ЧЭМЭ МИЛЛЭТ

ЧӘМӘ МИЛЛӘТ

Ымруж Толыши модерн шаир
Ҹамал Ләләзоә мовардә руже.

Рәседәни дастым һеҹо,
Мандедәни ды кәс и ҹо.
Выло  бедә ели кәҹо,
Чәшоном хунә арс шедә,
Чәмә милләт чы даст шедә.

Әвом, нодон де ләшғәри,
Зындәнин хәјри чы шәри.
Ағлышон лузи ғәдәри,
Бә нечијә гәв бу пәс шедә?
Чәмә милләт  чы даст шедә.

Банди сәпе һыр омедә,
Быри куто быр омедә.
Толыши хыр-хыр омедә,
Шатон мандедән, рост шедә,
Чәмә милләт чы даст шедә.

Бесәводон һәммә сәдән,
Мәрдә мердон тәс-тәседән.
Мәлон пули вәсвәсәдән,
Дыликум са тарс-ларз шедә,
Чәмә милләт чы даст шедә.

Ки дамә бу, вотдән ысә,
Чәј замбохи вахтыш рәсә.
Ысәт, бывот, ком вәрәсә,
Ыштә хәјрику ваз шедә?
Чәмә милләт чы даст шедә.

Сәпәҹо кардәш тәләкә,
Вотдәш, мәби мыстәмләкә.
Ыштән жедә бәштә ләкә,
Һар гәвдә и аваз шедә,
Чәмә милләт чы даст шедә.

Ше-ше шәләмон бедә гон,
Сә росткәнән, һа одәмон.
Бә ијәнды һај быдәмон,
Бә и ҹо сәдо барз шедә,
Чәмә милләт чы даст шедә.