ЛАРЗЕДЭ БУМ ЭВ ШЕЭДЭ

ЛАРЗЕДӘ БУМ ӘВ ШЕӘДӘ
(Пироныжику бә Деғыжә Болим 60 сини)

ӘЛИ НАСИР

Чәмә һампон дыләдә Барзәболо, Ғурбинә, Мәрданә Болим,
Зәмини, осмони, һәм сырри-сәмовати әзын, алимә фәрзанә Болим.

Ҹо бе бандонку гыләј Банд ә бандон нывә бен чәј поәдә,
Рәғи-ришәж зәмини нәғ-нығыли деј бынәдәј, сәж де чы авон пеәдә,
Душисәж милләти, хәлғи, вәтәни ғонә шәлә, ларзедә бум әв шеәдә,
Бовтедә озодәти пәрчәми, һимни, холисә, еһаштәже һанә, Болим,
Зәмини, осмони, һәм сырри-сәмовати әзын, алимә фәрзанә Болим.

Милләти сәј вәри сә, чы һәхи пәрвәр, навәшә Нәр, Сәошанде, јолә Мерде,
Әв гыләј барзә Бәлел ки холоныж һар гылә чы астовәон мијонәдә парде,
Әв Сәрост кардә кәсе, сәж ки ерохно, әј бывиндо ни бә чи дардини дарде,
Ҹо кәсон соғнәдә ки мандәбу бәј мард вотедә, жәјдә бәвон танә, Болим,
Зәмини, осмони, һәм сырри-сәмовати әзын, алимә фәрзанә Болим.

Әв чәмә фәхро-фәхарәт, чәмә иззәтво-шәрафәт, чәмә ном, ҹоне, ҹәне,
Әв чәмә мәрдәти тимсал, чәмә һәгганәти әмсал, чәмә һурри ожәне,
Әв чәмә гәп жә зывон, әв олывон, әв быловон, тарифо, тојмәт әжәне,
Һар гәпыж, һар кәлимәж, һикмәто-зәр, гоһәро-дурданә, Болим,
Зәмини, осмони, һәм сырри-сәмовати әзын, алимә фәрзанә Болим.

Әв Пәләнге Толыши, јарә жедән бәј де коли, кол бә кәсон, камдәрәсон,
Бәчәј һа нәрә сәдо ҹәм зузедән чы делә ваги ијо мандә вәрәсон,
Бәпе милләт әви тәнһо ваныдо де хонәхон, де сәдә сәј вагпәрәсон,
Сәдо кардә бә и бе, һар ки вәтәнпәрвәре мерданә, Болим,
Зәмини, осмони, һәм сырри-сәмовати әзын, алимә фәрзанә Болим.

Умдәвом ки бәваж озоди бә Һур Бабәки бандон, Быләбанди Јоләбанд,
Чәшбәрон мандә боты, хасә Лисар, барзә Һисар, бој, Быләбанди Јоләбанд,
Бој дәжән Пәрчәми бә Вазә ғәлә, бә шинә Шиндан, Быләбанди Јоләбанд,
Быжи 100 сор Әбоси Фәрмони Фәхрәддинә сон, Ханә Болим,
Зәмини, осмони, һәм сырри-сәмовати әзын, алимә фәрзанә Болим.