УРИНПЕШТИ ГУРЭН СЭРОСТ ЭКЭНИ

УРИНПЕШТИ ГУРӘН СӘРОСТ ӘКӘНИ

Бәһмән Салеһ

-Мерзо Нәсир, Сәрпуш миәллим рәмејдә ыштыку. Тыни виндејдә, рој гордынејдә. Мәҹлисәдә дијәро ныштејдә ыштыку. Бәты нез мандејдәни, деты бә и машин ныштејдәни. Сәлом ни, кәлом ни. Шымә һамсијәшон, канә дустишон, хышәвандишон. Чич быә ки ? – Һәмронәдә гыләјни ружи жыго парсәј Мерзо Нәсирику.

            Мерзо Нәсир дамә ныбә, чәј палијо ныштә чоглә һәмро вотышоне бә и гәв:

            -Зә, Сәрпуш гыләј пијанскә, Мерзо ныможбывот! Жәләвони сәлом-кәлом ғәниме бәчәј ыштәни!

                        -Не, аз чок зынејдәм ки, Мерзо Нәсири ве быәше деәј зәһмәт. Чәјән, чәј кәхывандијән устод быә, чанд сор Мерзо Нәсири кәј ше-омә кардәшоне, бә алијә мәктәб һозы быән, бепул-бетәмәнно. Тәләбә беәдә, бә ко дәшеәдә, вәјә кардеәдә, һырдәнон сыннәт беәдә, - һар коәдә Мерзо Нәсир навәдә шә, шыкыријә чәвон думо. Һәмән дештә ҹифи, дештә харҹи.

            -Бәс чич бе ки, әв бәд бе де Мерзо Нәсири?

                        -Дыглә чијку демы бәд быә: гыләј әве ки, ирод гәтәме бәј ки, пешоме бәј зијоне, хәробе чәј сијо ҹигәр; дыминәни әве ки, бәмы пул ғарзхој, димыш дәжејдә, бәчымы һузур бешејдәни, - Мерзо Нәсири охој вотыше сәбәб: - Бо манә нәвејдәјбән. Ружәмобе. “Раф”әдә ныштәбимон, бәнем Сәрпуш пеше бә автобус, гырд лул-гәмбәрбе. Омәј ныште чымы палијо, дәманде бо һәтәрән-пәтәрән гәп жәј. Хәто бе вотыме ки, ајбе, ҹәмат тыни миәллим-устод зынејдә, хыјзонсојбиш, нәвәсојбиш. Бәштә һурмәт кардејдәниш, бә хәлғи дијәкә. Хәлғ бә ружәј, азизә ружонин, һәјо быбу, әғыдә быбу, мысылмониш!

            Ыштобән бә вонәә бандебән. Гәвыш обәј, чич обәј! Дандони бынәдә чич һестышбе, вотыше:

            -Ты, - дәманде, - бәмы тикәј пулы доә, сәј зынејдәниш, зә, ышты ғарзи бәдомәни!

                        -Уринпешти гур сәрост бәкарде, - һәмронәдә гыләј аһ кәшәше. Ҹо һәмро дамә бе:

            -Зә, Сәрпуши гурән сәрост әкәни!