БЭ ХЫДО ГУЛЛЭЭFАНДОН

БӘ ХЫДО ГУЛЛӘӘҒАНДОН

Бәһмән Салеһ

            Мәҹлисәдә гыләј иғтысодәвон гәп жәјдәбе һукмәти сијосәтику:

            -Гирәм һукмәт әмтәәон һырије-һәвате ғыјмәтонән рост кардејдәбу зәһмәтә һәхон ве кардеәдә, жыго сијосәт ҹәмати бә даст дәғандеје. Фәғәт, чәмә мәмләкәтәдә тиҹорәт чы һукмәти ыштәније, бәмәку ғыјмәтон вахт-бевахт бә жи еғандә, зәһмәтә һәхон, есә бој, рост бејдән. Әве бәмәку бә даст дәғанде ни, әһали вәзјәтән ше-ше чок бејдә…

            Сыхани бын вырәдә Нәсрәддин миәллими репликә ғандыше:

            -Зә, бәј гуш мәдән, әв бә Хыдо гуллә ғандәкәсонәдәј.бә Хыдо гулә вығандәкәс һурмәт онибәгәте бо һукмәти!

            Одәмон сырә гәтышоне, дамә бәкәсән бе:

            -Бә Хыдоән гуллә ғанде бәбе?

            Нәсрәддин миәллими виндыше мәҹлис ашиш мандә, чәш кардејдә әј, гыләј сыпнә жәј бәпештә бә пәпрузи, вотыше:

            -Атәмә дијәдә быә һодисәј. Шази нәнә нохәшебән. Зооныш, бооныш, незә ов-авлод гардејдәнбән чәј гырдокәно. Һәкимон думојәнды омејдән-шејдән, чорә карде пијејдәшоне ки, нәнә нымардо. Нәнә чок бе зынејдәни ки, зынејдәни.

            Ыштә сәј гин кардә зооныш чанг дәнојдән бә ијәнды, вотејдән:

            -Хыдо офәјәше, Хыдоән кыштејдә, чич карде бәзнемон?!

            Хунбәсә зоон парсејдән ҹәматику:

            -Хыдо конҹој, быторсынәмон әј, быдә ныгыно бәчәмә нәнә!

            Ыштә һәјо-һурмәти чәш кардә одәмон зевылә сырәј кардејдән. Чәвонәдә гыләјни вотејдә:

-Хыдо әве осмонәдәј.

            Зоон пегәтејдән ыштә тифангон бешедән бә би, лулә дојдән бәди осмони, һар ды-се пәтрон ғандејдән, пешо вотејдән:

            -Һынә һесте, быкышт чәмә нәнә, буни чичон бәвардемон бәшты сә!

            Бы дәмәдә хәбә омејдә ки, бәс нәнә аспардыше. Зоон едјәсејдән бә ијәнды, кафторә жәјдән бәштә сә, вотејдән:

            -Ым гурбәгур беәјән әмардијбән, Хыдоән бәд кардымоне дештә!

            Чә вахтику жыго Атәмә дијовыжон гыләјни чәпә гәп жәјәдә, ја чәпә ко кардеәдә, бәј вотејдән:

            -Коон ныбу, сә мәгәтән, бә Хыдо гулә ғандәкәсонәдәј!

Мәҹлисәдә быәкәсон сырәјн, иғтысодәвони кәшәше хәҹоләт…