Тыным пидэ...

Тыным пидә...

Хилгәт

Бәтым вотәмбе дын гәви, тыным пидә, тыным пидә,

Дылым зомин бә бын гәпи, тыным пидә, тыным пидә.

Гиринҹим ышты дардику, че һәсрәтонку, сардику,
Ҹоным сидә, ки зындә ки, тыным пидә, тыным пидә.

Зуманде ешгым әглисән, пемандәним бә һич вонә,

Гирәм быбу ды дынјо и , тыным пидә, тыным пидә.

Быныштәмон га чәшбәчәш, быгардәмон га кәшбәкәш,

Бывот тынән, быгәт бә ги “тыным пидә, тыным пидә”.

Ғәсәм быбу бә һар шәвон мижәм ноәмни јәндисә,

Бә чәш чидә сывој ты ки, тыным пидә, тыным пидә.

Һәшиш ты, Овшумиш чымы, ијән нијош ты чан руже,

Һаканә бој, бә чәш бычи, тыным пидә, тыным пидә.

Гәв ожникардә ашиғон, Хыдо чәвон сәдош мәсә

Ты  Хилгәти мәгәт бә жи, тыным пидә, тыным пидә.