Толыш киjе ?

 

 

Толыш кије?

(Ысәтән чы Толыши дастони окәм)

ӘЛИ НАСИР
“Гонә шәлә” поемаку и поә

***

Чы Тәнбурә, Лејнә сәдо,

Чәмә зинә, пәјнә сәдо.

 

Бабәки хуни ранге әв,

Чы Шых Заһиди ванге әв.

Даји Толыши һанге әв,

Дәдә Толыши ҹанге әв.

Толыши хан Сијолије,

Әв Мирһәсәнә болије.

 

Әв чы Толыши јолије,

Мирзә Кучәг Ҹангәлије.

Шаверәне, Зулфығаре,

Бегәғә дарды- ғобаре.

Чы Һәзи рәғ-ришә сәдој,

Барзәсә Толыши нидој.

 

Тәнбурәжән, һынә быкә,

Чы Тәнбурә сәдо бекә.

 

Дынјо ужән овәјз тәко,

Нуһ бә ов кәминә беко.

Овәјзи дә сәдо быншанд,

Гәми быкә бә вырә банд.

Нуһи евә бә Барзә банд,

Мадај быкә ијо хванд.

Толыши бынә бә јод бијә,

Гырдә быбәмон бә кијә.

Туләсоон бандон вишәдә,

Мадај бынышдо бәшәдә.

Чы Кураку бә Сыпијәру-

Бымәсо ым сәдо ымру.

 

Ә сәдо Зәрвони зәре,

Әв Чы Һу рушнә нәзәре.

Әв Јафәси Мадај кәре,

Әв Ибрәми пә Азәре.

Әв Толышон Бобо һаје,

Толышон Додо лајлаје.

 

***

Һытә милләт оғо быбу,

Һа дон һавзә тоғә быбу.

Ды шинә-шәкә авази,

Зывон око Әли Насир…

 

***

-Ијо, шаир, огард ләзи,

Бә Әвдәмә-Ијомә нези,

Пу быкә тарыхи гарди.

Бә дәвардон шодә парди,

Дынјо бызно Толыш кије?

Дынјо бызно әв бәжије.

Оғо быкә сијо чохо,

Јолон жыго вотә охо:

“Һа милләт Һәхи ро бәше,

                             Хыдо бәј хәјәво бәже!”