ШОР ЕСЭ

 

 

 

 

ШОР ЕСӘ

 

 

Рза Мусајев 

Бевәҹ омејдә сорисә сор ысә,

Мыв һардә мерд, һардедәниш шор есә.

 

Чоко бә һышк гыне чәмә се, Мырдов,

Чы бәлоку бә әрш бешә чолон ов.

Ын ки карде? Быныштәмон бәчәј лов!

Чә вахти сәһвон омејдән зор есә,

Бевәҹ омејдә сорисә сор есә.

 

Чы вишә и лынг чәмә дијәдәбе.

Хәј-бәрәкәт дизәдә бе, кијәдә бе.

Мојон, мывон - һәммә чәмә сеәдә бе.

Кеш ки, бәбәј чә сорон ношкор есә,

Бевәҹ омејдә сорисә сор есә.

 

Толышә бырзи пыло, мош, мәләғә,

Бә јод дәнә, ты жәј охо бәј ләғә.

Дәвојнә бырзи ратә ышты дыл-ҹәғә.

Чәшон ку бән, гушоны бә кор есә,

Бевәҹ омејдә сорисә сор есә.

 

Кәләм, памәдори бы ди вардәкәс!

Һич һышк ныбо ышт инә чәши арс.

Чәмә мәһол дәношоне чок бә дас;

Нун ни, бәһә лыртә памәдор есә,

Бевәҹ омејдә сорисә сор есә.

 

Һәјф чә ружон, мәзә әби, тук әби,

Бәдә јарон дечәј зәлы чок әби,

Әјән бызын: ышты хунән пок әби.

Инфаркт, ифлиҹ огардә бә мор есә,

Бевәҹ омејдә сорисә сор есә.

 

Ошкорәти бәллиш карде ыштә зу,

Зыне бе ки, план әдәјн һәммә ду,

Ты пидәбу дәвардәјон быбон ну!

Тәләб быкош Мырдови ошкор есә.

Толыш бәбе ижән әвәсор есә,

Жоғошә чок бомен сорон сорисә!

1989 с.