Комэг быкэмон бэ Мэтлэби!

Разделы

Архив

Пн Вт Ср Чт Пт Сб Вс
123
45678910
11121314151617
18192021222324
25262728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 31 голосов)
Изменить размер шрифта Decrease font Enlarge font
image

Комәг быкәмон бә Мәтләби!

 

            Гирамијә толышон! Чо руже хәбә бешә ки, Мәтләбышон гәтә, не, гәтәшонни, дыздијәшоне, чәј вырәј зынәкәс ни! Бы вахти дыләдә һар гылә толыш ијәәндыку гырд фәрғинә сәбәбон нывыштејдә ыштә сәһифәдә. Чә материалонку дыглә мәсәлә мәлум бејдә:  Иминәни, чә одәмон һич гыләјни зынејдәни Мәтләби мәсәлә молјәти. Дыминәни, кали толышонән фырсәт зынејдән ым мәсәлә ки, хол ғәзәнҹ быкән боштә!

            Чиче мәсәлә молјәт? Мәсәлә бымәдәј ки, хәјли вахт чыми бәнав (дырыстә вахти зынејдәним) Мәтләби 20 һәзо долларыш доә Сумгәитәдә бә гыләј ширкәти јоли (јеразе һәмон хонәхо!) ки, кә быһыры боштә кинә. Ә јерази һардәше чәј пул, кәшән доәни.  Мәтләби вотәше ки, Хәрәбоғи ҹанги ветеране, бә мәһкәмә бәдо әвони, бәсте ыштә пули јаанки кәј! Жыго беәдә, јераз тарс-ларз омә бәј ки, “бәдом тыни гәте толыши сепаратисти ғәзинә”! Мәтләб папе быәни бәчәј тарс-ларзи, әвоныш доә бә мәһкәмә. Әвонән, мәвужи, ныштән ратәдә, дәмандән чәј һәхәдә бо материал гырдә карде. Һодисон шемон ыми нишо дојдә ки, јәғын әвон вәс ғәдәрәдә материалышон гырдә кардә ки, дыздијәшоне Мәтләб!

            Чәмә кали толышон вотејдән ки, Мәтләби һәбси ән јолә сәбәб Толыши пәрчәми бы незони Куләтони мијонәдә еһаште быә! Һичи әзыним воте, бәлкәмән жәгобу! Әмма бы вырәдә гыләј парс бешејдә бә мијон: Жыго бывотәмон ки, һежо Мәтләби еһаштәшбе ә пәрчәм, јаанки чәј “дастыш” быә бы коәдә! Быбу, чич вотејдәм! Һәтто Мәтләби кардәшәнбу ым ко, бәвәдә бәпе ҹо һички нәзни, ки кардәше ым! Чымы зынәјку, Мәтләб ыштәнән чок сәрәсејдә ыми, әве чәтин әв бә мәхлоғи ҹәр әкәши ки, “дијәкән, аз чокнә ҹигәмандә зоәм, бы јоли ком гәтә!” Мәтләб бәпе бәзни ки, чич бәбе чыми нәтиҹәдә?  Чумчыко бәј вотәшонехо, тыни һәбс бәкардемон “сепаратисти” ғәзинә. Јәне вотем пијејдә ки, Мәтләб нибәше бә һукмәти одәмон нибәвоте ки, мы кардәме ым ко! Сәкыштә:  Јәне Мәтләб анә әвоме ки, ыштән ыштәни бә отәш еғандејдә? Бовә кардејдәним быми! Әмма ыврәшән һесте ки, чәј кали незә одәмон бәлкәмән хәбәшон быә чә којку! Гыләјән сәкыштә: Һәмон ә “незә одәмон” һежо хәбәшон доә бә һукмәти одәмон! Чымы бә һички ноһәхә шәр ғанде нијәтым ни, чумчыко әмәни һәммәј есә нороһат кардә чиј Мәтләби талеје!

            Бы вырәдә гыләјән мәсәлә бывотым: Аз иминә кәрә кали толышон сәһифонәдә виндеәдә Куләтонәдә еһаштә быә пәрчәми шикили, һандыме әјо нывыштә быә шәрһон. Һежо бәвәдән ыштән-бәштә вотыме ки, ым бәдбәхтон ја әнәзынәтику, ја зыне-зыне ыштән вотејдән ки, ки еһаштәше ә пәрчәм Куләтонәдә! Ым материали һандәкәсон зәһмәт быкәшын, и кәрән баһандын ә шәрһон, бәвәдә ыштән бовәманд бәбен бәчымы вотәјон!

            Ҹо сәбәбонән вотәкәсон һестин, әмма чәвон һәхәдә нывыште зијодә ко һисоб кардејдәм. Чәј вырәдә кали сыханон нывыштејдәм чә толышон һәхәдә ки, әвон тадибәсә быән бо Мәтләби “гәрдәни кәше”! Мәсәлә бымәдәј ки, бы чо ружи дыләдә, һәлә ҹо-ҹо толышон вотејдәним, кали толышә сохтемонон јолон бәјонотышон доә Мәтләби һәхәдә.  Интаси аз сәрәсејдәним ки, демијән әвон мыдофиә кардешон пијејдә Мәтләби, ја тикәјән гон кардејдән чәј кој? Бочи вотејдәм “гон кардејдән”? Чумчыко ым одәмон һәм чы мәсәлә молјәти зынејдәнин, һәмән хәбәшонән ни ки, де кон һуғуғи проседурон комәги мыдофиә бәбе карде Мәтләби? Жыго мәлум бејдә ки, чәвон пијәј әве ки, толышон бывотын ки, “һа, ымон чокә зоән, толыши гәрдәни кәшејдән”! Һич ғәләт кардәкәс нин, дештә пучә бәјонотон тикәјән әсос дојдән бә Мәтләби дышменон ки, быдә әвон бывотын бәј ки, ты һәғиғәтән толышә сепаратистиш!

            Бәс чич карде лозиме бо Мәтләби? Иминә нубәдә лозиме гыләј вәкил гәте. Вәкил рәсми одәме, әв бәзне умуте ки, Мәтләби конҹо огәтејдән? Һукмәти идорон бә ади одәмон ҹәвоб ныдонән, мәҹбурин ки, бә вәкили ҹәвоб быдән. Дыминәни, Мәтләби гыләј незә авлод шәнине Бокујәдә гыләј һәхи гәрдәнкәши (правозащитник; Елдар Зејналов быбо, чок бәбе!) тоно, де әризә овардәнине бәј ки, бәс һоли-ғәзијә жыгоје! Әвән ым мәсәлә певыло бәкарде бә Авропә ијән бејнәлхәлғ тәшкилотон, чәвон Бокујәдә быә офисон тәләбномә бәвғанден бә һукмәти ки, әв бывоты бәвон Мәтләби вырәј, һәмән чәј гәте сәбәби! Бә бәјонот доәкәсонән мәслоһатым ыме ки, һәғиғәтән комәгышон карде пијејдәбу бә Мәтләби, чәсбони ыштә зувышкә пули гырдә быкән, бывғандын бә Боку ки, чәј авлодон әј быдән бә вәкили, вәкилән ко быкә!

            Һәмән и кәс быдә бышу бә Хәрәбоғи ҹанги ветеранон тәшкилот, һај-ку рост быкә ки, бәс бочи шымә ыштә сәдо бекардејдәнишон?

            Ым мәсәлон карде бәпештә әмә бәзнемон ки, вәомәдә һәни чичон карде лозиме?

 

 

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|