ЛАИЛАhЭИЛЛЭЛЛАh

ЛАИЛАҺӘИЛЛӘЛЛАҺ

Әбдулрза

Моминон кәо бешедән бә ро де бисмиллиһ,
Бино кардән һежо һа кардә кој де бисмиллаһ,
Бә гыләј вырә бышо, пој бәно де бисмиллаһ,
Бәштә јод бәва һаҹо әв Хыдо де бисмиллаһ,
Бәвоте руж-шәвәдә  ЛАИЛАҺӘИЛЛӘЛЛАҺ !

Бә фәғыри, бечизи виндеәдә бевәҹ диә мәкә,
Шедә, де зылми ғәзәнҹ кардә рузи, вардә бәкә,
Кәдә диә кардә, даси жәше чығыл, пошнә тәкә,
Че оләти сәпе ко карде вахти егниә ләкә,
Ванкардедә бәвәдә  ЛАИЛАҺӘИЛЛӘЛЛАҺ !

Ысә ве кәс гиринҹе дештә ҹони, дештә ружи,
Зындәни де дәво чок карде ыштә ҹондә дожи,
Чы Хыдо ешғәдә ештдә гәтедә дасноможи,
Даси рост кардә бә пе – бә Хыдо сәмт пешноможи,
Вотедә вәбәғыблә  ЛАИЛАҺӘИЛЛӘЛЛАҺ !

Момини дыл тәмизе, поке бәнә боғчә выли,
Тоҹирон  сә дәпушиә дынјоәдә дештә ғызыли,
Бечиз ыштә кәдә гырд кардә бә сә кор, ку, шыли,
Жены-мерд номожисә вотдән ыштә дард-дыли,
Кардедән зикр кәдә  ЛАИЛАҺӘИЛЛӘЛЛАҺ !

Де ко карде мәтәле кә-бәдә  һар бојли, додо,
Хыдо пиәкәс  бәрәсе  бә фајә,  шәјтони шодо,
Ғонәғимон әмә бы дынјоәдә  дештә жә чодо,
Хыдоку дәчко ки һежо, бәјо бәросне Хыдо,
Бывото  хончә  сәдә  ЛАИЛАҺӘИЛЛӘЛЛАҺ !

Бә ве одәми һежо хош омедә дынјо жимон,
Әмәни виндәкәсон тобә винде  зындә кимон,
Бәпе мысылмонику чок быбу чәј дини-имон,
Ружи бәбе ки, бәвинден әмә дынјоәдә нимон,
Бәмәсен һар гәвәдә  ЛАИЛАҺӘИЛЛӘЛЛАҺ !

Әзыни, ки бедәбу, чич бәбе чәј умри охој?
Бәпе бы дынјоәдә һар кәс бышу дештә дузә рој,
Бә одәмон ноһәхәдә бевәҹи  кардә гыној,
Де Хыдо риә быши, Әбдулрза, ты Дәј бә зу бој,
Бывот һежо дамәдә  ЛАИЛАҺӘИЛЛӘЛЛАҺ !