ЧЭМЭ ПЭРЭНДОН - СУКОЭДУМ

ЧӘМӘ ПӘРӘНДОН

СУКОӘДУМ

гылгујруг өрдәк

            Чы мыви һәммә әломәтон сукоәдумәдә һестин. Интаси, әв ҹәмдәкәдә мывисә камиши гәдәлије. че мыви номи сукоәдум бе дәчәј думи порон шат бе ангыле. Кәј били-суко думи порон бәпеј шат бејдән. Ын мывикијән жәғој. Нијә сукоәдум 800 ғ, моә гылә 700–750 ғ омејдә. Сукоәдум бәчәмә тәрәфон нез әвәсори – гиләво рост бејәдә омејдә. Кавујә мәзонәдә ныштејдә. Де дастә нәвејдә. Сукоәдум кам-кам гылә-гылә бәнәве.

ШАҺИЈӘ СУКОӘДУМ

шаһ гылгујруг өрдәк

            Ын мывән бәнә сукоәдумије. Чәвон арәдә фәрғ ыме ки, сәдәш пәпулә – ҹыггә һесте. че шаһијә сукоәдуми думи поронән пегардә ҹон, шатин бәпе. Сәдәш пәпулә бе горыш бәј шаһијә сукоәдум јәни – че пәрәндон подшо, шаһ вотејдән.

            Толышә фолклорәдә шаһијә сукоәдуми ном гыләј шеерәдә гәтә бејдә (Бә дәдулә барәдә мәғалә дијә быкә). Әјо ошко винде бејдә ки, сукоәдум че пәрәндон шаһе ки, дәдулә де бәти бәчәј нокәти шејдән. Һәлбәттә, ын фолклоре.

            Анәдә мыв- кижә, пәрәндон барәдә мәсәмбе јолонку, чымы дыләдә бәвон хысусијә вырә һестбе. Охонә 20–30 сорәдә мыв-кижә, мој-чәке ғыт бе бәмы веј әсәр кардејдә. Охо Толыши ҹәмоәт мој, чәке, сол, кулмә навко ыштә хандәхонәдә әгәти. Бо мыви- чынгыри дијәро нәши. Кишвәрә нәнә 2 тештыш сол- кулмә дингә ҹујәдәш гәтәбе. Әғә (Муса) мывыш соәдә жәбе. Гыләј бә кәј вә егынијәбе, гыләј бә пешт. 40 сор бәнав Мырдови бә һышк жәј бо Толыши боһо бә сә омәј. Толыш мој-чәке, мыв-чынгыр нәһо, чоко бәжије? Һежо ын сутим-сутимон мынышон мәҹбур карде, 15 сор бәнав бы барәдә гыләј шеерым нывыште.