ЧЭМЭ ПЭРЭНДОН: ЭFЭКЭККО

ЧӘМӘ ПӘРӘНДОН

ӘҒӘКӘККО

гағајы – чайка

                Чы дыјокәно, дыјо кижән воте бәбе. Әмо әғәкәкко һаканә бо ҹо ов бә выронән омејдә, че канали, руј, хандәхон сәпејән пәрејдә. Китобонәдә нывыштејдән ки, әғәкәкко 14  ҹурыш һесе. Әмә чәвонәдә 3 – 4 ҹури зынејдәмон.

                1) Сијосә әғәкәкко;

                2) гәдә әғәкәкко;

                3) нығә рангә әғәкәкко;

                4) бозә әғәкәкко.

СИЈОСӘ (ДЫЖДӘ) ӘҒӘКӘККО

                Ән јолә әғәкәккоје. Пештыш, кәшон кутыш бозе. Сәш сијо бејдә. Думи тык сијој, чангонышән зардин. Нијә гылон кәшон дырози 100–104 см, моә гылонки 92 – 99 см бејдә. Каспи кәнонәдә жијејдә. Һаканә бә дијон, каналон кәнонән омејдән.

ГӘДӘ ӘҒӘКӘККО

                Ән һырдә гыләј. Сәш сијо, кәшон тык сипи, жинә тәрәфыш тындә бозе. Тыкыш сы бејдә. Ыштә һардемони ови димисә, ја зәминисә, јаән пәрејәдә һәвоәдә гәтејдә. Кәшон дырози 43 – 47 см бејдә. Дыјоәдә һәво бевәҹ  бејәдә, һаканә де дастә бә дијон омејдән. Мелы-мәвуш, һаканә гәдә кулмә һардејдән.

НЫҒӘ РАНГӘ ӘҒӘКӘККО

                Кәшоныш боз, мандә выроныш сипи бејдә. Тыкыш зарде. Лынгоныш нонҹ  јаән зард бејдә. Кәшон дырози нијә гыләку 88 – 98 см, моә гыләку 82 – 92 см бејдә. 2 – 3 гылә моғнә нојдән.

БОЗӘ ӘҒӘКӘККО

                Сәш чил-чилин бејдә.Ҹывонә гылон хакијә рангәдә бејдән, жинә тәрәфи рангыш рушине. Тыкыш ижән лынгыш кавујә-зардә рангәдәј. Ланкони ләпәконәдә кам-кам зомсони дәвонијә гыләш һесте.