ДЫНJО

 

Рза Мусајев  

 

Сорон сорон тожнедән,

Сорон мыни дожнедән.

Сорон одәм выжнедән,

Һежо бә ҹанге дынјо.

 

Омәјм рәсәјм бә пенҹо,

Һәшто конҹо, са конҹо ?!

Умур гыләј кәмәнҹо,

Дон һорә динге дынјо.

 

Жәјдә бә зардә сими,

Нывышким бәчәј дими.
Дәнывыжим аз быми:
Бомыно танге дынјо.

 

Димыш дарде, озојбән,

Димыш хәто, ғәзојбән,

Димыш са ни, һәзојбән!

Сә бә по ранге дынјо.

 

Бәј фәрг ни, алим, нодон,

Һәхи бывот, ја быһтон.

Ышты умри, һа инсон,

Ерызнијә санге дынјо.

 

Бә умри ни еһтибо,

Жимон гыләј гонә бо.

Кәјбон ожин тобәто,

Мыни бә ванге дынјо.

 

Һардәм ыштә әмәли,

Умум гырд быә гәдәли.

Чәш кардедәм әҹәли,-

Бәмы бә занге дынјо.