмма һежо бә дастпочә быәм ки, әмәлоным пок быбун! Чанә зынәме карде, Хыдо зынејдә ыми! Интаси, чымы зынәјку, иглә Хыдо зыне каме, бәпе одәм ыштәнән бызны ыштә чоки-бәди ки, быдә камо-вејо роһат быбу чәј руф! Одәми руф чанә роһат быбо, анән шәјтони вәсвәсә әзыни дәше бәчәј дыл! Одәм ыштә имонәдә чанә сабитғәдәм быбо, анән роһат һисобот бәзне дој һәм ыштә хәлғи навәдә, һәмән Хыдо һузурәдә! Ыштәни фамә һар гылә одәм бәпе һежо һозы быбу бо ыштә Халығи һузурәдә бо һисобот дој. Әмма тосә бә мәғоми одәм һисобот доәнине бәштә ыштәни, һәмән бәштә хәлғи. Ымружнә ружәдә ки нывыштејдәм ымони, ымән чымы гыләј гәдә һисоботе һәм чымы хәлғи, һәмән Хыдо навәдә, һәм чымы дустон, һәмән чымы дышменон навәдә!

            Бы шесты и сори дыләдә веј одәмоным виндә, де веј одәмон һәмроәтим кардә, дустоным быән, дышменоным быән. 24 сор бәнав умуж гынијәм боштә хәлғи озоди ҹанги!   Быми Хыдо шојде: Һич вахти һәватәмни ыштә дустон, дышмени навәдән һич витәним!  Мәвотән, тариф кардејдәм ыштәни, әстәғфуруллаһ! Бәштә зоон һежо вотејдәм ки, чымы сәғәтијәдә ја марде бәпештә һич кәс бәшмә әзыни воте ки, шымә пыә һәватәше ыштә дустон, хәјонәтыш кардә бәвон! Гирәм вотәкәс быбоән, бызнән ки, чә хонәхо Хыдош ни јаанки Хыдоку тарсыш ни!

            Ән јолә гыном кардә дештә ыштәни – дештә ҹони! Зылләтым доә бәштә ҹони, хысусән бы охонә 24 сори дыләдә. Һежо тарсәм ки, бәмардем, нимәдә бәманде чымы бино кардә фылон ко. Зәһләм шејдә ниманҹулә одәмику, һежо пијејдәме ки, бә сә быросным ыштә бино кардә кој. Шык быбу бә Хыдо ки, чәвон вејним бә сә роснијә, вәомәдә быәјонән, де Хыдо комәги, бә сә бәроснем иншаллаһ! Әмма ҹоным ов быә, әве тәләкәј сард бенҹән, нохәш гынејдәм! Ҹонәдәм ҹон мандәни! Әмма һич һәфтоғијән бардејдәним. Әксинә, һежо бәштә танә жәјдәм ки, бочи жыго дим бино карде бәштә хәлғи хыдмәт карде? Һежо чыјоән жыго һисоб кардејдәм ки, чымы ҹәми 24 синым дамејдә маштә! Чумчыко навконә сорон син зынејдәним боштә!

            Ыштә бәпештә ән јолә зылмым карде бәштә хыјзони! Интаси нә ыштә пыә, нә ыштә моә, нә ыштә ҹывонә боә, һич гылә ҹо авлоди навәдә кырт зынејдәним ыштә зывони, сәбәжи зынејдәним ыштәни! Чумчыко чәвон һәммәјсән јолә зылмым кардә бәштә дыглә балә: Чәвон әғыләтим сә чәвон дасто, ҹывонәтим сә чәвон дасто, һежо зылләти дыләдә жијән ә фәғырә балоным! Хыјзоным выло быә, әмма һәфтоғи бардејдәним! Һәфтоғим боәје ки, чымы дыглә балә бесәнәд мандә! Һәмән бәмы гон омә чиј ыме ки, дечәмә кали толышон дасти быә ым ко! И сор ниме ки һәсрәт мандәм бәштә балон дими, нә аз ше зынејдәним чәвон тоно, нәән әвон омејдәнин чымы тоно! Навко ыштә ов-авлоди дими әнҹәх скајпәдә әвиндим, сори ниме ыштә зоон димијән әнҹәх скајпәдә виндејдәм! Јолә гылә 30 синәдәј, рукә гылә 29 синәдә. Дасти сәнәди гыләј вәјә зынејдәним карде боәвон ки, кәши рахс быкәм чәвон вәјәдә, нәвә бывиндым, дештә нәвон һәнәк быкәм, нозә быкәм боәвон! Чымы 61 сини ән јолә дард һежо ыме! Әве һежо вотејдәм ки, ыштәнән зынејдәним, Хыдо бәбахше чымы ым гыно ја не?

            Хәлғи тәрәфо һич нороһат ним, чумчыко Хыдоку бовәм һесте ки, иншаллаһ, рә-ди озод бәбен толышон!

            Сывој ыми һежо сығдыл быәм бәштә дустон, ыштәку чанә тәләбкор быәмбу, дустонкујән жәго тәләбым кардә! Интаси дустонку нороһатәтим ни, умдәвом ки, әвон бәбахшен мыни! Чумчыко әвон ыштәнән чок сәрәсејдән ки, хәлғи озоди роәдә ҹанг кардә одәмон һәддисә зијод ҹидди ијән тәләбкор быәнинин! Ым һәләбәсә ко ни ки, чымыни-ыштәни быкәј ијо, бә ләғләғә пегордыни ым кој! Бы кој умуж быә һар кәс зынәнине ки, һар вахти сәрвахт, сәзукин бе лозиме, чумчыко дышменымон зуманде һәлә! Әве һежо тел быәм бә дустон, һич вахти бахшәмни чәвон ән һырдә хәтонән! Һежо сыхани ростим вотә, һежо дусти гыном бәчәј дим вотә, һич вахти һички думотоно гәпым жәни, ғыјбәтым кардәни! Хыдо шојде бымон һәммәј!

            Фырсәте вотәјнә, ымружнә ружәдә әжо кардејдәм һәм ыштә дустонку, һәм ыштә һәмронку, һәм ыштә танышонку, чәмә ҹәми хәлғику, мыни зынәкәсон һәммәјку: Быбахшән мыни, еһанә гынокоримбу шымә навәдә!

            Ыштә дышменонку веј розим! Һа, һа розим, чочин ныво бәшмә чымы ым сыхан! Чумчыко әвон нијо кардејдәнин ыштә дышменәти!

            Бы вырәдә гыләјән мәсәлә бешејдә бә мијон: Бәс чәмә толышон чокнә, чәвон дыләдән дышменым һесте ја не?

            Һәлбәттә, ниме! Әзыним воте, бәлкәм жәго толышон һестин ки, әвон ыштән дышмен зынејдән мыни бәштә! Ым чәвон ыштә које! Әмма аз һич вахти толышым дышмен зынәни бәштә!

            Интаси чәмә толышон дыләдә кали одәмон һестин ки, ҹурбәҹурә сәбәбон һыҹубәто, һәмән димбәдим не, бә нијони ҹурбәҹурә ду-тәлбисон вотејдән-нывыштејдән бәчымы унвон, шәр ғандејдән бәмы, шајион певыло кардејдән чымы һәхәдә, ајбләкон нојдән бәмы!  Ки әнәзынәтику кардејдәбу ымони, бахшејдәм әвони һәммәј! Әмма ком толышон ки зыне-зыне кардејдән, һич вахти нибәбахшем әвони! Чумчыко әвон дышмен нин, дышменисән јавән! Мерди дышменән мерд быбо, чоке! Номердо нә дуст бенибәше, нә дышмен! Әв һежо номерде ки һесте, жәгоән бә ҹәһәнным васил бәбе! Бәвон вотәјым ыме ки, вәсе анә ноһәхә гәпонон жәј, шәрон ғанде бәмы! Һәјо быкән, ајбе! Һәмән Хыдоку бытарсән, гурәларзә бәштә јод бијән! Хыдо шојде ки, шымә вотәјон һәммәј шәрин, быһтонин! Аз һич вахти шымә вотә мырдолә әмәлон сојб быәним, жыгошән әбыним!

            61 синәдә ән јолә орзум чиче? Ән јолә орзум ыштә хәлғи ијән сәрзәмин Толышстони озод ијән сәбәсож виндеје! Мәвотән ки, ыштә зоон һәхәдә пијо нывыштәјон жыго рә чымы јодо бешин! Не, бешәнин! Интаси ыми зынејдәм ки, чәмә хәлғ ијән сәрзәмин озод быбон, чәмә жәго ишкилонымон һәни нибәбен! Әве, шәв-руж бә Хыдо ловәмандим ки, рәјрә озод быкә чәмә толышә хәлғи ки, әмә бысохтәмон ыштә сәбәсожә Толышстони! Хыдо шојде ки, аз ыштә дасто омә һарчи вахти-вахтәдә кардејдәм ки, чымы хәлғ озод быбу! Һич гылә вәзифә ја тәнхо орзујәдән ним! Бы фани дынјо һич гылә маддијоти тамәм ни! Тамәм иглә бәје ки, Хыдо ғысмәт быкә бәмы, ружон ружони бышум бәштә ди Быләбанд, ыштә умри бәнә мерди сә быжәным ыштә Деғәдә! Бомы чымисә јолә бахтәвәрәти әзыни бе! Ымружнә ружәдә бәмы чәшрушни доә дустон һәммәјку әжом әве ки, мәһз ыми орзу быкән бәмы! Хыдо бәчымы орзу быросны мини! Хыдо шымәни һәммәј быросны бәшмә орзујон! Хыдо бәштә озоди орзу быросны чәмә гирамијә хәлғи! Амин Ја Рәббил-Аләмин!

            Охојәдә ыштә сәғби вотејдәм бы ружәдә бәмы чәшрушни доә дустон һәммәј! Хыдо рози быбу шымәку! Хыдо сәбарз быкә шымәни һәммәј дусти ијән дышмени дыләдә! Амин!

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|