ДЕ АВЛОДИ КЭ-БЭСО МЭБИШ

ДЕ АВЛОДИ КӘ-БӘСО МӘБИШ…

Бәһмән Салеһ

            Һа руж маштәво Мерзо Нәсир бә кәфшән дәәроми ыштә кәјбә мол-мәлә. Ымруж молон бәлето бекардеәдә раст омәј бә халәзоә Нозәғоли. Һәмро бин дејәнды. Арәдә Мерзо Нәсир парсәј Нозәғолику:

            -Бәты чокнә дијә кардејдә чымы халәвәју? Мәсәме ышты әһволот, чоко бе лынгы арыште?

            -Зә, чымы һоли ысәти хәбә сәјдәш? И манге јонгоәдәм.
            Чәјо де рышхәнди вотыше:

            -Бочи, ысәт һолымән чоке, чымы ыштә дајкинәј кәхывандым, бәмы чокән дијә кардејдә. Ысәт лынгымән чок быә, виндәш ки, чамејдәм, дожән нише. Бәнә ты ним ки, кәхыванды јади кинәј, дијә кардәкәсы ни. И кәрә дијәкә бәштә, лырди дыләдәш. Ышты һол чок әбыни.

            Мерзо Нәсири лынгыш даһаште, едјәсәј бә халәзоә, фамәј ки, ын сыханон рыкику вотејдә. Вотыше:

            -Зә, Нозәғоли, бәнә кыты ыштә пешти жәјдәниш бә зәмин. Жыго зынејдәш хәбә ниме ышты әһволотику?

            -Бәмы чич быә ки? Шанго тојкијәдә поплынгәо евојәдә гыним, лынгым аршијәј. Бә һар кәси сә омә чије…

            -Зә, бәмы нејәни! Шанго бә со ешеәдә ышты дајкинә ныпыртынише ты поплынгәо? Кәшы-почә һырды-һу ныбин? Ләвә-рујә хунычырк ныбин?

            -Ду вотејдән! Кон сыпә зоә певыло кардәше ын хәбә?! Ты шанго бә со ешеәдә жен ышты кәши гәтејдә?

            -Кәшијән гәтејдә, поплынгәо бә соән евардејдә, һәни бәнә ышты дајкинә мыны пыртынејдәни ки, гули-гули быбум поплынгәо! Ысәт дијә быкә, әв ышты дајкинә, ым јади кинә! Ком чоке? Бәштә авлодонымән вәсјәт кардә ки, дештә авлоди кә-бәсо мәбишон. Чәтон пегәтеәдә, охој дајкинә хуныш и, геныш и, әвән һовә һисоб бејдә. Жәгој, жәго ни?

            Нозәғоли бә фик шәбе, ныбеше фик бә Нозәғоли. Чич вотәнинбе охо?!..