КЭJНЭ БЭБЕ ?!

Разделы

Архив

Пн Вт Ср Чт Пт Сб Вс
123
45678910
11121314151617
18192021222324
25262728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 141 голосов)
Изменить размер шрифта Decrease font Enlarge font
image

 
 

 

 

 

 

КӘЈНӘ БӘБЕ ?!

 

 

 

ӘЛИ НАСИР

 

 

 

 

1

Мандәм бәсә бандон, дијә кардәм бы мәһоли,

Һавзә халије, холчәје һар овдонә, һар ди.

Рост вотдә ки, вәјшт вотдәбу бы ҹаһи-ҹәлоли,

Веј дамедә бәј Каспику рост бә һәши зарди.

 

Әфсус ки, чы вәјшти ғыбо бә хыртә дәмандә,

Былбыл боки һандә, чы вылон аршијә тишә.

Жобзын бәһе рост бә рәғо кужкаги сәмандә,

Жобзын ки, овәјз кандә гыләј вызмә дој ришә.

 

Каспи де ләпон шыштә әчәј довнә, әчәј по,

Һа суб жедә бәј шығә, әви кардедә оғо.

Виндә әчәј ым һоли, ужән әв бедә ғәмгин,

Һејһот ки, хывандыш, һәлә сојбыш ни чы јурди.

Аз чокнә быбум шо, охо сојбеш ни чы јурди,

Пур бе де хуни дыл, чашоным арсәдә гин бин.

 

2

Пур бе де хуни дыл, чашоным арсәдә гин бин,

Бәј һар ки бәфош кај, бо бәфоманди бәфош ни.

Шәв кардәкәсон чәј ружи әммо бәјо шин бин,

Чәј дарди быкәш авлодиро сејри-сәфош ни.

 

Зымсон бедә чәј һавзә шәјә вишон опотдән,

Ни иглә гылә тум ежә, до кашдәкәсиш ни.

Ҹо-ҹо зывонондә бәјәнды хәј-дыво вотдән,

Һич бәштә зывони хәјәво дој һәвәсиш ни.

 

Веј кәс вотедә бәштә вәтәнпәрвәре ғәсто,

Сојб бештәни һич кәс, ғәбонән бештә чы дасто.

Һаглә боғи боғвон ныбо виронә бәманде.

Озод ныбо инсон, вәтәныш зиндоне, зиндон,

Һар дардисә јурди, вәтәни, милләти дард гон,

Чичкәм, охо дардым һәмә дардонсә зуманде.

 

3

Чичкәм, охо дардым һәмә дардонсә зуманде,
Чичкәм, охо жидәм, охо виндәм, охо мәстәм.

Веј мушгуле мијон овәјзи ҹојли пеманде,

Ым дарди-овәјзе, охо ым дардәдә тәстәм.

 

Һар милләти ыштән зывон һесте, вәтән һесте,

Һар кижә, пәрәндә пәрејро ыштә чимәнго.

Руф нибо әгәр, инсони ҹон астәје, пуште,

Фани ә кәсе, дынјо моли гәтдә дывәнго.

 

Дышмен һәмишә чы Толыши хышмику ларзә,

Чы Мирһәсәни, чы Һәзику, Бојлику тарсә.

Виндон Толыши ришә кије, мәрдә бобон кин?

Чы Атропати мандә бинон ҹон додә, ох ҹон!..

Ја Рәбб, бәмә имдод быдә, вирон бедә Шиндон,

Јол-јолә бобон барзә ғәлон зири-зәмин бин.

 

4

Јол-јолә бобон барзә ғәлон зири-зәмин бин,

Ым марз ки ежә, бәс ә “Гулистон” ки нывыштә?

Ҹо-ҹо нәбимон, иҹо әжимон әмә шин-шин,

Ә марзи теғон ештә бә чаш, дард дыли бышдә.

 

Боғсон поә, боғон поә, бандон поә бандин,

Сәрһәд вәтәни синә сәпе зәһринә шымши.

Ҹош карде боон әј, һовонән бе һовә мандин,

Ҹош карде чы шој-шојку әмә ғәһринә шымши.

 

И Осторо, и Биләсәвә ды бе чә ружонку,

Рост бе бә һәво һәсрәти аһ де чә ружонку,

Ым дешменәти бә Толышон тарихи ғәсте.

Чы марзи сәпе мандә дијон рузгори ғанде,

Бесојбә кәон һәммә гинин, иглә ныманде,

Ја мандәбујән һарчи, әвән шырте, шыкәсте.

 

5

Ја мандәбујән һарчи, әвән шырте, шыкәсте,

Жинтон һәлә чы фарсә боон мандә жимышти.

Пентон һәлә турконро гыләј мәғмунә дусте,

Ајбе Толышон ҹо кәси вишмандә бытышти.

 

Һәштпәрдә кыве чы Толыши Ҹәнгәли Мирзә?

Ланкондә кыве Зулфиғарон, Бегәғон ымруж?

Аз һәх вотедәм, кардедә рышхәнд бәмы һәрзә,

Бәле, бәнинин рост Толыши бојдәғон ымруж.

 

Боштә һәхиро морә-мәвуш, мели бә ҹанге,

Аз вотјәдә вәсе дузәфырсә, вәсе ланге-

Вотдән бәмы га камсәбырим, һовсәләтангим.

Вотдәм офәјән канә ғәлон, милләти әғлон,

Вотдәм “Кујәзинги нәғыле” ымружи нәғлон,

Мандәм ә рынә мандә ғәлон сәјсә бә вангим.

 

6

Мандәм ә рынә мандә ғәлон сәјсә бә вангим,

Кандәм ғәби бо тарсәжорон, сипјәҹидон аз.

Чы милләти фик-фами бо тиж кардеро сангим,

Вәсе һәни мәғмунәти, вәсе һәни тарс-ларз!

 

“Овәјзи” бәнав чы Толыши рәғ-ришон һесте,

Әв Нуһи зоә Јафәсику мандә Мадаје.

“Овәјзисә” пи амбурә, нилә вишон һесте,

Мандә чы “Овәјзи” чә тоно, Һәгги бә һаје.

 

Зәрдуштә бобо рушнә “Авестә” шымә һәгге,

Бој сојб бешәнән, әв шымәку кардә тәвәгге,

Әв бошмәро фәхре, охо әв бошмәро шәсте.

Һа “вәсе” бывот бә вәши, лошғорди, ләвәјни,

Һәммәјсә ыме товнијә чи, тели, тәвәјни,

Милләт һәлә пур кардә ләвә, һанведә, мәсте.

 

7

Милләт һәлә пур кардә ләвә, һанведә, мәсте,

Вотдәм бәни бә, вәсе һәни, Һәгги бывиндән.

Тобә быкәнән жо бызынән ружи-әләсте,

Ғырјәт быкәнән јурди ә нимшәгги бывиндән.

 

Јурди һәлолә немәти нисјон бочи кардон?

Мол чардедәбу шыт додә, әммо шымә чич ка?

Мәрдон дыли, мердон ҹигәри хун бочи кардон?

Виндәше шымә ҹо, вәтәно веј зоә куч ка.

 

Бәс кејнә бәбе, боштә һәхи рост бәбејон бәс?

Лынгон жијәдә мандәбу анги, әдәни рәз.

Муз муз вотедә бәштә, бызанг вотдә бызангим.

Мәрд ыштә сони хәлгиро, бо јурдиро нојдә,

Вотдән әмәнән һестимон, әммо ки, чы фојдә,

Чанд муддәте де дышмени аз тәһно бә ҹангим.

 

8

Чанд муддәте де дышмени аз тәһно бә ҹангим,

Әв бәштә әгәр вотдәбу тырк, һиччи хәтош ни.

Аз бәштә Толыш вотдәбум әв вотдә ки “ҹаним”,

Әв вотдә хоше, аз вотедәм, бәс бочи хош ни?..

 

Жәјдән бә гыләј мерди лузи мырхути, мышти,

Әв жәјдә ҹурә:-Вај, чымы пешт!  Парседән:-Еј шәхс,

Мышт бәшты ләвә гындә, ты вотдәш ки бә пешти?..

-Пештым быбу,-вотдә- мыни ки жәј бәне, һич кәс!

 

Го мәстә го бурә, шедә һәлбәт ки бә бурә,

Хуг бештәни чы жедәбум чанәдә ҹурә,

Боғ бештә чы дас, вај, хуги зај кардә доним вај!

Һар дон до бәбе, сојбиш әгәр һесте һа боғи,

Виндәм егәтә ымру чәмә боғи һәлоғи,

Жәјдәм ҹурә, жәјдәм зикә, ва-вај, вәтәным вај!

 

9

Жәјдәм ҹурә, жәјдәм зикә, ва-вај, вәтәным вај!

Чы милләти авлод һәләән мәзлуми-заре.

Аз ыштә ҹоним бо вәтәни бырәжәным кај,

Әв виндәм һәлә дәстыгире, согнәдә харе.

 

Даим әбыни һич кәсиро һич кәси соғнә,

Јаинки быбу, ә вырә зиндон бәбе, зиндон.

Һар каги жијо кижә бәбе һар каги моғнә,

Каг-кижә нимон ки, әмә инсонимон, инсон.

 

Һесте кәчәли чарә, әгәр һесте әчәј сә,

Ки жәшбу мори, тарсәжо бә, рыштәни тарсә.

Ду вотдәбу даим жы кәси, ки бәдо бә һај?

Аз ростәвотим, аз дујәвож бә гәләвон ним,

Милләт бәвоте кәјнә охо бәштә ки, аз ким?

Га кырди нывыштәм, жедәм аз га бәјо лај-лај.

 

10

Га кырди нывыштәм, жедәм аз га бәјо лај-лај.

Чан вахте һәши нав бәмәро овшуми бастә.

Авон Толыши осмонәдә пардә жә лај-лај,

Чан вахте ки, пос вардә чәхо, ныштә бә астә.

 

Дарзән бебәкарде теғи, вотдән, позиән поз,

Милләт ибыно зу быжәно, банд пебәгарде.

Сојбиш ныбу чә јурди, бәји веј бәбе ханбоз,

Јурд мардәбу, чәј сојбән әчәјсә рә бәмарде.

 

Тарих чы бобон мәрдәти, мәрдонәти дәрсе,

Ғырјәт кәше, јурданәти, мерданәти дәрсе,

Нодон бәбе һандәшныбу әј кон гылә авлод,

Ноҹинсә бызангон гәтедән кандулә шони,

Бо кандулә сојби лонәдә бәс вырә ҹо ни?

Кардәм дијә бә Атропати милләти мот-мот.

 

11

Кардәм дијә бә Атропати милләти мот-мот,

Ым әвбу, Хыдо әв ныбу, бәс әв кыве, ым киј?

Ки ыштә бобон овдонә ыштә бәка бәрбод?

Тарих бәмәро мәрдә бобон кыл ныбә шымшиј.

 

Каспи әве, Кадусе, Геле, Һырконе тарих,

Әв Сәјд Хәлифәј, әв Бобогил, әв Бобо Рәһмон.

Кандул вәтәни ангвини пур бә шоне тарих,

Авлод вәтәни тарихи бызно, бәбе сәһмон.

 

Бештәм бә Бызәј-тарихи сәрловһәје жобзын,

Виндедәм кочон-Адәми ыштән кәје жобзын,

Тарих бы зәминдә чамәвуш ка, ијо јол бә.

Чы Барзәву Бобок нәрә кәштә, дијә кардә,

Бандон сәдо дојдән, әмо милләт хијә кардә,

Ын милләт ә милләтбу әгәр, бәс бочи лол бә?

 

12

Ын милләт ә милләтбу әгәр, бәс бочи лол бә?

Ғыјзин бедә, ғыјзин Вазәру кардедә усјон.

Ым Каспи, Толыш бә, Вәшәпос бә, охо Гел бә,

Веј дышмени астәш һорә әј де овә осјон.

 

Ах Мәдо Толыш, конҹој ысәтнә Гауматон?

Ҹон боштә сәјо чарә ныко, бе сә бәманде.

Дон кардә зәмин тар ныбо, појмол бәбе һар дон,

Рәһбәр һәмишә дештә ели, хәлги зуманде.

 

Ымруж бәты ужнән ҹомәһолыж бедә рәһбәр,

Ымруд тыни гординдә ужән чәмбыжә чәмбәр.

Чаш виндә тыни, ғәһрәдә дыл пош бә, беһол бә.

Кәш-пор окә, бој сојб беши ты бәштә мәһоли,

Ышты вәтән охшәш додә бә чыо ғәзә чоли,

Сојбыш кыве, ым вәјшт жыго бесојбә мәһол бә?

 

13

Сојбыш кыве, ым вәјшт жыго бесојбә мәһол бә?

Ну-ну перәсон то ниш охо ты, чымы милләт.

Ты до бејәдә, вејни чәвон тоғә бә, хол бә,

Вәсе һәни дард, ғәм-ғыбо, вәсе һәни зилләт.

 

Ты бәш бы мәкондә бәшәри халиси, ари,

Мәдон леси бән ышты бобон, сурфәшон ож бә.

Нәһләт быбу бә нокәси, бә мәрдымәзари,

Бә һар кәси кардәшбу бовә, һәммә дувож бә.

 

Виндәш ки ғонәғ вотдә ғонәғ бәштә кәсојби,

Виндәш ки һәромзодә ајиб зындәни ајби.

Һушјар быби, аҹиз мәби, еј милләти авлод.

Еј јурди әғыл, бәшт сәпо, бә шаири гушдә,

Гушонку еһашт ым сыханон ты бәнә гушвә.

Бәс кәјнә бәбе ым рынә мандәј, бәбе обод?

 

14

Бәс кәјнә бәбе ым рынә мандәј, бәбе оһод?

Бәс кәјнә бобон мандә ғәлон бәрпо бәкарде?

Бәс кәјнә бы јурди һоли милләт бәка имдод?

Бәс кәјнә әчәј озоди, чәј ном обәгарде?

 

Ше-ше, дијә кардәм, нимә мардә, нимә гардә,

Сәрвәтдори ғырјәт ни, чы ғырјәтдори сәрвәт.

Ше-ше, дијә кардәм, зывони јоддә бекардә,

Ја вотдәбу, вотдә есә де пыч-пычи, хәлвәт.

 

Ым боғ охо чы былбылон һандә вылә боғ бә,

Кон тум егынә, сәјку бә по теғ бә, һәлоғ бә?

Ым тарсәжорә нәслыш охо ком моә зандә?

Хәзри дәмадәм вардә авон овшумә шәвдә,

Бы зылмотәдә бо гыләво, бо һәши нәвдәм.

Ја Рәбб, ужәнән ғәм-ғыбо бә хыртә дәманде.

 

15

Ја Рәбб, ужәнән ғәм-ғыбо бә хыртә дәманде,

Пур бе де хуни дыл, чашоным арсәдә гинбин.

Чичкәм, охо дардым һәмә дардонсә зуманде,

Јол-јолә бобон барзә ғәлон зири-зәмин бин.

 

Ја мандәбујән һарчи, әвән шырте, шыкәсте,

Мандәм ә рынә мандә ғәлон сәјсә бә вангим.

Милләт һәлә пур кардә ләвә, һанведә, мәсте,

Чанд муддәте де дышмени аз тәһно бо ҹангим.

 

Жәјдәм ҹурә, жәјдәм зикә:-Вај-вај, Вәтәним вај!

Ја кырди нывыштәм, жедәм аз га бәјо лај-лај,

Кардәм дијә бә Атропати милти мот-мот.

Ым милләт ә милләтбу әгәр, бәс бочи лол бә?

Сојбыш кыве, ым вәјшт жыго бесојбә мәһол бә?

Бәс кәјнә бәбе ым рынә мандәј, бәбе обод ?

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|