БЕМЭНОJНЭ СЫХАН

БЕМӘНОЈНӘ СЫХАН

“Нәғылон”

            Гыләј һестбе, гыләј ныбе, ғәрәјз Хыдо дынјо димисә һички ныбе. Гыләј подшо һестбе. Ружи әј бәштә вәзириш әмр карде ки, быши, гыләј одәм пәјдо быкә, быдә әв бомыно бемәнојнә сыхан бывото. Бә вәзириш чыл руж вахт дој. Вотыше, еһанә ә одәми пәјдо карде нызнош, ышты гиј бәжем.

            Вәзир бәрк бә тарс дәше. Чок зынејдәбе ки, подшо веј золымә одәме, чокнәш воте, жәгоән бәка. Әве егыније бә мәмләкәт, хәбәш гәте, веј нәвәј, әмо чы подшо вотә одәмыш пәјдо карде нызнәј.

            Сивы нәв руж тәмом бе. Вәзир ку-пәшимон огарде омәј. Ројсә бәј и кәс пегыније. Ә одәми чы вәзири әһволыш жығо винде, хәбәш сәј:

            -Һа Хыдо бәндә, аз тыни веј пәрт виндејдәм. Бәты чич бә? Бәмы бывот ыштә дарди.

            Вәзири вотыше:

            -Һа Хыдо фәғыр, быши дештә рој. Ты әлоҹ карде әзыниш бәчымы дарди. Һәдәр нороһат мәкә мыни.

            Ҹоһилә зоә вәзирыш веј мәҹбур карде. Вәзир беәлоҹ манде, һол-ғәзијәш боәј гәп жәј.

            -Һежо ым? –Зоә бә зывон омәј. – Веј һостонә кој. Чанә бемәнојнә сыханоны пијејдә, бәмыку.

            Зоә веј вотыше, вәзири камыш мәсәј. Вәзири вејыш воте, зоә камыш мәсәј. Охојәдә дыкәси бешин омәјн бә подшо сәрај.

            Зоә вотыше бә вәзири ки, ты кәјбә пештәдә быманд, чәш быкә. Ыштән дәше чы подшо тоно, сәломыш дој, сәж жәј, вотыше:

            -Подшо-аләм сәғ быбу, чымы дәдә зырно жәјдә, ышты дәдән зырно жәј зынејдә?

            Подшо дамә ныбе, мәтәл манде. Ҹоһили дыминә сыволыш дој:

            -Чымы гыләј халәзоәм һесте, әв чокә дымбәк жәјдә, ышты халәзоә дымбәк жәј зынејдә?

            Подшо ғыјзин бе. Ҹоһил семинә кәрә дамә бе:

            -Чымы дај чокә саз жәјдә, ышты дајән саз жәј зынејдә?

            Чы ғыјзику кам манде чы подшо чәшәгылон чы вырәку бешун. Әмрыш карде бә ҹәллоди:

            -Ын ҹоһили дештә бемәнојнә сыханон мәвужи мыныш бә мәсхәрә ноә. Быбә, әчәј гиј быжән!

            Бы мәғомәдә вәзир чы кәјбә пешто беше, вотыше:

            -Подшо-аләм сәғ быбу, ышты пијә бемәнојнә сыхан вотәкәс ыме!

            Подшо ыштә һәрәкәтику пәшимон бе, һәм бә вәзири, һәмән бә ҹоһилә зоәш хәләт дој.

            Хыдо шымәни чы ноһәхә шәрику, бемәнојнә сыханонку һифз быкә!

            Осмонәдә се гылә сеф егыније: гыләј чымы, гыләј чы нәғылбывоти, гыләјән әчәј бынывышти.

Бә ғәләм сәкәс: Ҹаббар Ағајев (Ланкон, Бәлетон)