Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
ОЗОРБОЈҸОН: ОХОНӘ СӘБӘСОЖӘТИ РУЖ?
ТМВ_17_10_2016_
Чымы хосә быјон ијән азизә һовон!
Маштә, октјабрә манги һәждәдә Озорбојҹони һукмәт есәнә сәфә ыштә республикә ружи висты пенҹминә кәрә ид бәка. Чандә ружонин һукмәт ыштә пирпази гәтедә бо иди. Һич шәк-шубһә ни ки, әвон де јолә ешаеши ијән дәбдәбә дәбәвонен ым ружи, чумчыко һежо жыго дәвардә ә руж. Ҹо ҹур әзынијән бе. Чумчыко, ғајдә жыгоје, де топи-тифанги зуј мандедә һакимијәтәдә мандә, де һар воситә ыштә мырдолә умри дыроз кардә, мәмләкәти сосиал-иғтысоди вәзјәт бевәҹә ружәдә быә жәләвонә һукмәтон һәммәј һежо пиједәшоне ки, бә хәлғи ҹифо дыздијә милјон-милјонә пулон һисоб де ҹаһ-ҹәлали дәвонын ыштә идон! Бәле, ым гыләј ғануне! Ыштәнән бы висты пенҹ сори дыләдә Озорбојҹонәдә иглә ғанун һесте ки, әј һич дарыштедәнин, әвән ым ғануне! Мандә ғанунон һәммәј бо рәијәтин, бә Әлијевон хыјзони ијән бәчәвон незә одәмон чәвон һич аидијотышон ни!
Әмма мәсәлә иглә бы сәбәсожәти ружи ид кардеәдә ни! Бәвәдәј ки, охо Озорбојҹони тимсоләдә ым ружи һич гылә әлоғәш ни де һәғиғи сәбәсожәти! Әсыл сәбәсожәти ҹо чије, чымы азизон! Дынјо димәдә жәго гыләј хәлғ әбыни ки, әв орзувони ныбә боштә сәбәсожәти. Ком хәлғијән һестыше жыго әсыл сәбәсожәти, чәј һәхыш һесте ки, дылисыхт ид быкә һәмон ружи!
Одәм бә Озорбојҹони дијә кардеәдә, әјо мәхлоғи жимони виндеәдә, сыхани рости, лап чәј чәшо егынедә ым сәбәсожәти ыштән. Чумчыко хәлғи сәбәсожәтиш пиједә ки, ыштә довләтыш быбу, ыштә ружгори һәнијән чок дәвоны, ыштә зәминәдә бахтәвәр быжијы, ыштә балон де болы-пури перосны, дард-сәр нызны! Ки бәзне воте ки, есә чымы ијо пеһандә чијон һич ныбо иглә гыләјни һесте бы песохтә довләтәдә? Чандә хәлғон сијоружин бы довләтәдә. Чәвон нишоне нә һәх, нә һуғуғ! Чандә хәлғон гәп жәј зынедәнин ыштә зывонәдә. Мәхлоғ һукмәти тарсику ыштә ҹынгыри бекарде зынедәни. Дамә бәкәси ја кыштедән, јаанки дәнојдән бә зиндон! Иглә хыјзон ијән чәј незә одәмон сыхани һәғиғи мәноәдә ружгор дәвонедән ијо. Мандәкәсон һәммәј пијәчынә ружәдән! Быми сәбәсожәти бәбе воте?
Чымы азизон! Чандә кәрә вотәме бәшмә, ижән сәнибәтон вотедәм: Чыми сәбәб ыме ки, Озорбојҹон сыхани әсыл мәноәдә довләт ни, гыләј песохтә нахшәје! Чы нахшә мәғсәдән, әј песохтәкәсонән бәмә чок мәлумин. Вахтәдә бә хариҹи ғыввон лозимбе ки, бәштә геосијоси ијән геоиғтысоди мәрағон мывофиғ бысохтын ым довләти, чәјоән кисиб быкән ым зәминон һәмә сәрвәтон. Чә вахтикујән ым песохтә довләт гыләј вәһм бе Һајми Ғафғази андомәдә! Гирәм ым довләти сохтәкәс чы довләти шәһрвандон быәбәјн, бәвәдә әвон әзнин ки бывыжнын боштә президент ја депутат. Әвонән һарчи әкәјн ки, быдә хәлғ рози быбу чәвонку, ижән бывыжны әвони. Шымә чок зынедәшон ки, нә бы зәминәдә жијә хәлғон сохтәшонни ым довләт, нәәнки әвон выжнијәшонни ым президент ијән чәј депутатон! Ә хариҹи довләтон тәјин кардәшоне әвон һәммәј! Һәмән тәјин кардәшонни ки, әвон хыдмәт быкән бы хәлғон! Не! Тәјин кардәшоне ки, ым һукмәт, ым президент, ым депутатон ијән назирон һәммәј шәв-руж хыдмәт быкән бә һәмон ә хариҹи довләтон! Әве чымон һич тарсышон ни чы хәлғонку! Чәмә јолон вотедән ки, мор әј жәкәсику бәтарсе!Әве ымонән ыштә хәлғику не, чә хариҹи довләтонку тарседән! Шәв-руж кисиб кардедән ым хәлғон, ә пулон дојдән бәштә хариҹи һәваркәшон! Һежо ым песохтә сәбәсожәти ружијән жыго де ҹаһ-ҹәлали ид кардедән ки, быдә ә хариҹи довләтон бывотын ки, һарчи ыштә ғајдәдәј бы виронә мәмләкәтәдә! Јәне, хок пешандедән бәчәвон чәши, кәжәлә пор дәжәнедән бәчәвон сәј!
Интаси, чымы азизә хәлғ, жәго нахшон һар гыләјни кәшедән бо мыәјјән тарыхи мыддәти. Чәвон һар гыләјни бедәше мыәјјән мыддәт. Һәмон тарыхи мыддәти дыләдә ә песохтә нахшә чок ја бевәҹ идомә кардедә. Вахт-вәдә рәсеәдә, һәмон ә хариҹи һәваркәшон һежо ыштәнән дәбастедән әј! Чокнә дәбастедән, чы ҹур дәбастедән, чыми һестыше чандә ро ијән чәм. Јәне тарыхи тәҹрубә исбот кардедә ки, жәго нахшә дәбасте һәмон довләтон дастәдә һынҹе ијән кынҹ! Ијо әсос мәсәлә ФИТВОЈЕ! Кејнә әвон фитво быдон ки, хытом дојдәмон бә һәмон нахшә, бәвәдә вәләззали бино бедә!
Ијо пиједәме ҹәлб быкәм шымә дығғәти бә гыләј мәсәлә. Һа чымы азизә хәлға! Һаканә вотедән ки, һичмәсә, Озорбојҹони мәхлоғ ғыјомкор ни, мытије, бәчәј сә чы мысибәтон бијонән, әв ыштә сәј рост кардәкәс ни! Дард бымәдәј ки, ым һукмәтән, Илһам Әлијевән һежо жыго фикир кардедә. Әвән жыго зынедә ки, чәј тале чы хәлғи дастәдәј. Әве шәв-руж мысибәтон вардедә бәчәј сә ки, бердәм әв рост бәбе!
Әмма ыми бызнән ки, ым мәсәлә жәго ни! Есә Озорбојҹонәдә жијә мәхлоғ, фәрғыш ни, тырк быбу ја толыш, урус быбу ја ләзги, әвон мыәјјән кардедәнин чы песохтә довләти тале! Чокнә ки пијо вотыме, чы довләти тер чә хариҹи довләтон дастәдәј. Әвон кејнә быпијошоне, бәвәдән выло бәкан әј. Һәмән быпијошоне, һежо ым хәлғон рост бәкан бә ғыјом, бәпијешоне, ҹо чәмон око бәдон! Ым әсос ни! Әсос чәвон пијәје!
Бә хариҹи довләтон лозим быә чиј ыме ки, ым песохтә нахшә бә вырә быросны ыштә миссијә, харҹ быкә ыштә потенсиали. Бәвәдә әвон бино бәкан бәштә кој! Бәвәдә ни бәбе ым песохтә довләт! Быми һич шәкон ныбу!
Ыштәнән ыми сәрәсеро еһтијоҹ ни ки, одәм јолә стратег быбу! Ым мәсәлон есә анә димәдән ки, ади одәмонән чок сәрәседән ыми. Әвонән виндедән ки, Озорбојҹон номәдә нахшә есә ҹон-кәныш кардедә! Есән боән, бә иҹо нәзәр сәғандәмон бә Озорбојҹони ҹон-кәныши нышонон.
Шымә мывужи һандәоне чы Петрони “Трималхиони һарды-һәш” номәдә роман. Әјо әв тәсвир кардедә чы Ромә империјә охонә вахтон. Чокнә жиједәбе бәвәдә империјә? Һар тәрәфәдә беимонәти, беәхлоғәти, фаһишәти! Һаким синфи нымојондон, мәмурон, назирон, депутатон һәммәј анә һарын бәбин ки, нә Хыдо зынедәныбин, нәән бәндә, нә дин зынедәныбин, нәән имон! Ымијән бызнән ки, бәвәдә чы Ромә империјә һар ғыввәш һестбе – ләшғәрышән һестбе, пулышән һестбе. Әмма ә империјә выло бе! Бочи? Чумчыко әхлоғ, дин, мәнәвијот выло беәдә, довләтән выло бедә! Мәхлоғ пијәчынә ружәдәбе, әмма һукмәт ыштә кефи кардедәбе! Быми вотедәбин, сыпә ыштә ҹони һајәдәј, ғәссоб нәведә бо пиј!
Озорбојҹонәдә есәтнә вәзјәти фәрғыш чиче чәјку? Хәлғ бевәҹә ружәдәј, әмма һукмәт һа ружбәмијон гыләј ид кардедә! Нә абру мандәни, нә һәјо, нә дин мандәни, нә имон! Довләти телевизијә огардә бә јавәхонә! Шәв-руж гуҹилијә женон нишо дојдән әјо! Речинәти мысобиғон дәвонедән чы назирон женон дыләдә! Әвон гуҹили-гуҹили бекардедән бә телевизор, нишо дојдән бә мәхлоғи! Һәни чичон бывотым бәшмә, ај чымы азизон? Баһандән һәмон ә романи, һарчи ыштән сәбәрәсешон! Әве ыштә јодәдә огәтән: Бо Ромә империјә бәфо ныкардә дынјо бо Озорбојҹони һич бәфо әкәни!
Есән боән гыләјән мәсәлә бывотым бошмә. Мәсәлә бымәдәј ки, Озорбојҹони беимонә һукмәт ым ружи иглә ыштәнәдә ид кардедәни, һәмән әј певыло кардедә бә дынјо чандә мәмләкәтон. Ешаешинә шоткомон тәшкил кардедән дынјо чандә гылә мәмләкәтәдә. Бошмә гәп быжәным чы Русијә појтахт Москвә һәхәдә. Маштә ијоән јолә шоткомә бәбе. Һукмәти одәмон веј даст-почә бин ки, Озорбојҹонәдә жијә ҹо хәлғон нымојондонән ҹәлб быкән бәштә бы һарды-һәш! Сәлошон жәбе бә Русијә толышон диаспори сәрдор Исмоил Шабанови ки, шымәнән боән бы тәдбир, ыштә сыханијән бывотән ҹәмати навәдә! Шабанови веј сахтә ҹәвобыш доә бәвон, вотәше: “Аз ғәбул кардедәним Озорбојҹони сәбәсожә ружи! Бошмә бәзне бе ым иде! Әмма бочәмә хәлғи ым ишғоли руже, чәмә хәлғи тарыхәдә ән сијо руже, чәмә вәтән Толышстони ишғоли руже! Ым руж гыләј фаҹиәје бы зәмини бынәјнә хәлғонро! Ым хәлғонышон де зуј дахил кардә бәшмә песохтә республикә! Шымә довләти сәдә мандәкәсонән ғолдур ијән робыронин, чәвон ко-сәнәт ым хәлғон һәммәј кисиб кардеје! Әве, чәмә бәшмә ид омә фикымон ни, дешмә и довләти тәркибәдә жије фикымонән ни! Әмә ыштә сәбәсожә довләти иншаллаһ бәсохтемон, бәвәдә ид бәкамон!”
Чымы азизон! Чәмә зынәјку, Озорбојҹонәдә жијә ҹо хәлғон нымојондәнән һежо жәго ҹәвобышон доә бәвон!
Чымы азизон! Бовә быкән бәмы ки, аз һар чиј дечәј номи вотедәм бәшмә! Озорбојҹони һукмәт чанә ид кардедә, быкә, чанә пулон харҹ кардедә, быкә! Чымон һич гыләјни һич комәг әкәни бы песохтә довләти! Ым довләт ымру-маштә мәһв быәнине! Мәһвән бәбе! Шымә шәкон ныбу быми! Чымы ијо бәшмә вотәјон пучә гәп нин! Ымон ҹидди тәһлили нәтиҹән! Чәмә чандә кәс мытәхәссисон шәв-руж ым тәһлилон бардедән! Аз ијо чы тәһлилон һәмә деталон әзыним бәшмә воте, быми һич имконән ни! Чумчыко есә һарчи бәрмалә әбыни воте! Сыхани рости, быми чымы һәхымән ни! Һички доәшни бәмы жыго һәх! Әмма иглә чиј ыштә јодәдә огәтән, чымы азизә быјон ијән һовон: Лејла һовә ду вотедәни бәшмә! Әве вотедәм бәшмә: Веј мымкуне ки, маштәнә ид Озорбојҹони һукмәти охонә ид бәбе! Висты пенҹ сор дәкәшәше ым песохтә довләти, һәни вәсе!
Ым довләт выло бәбе иншаллаһ! Шымәку иглә әжом һесте: Шәв-руж дыво быкән бә Хыдо ки, нез быкә чәмә Толышстони сәбәсожәти ружи! Һәмән шәв-руж ко быкән, ныште вахт ни, ко карде вахте!
Быжијы чәмә хәлғ!
Быжијы сәбәсожә Толышстон!
Быжијы Толышстони Милли телевизијә!
Толышпресс ТВ: ТМВ_17_10_2016 : ОЗОРБОЈҸОН: ОХОНӘ СӘБӘСОЖӘТИ РУЖ ?