ГИН БЫЭ СУЛЕJМОН

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 23 голосов)
Изменить размер шрифта Decrease font Enlarge font
image

 

ГИН БЫӘ СУЛЕЈМОН

Бәһмән Салеһ

 

            Толышә мәһоли быәше Улум номәдә гыләј ди, бы дијәдән Гулмәммәд номәдә гыләј мерд. Гулмәммәд быә ве зәһмәткәш, һурмәтин ијән сипиришә одәм.

            Гулмәммәди һестышбе гыләј јолә кандыә боғ. Боғәдә дәвоштәшбе хәјләки канды. Вебе чәј мол-мәлә, пәс-быз, каштыгыл, боғ-боғчә. Чокә жимон дәвонејдәбе. Даст гәтејдәбе бә бечизон, бе еһтијоҹыш быә одәмон. Бахшә әдәј бә һамсијон. Һежо ғонәғ-ғәрә әби чәј кәдә. Ве ғонәғдо, вејән һәлолә одәмбе. Ҹәмат ғәссәм һардејдәбе бәсәј сә. Һички пенәкәјбән чәј ныштә моли. Интаси чији…

            Ружи пијоз анҹәнә бе бә Гулмәммәди кефи. Әј ғонәғ ше пијејдәшбе бәштә Пен Менкујәдә (ысәтнә Ғәдиронәдә) жијә дуст Һәнифә кә. Бәпе нубәјни бәбәј боштә дусти ангивинә шон. Әве пегәтыше дујәбынә чо, ше бә кандыә боғ.   Окардыше чан гылә кандулә гәв, бәне ни шон. Музонән мардејдән вәшику, хысусән корпон. Огәтыше ыштә сәфә бә пешо. Ванг кардыше ыштә әғылон, һоли кардыше әвон чы којку.

            …Ве чочинбе. Хонәхо һич гынијәныбе бә парчинон. Парчини жијәдән дәшәныбе. Һичи зыне бејдәныбе че кандулон окардә дызди барәдә. Бәс хонәхо чокнә дәшә бә кандыә боғ?

            Содых дамә бе:

            -Шинә пым, дызд чокнә дәшә бәчәмә кандыә боғ, аз зынејдәм. Шымәнән бәзнешон дызди гәте бәпештә. Бәмы ҹојлинә быһами дызди гәте. Бә әмәлијот оваштејдәм ымшангонәку…

            Гулмәммәди вотыше:

            -Ты гәте, аз вотыме мәгәт?

            Шанго Содых нијо бе кандыә боғәдә. Бә сипјә сыве нези че һышкә ливә һәжин омәј бәчәј гуш. Хонәхо петате бә до де жијә кәмәнди. Ғандыше кәмәнд парчини кәноәдә быә доо бә дыләдә быә дој. Дәбастәшбе че жијә тык бә дој. Чәј ын сәшән дәбастыше бә ын дој. Елашкынише че жијә тык бә кандыә боғ. Дә жијә омәј евоәј бә кандыә боғ. Чок-чоки дијә кардыше бә гырдо-кәно. Жыго зынәше ни әј виндәкәс. Окардыше ыштә пештәдә быә дыждә ангыл. Чәјо бекардыше тор-тумә, егордынише бәштә сә. Бекардыше бәнә гујәве-дастәгујәвејән гыләј чиј, пекырнише бәштә дастон. Гылә-гылә окардыше кандулон, бекардыше шони хончон, дәчынише әвон бәштә хымбә-гушә. Пур бе гушә. Дәбастыше чәј гәв. Еғандыше ғәјшон бәштә амон, гәтыше гушә бә кул. Гылә-гылә ноше че кандулон гәвон. Ижән едјәсәј бә гырдо-кәно, успур бе ки, виндәкәс ни. Ғандыше даст бә доо елашкијә жијә. Бә нимә рост быәбе, Содых беше ыштә нијо быә вырәо, ғандыше кәмәнд бә һәво, екырнише әв сару. Олхортынише әв, дәбастыше де жијә чәј даст-почә, даһастыше канә бәчәј гәв. Чәјо сәдо кардыше кәј одәмон.

            Гулмәммәд бәсә гушонсәјбән, рәјрә омәј роснише ыштән. Чәј думоән зоон – Содыхи боон. Бә и дасти һәво пегәтышоне дызд, бардышоне бә кә. Һар тәрәф тојкибе. Пекардышоне чо. Бәнен ым дызд чәмә улумыже, номышән Сулејмон!

            Содых парсәј:

            -Зә, ты Сулејмониш? Чәмә дијовыж, чәмә һамсијә?! Әмә кам доәмонбе бәты бахшә, дыздијән карде? Жәј һәромә даст бәчәмә музи, әв бәмарде. Бырније чәмә нун, бевәҹә мерд!

            Рукә зоон пијәшоне быкујон Сулејмони, дәрыжнон чәј шулон. Содыхи наһаштыше. Гулмәммәди вотыше:

            -Мәкујән, даст мәжәнән бәј!

            Сулејмон дәгыније бәчәвон по:

            - Вадән мыни, ғәләте кардәме! Емәғандән мыни бә гәвон. Аз ыштән бәдом ыштә ҹәзо!..

            Гулмәммәди вотыше:

            -Әмә вадәмон ым мырдоли, ым номерди, баспардәмон әј бә Хыдо!

            Содыхи зу доше бә пыә сыхани. Вадоше Сулејмон. Сулејмон беше соо бәштә сә жәј-жәј.

            Маштәнәј виндәкәс ныбе Сулејмони чәј кәдә, дијәдә, ҹо выронәдә. Ружон дәвардин бин манг, мангон бин сор, ныбе Сулејмони хәбә доәкәс. Әсрән тәмом бе, ныбе Сулемонику рымуз доәкәс. Ысә әсрон дәвардән, ижән ни Сулејмони хәбә доәкәс! Дијәдыләдә чәј ном манде Гин быә Сулејмон. Чә вахтикујән бә чәш ди-ди чијәкәси еләдә вотејдән: Ты гин быә Сулејмониш?

            Чәмә вотәј ыме ки, ын һикојә һандәкәсон, ын әһволоти мәсәкәсон жы кој ныкән ки, пешоән ныбун “Гин быә Сулејмон”…

 

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|