АJ ЧЫМЫ ДУСТ !

 

 

 

 

 

 

АЈ  ЧЫМЫ  ДУСТ

 

 

 

Әбдулрза

 

 

 

Гуш быдә, аз ботыно гәп быжәном, ај чымы дуст,

Чымы вотә сыханондә һесте ве хәј, чымы дуст.

 

Дустәти ыглә гәвәдә де воте сә бедәни,

Дусти вотәј бымәсо дуст, бәвотем бәј чымы дуст.

 

Дуст бәбен һежо дејәнды чанәшон умр һесте,

Бымәсо ым дуст гирәм чә дусти вотәј, чымы дуст.

 

Хош бә сәбр быкә һоли, бәпеје сәбри сәвоб,

Әбыни дој рыкно бејәдә чокә рај, чымы дуст.

 

Ве бәсә рыкисә манде бә Хыдо хош номә кој,

Рык ныкош, жыго бызын, вәјшт һыријәј, сәј, чымы дуст.

 

Бәд мәби дә одәмон ки, һежо дуст бәш ты дәвон,

Шодә бәдәти бә кәно, дәмәчык чәј, чымы дуст.

 

Веј одәм гәп жедә, бемәно сыхан вардә бә гәв,

Бымәсош, рәјрә быбыр чә сыханон вәј, чымы дуст.

 

Мәкә әјшт-нышт дә одәми, һәдәрә гәп ве жедә,

Һәдәрә гәп жәкәси, вотдән һәјвәрәј, чымы дуст.

 

Пәхыле, ҹо кәси ғыјбәт быкәј, мәчам ты дәвон,

Бывит че шәр бығандику, мәнәв ты дәј, чымы дуст.

 

Дусти вотәј бо дусти чок бәбе, бевәҹ әбыни,

Һесте Әбдулрза дыләдә боты пијәј, чымы дуст.