ЛАНКОНЭДЭ АШУРЭ МЫСИБЭТ

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 31 голосов)
Изменить размер шрифта Decrease font Enlarge font
image
 
 

ЛАНКОНӘДӘ АШУРӘ МЫСИБӘТ

ТМВ_14_10_2016_

 

                Чымы азизә быјон ијән һовон!

            Ыштә сыхани сыфтәдә пијеәме сәбәсәломәти быдәм бә һәмә имонинә шион, бәчәмә хосә хәлғи де Кәрбәлоәдә Сәјд әл-Шуһәдо Имом Һусејни ијән чәј һафто ды кәс сәһобә бә Хыдо хото шәһид бе мыносибәти! Һәм Имом Һусејн, һәмән чәмә ҹо покә мығәддәсон һәммәј ымружнә ружәдә вәјштәдән. Әмма әмә һәммәј ымруж бәмедәмон бо Кәрбәло һәши ҹәлҹәлијәдә шәһид быәкәсон бәчәј хото не ки, чәвон еһтијоҹышон һесте бочәмә чәшә арсон! Әмә Кәрбәло шәһидон зынедәмон бәнә ислами, һәмән ҹәми мысылмонон вәһдәти символи ғәзинә! Мәһз ә һодисә гыләј вәшә чоје ки, и һәзо чоса соре ки, рушнә сәғандејдә бә һәмә мысылмонон дыли, арс вардедә бәчәвон чәшон! Тәсодуфи ни ки, Ирони Ислами инғылоби лидер Ајәтулла Хамејни ружи жыго вотәшбе: Кәрбәло быәнәбәј, ымруж Исламән нәби!  Әве әмә бы мыборәкә Мәһәррәмә мангәдә бо Кәрбәло шәһидон бәмеәдә, һәғиғәтәдә пок бедәмон ыштән, пок бедә чәмә руф, һәнијән камил бедә чәмә имон, һәнијән нез бедәмон әмә бә Хыдо!

            Интаси, чымы азизон, боәмә – бочәмә толышә хәлғи Кәрбәло һар чијсә бәнав чәмә ыштә фаҹиәје! Ымруж әмә бо Кәрбәло шәһидон бәмеәдә, һәғиғәтәдә боштә хәлғи гонә еғволи, чы тыркон зылми жијәдә бәчәмә хәлғи сә омә һәзо-һәзо мысибәтон горәнә бәмедәмон! Гирәм бо ҹо шион Ашурә ружи бәме һәнијән пок кардедәбо әвони, бо һар гылә толыши, сывој ыми, Ғәтылә манг һәмән чәмә хәлғиро гыләј һелеје бә милли озоди ҹанг! Боәмә Ашурә – чы озоди символе, боәмә Кәрбәло – чәмә хәлғи бә Дәҹҹали шәјтонә ләшғәрон вәјнә бардә милли озоди ҹанги мәјдоне, бәвәдә Кәрбәлоәдә шәһидон рост кардә пәрчәм ымруж чәмә озоди пәрчәме, Имом Һусејн ымруж боәмә бә озоди шә роје, Әв һәмән гыләј чоје ки, һежо рушин кардедә чәмә озоди ҹанги рој, Имом Һусејн боәмә вәтәндустәти, диндустәти, хыдодустәти, әдоләти, имони, тәғва ијән бәштә әһди бәфомандәти символе!

            Чымы азизон! Есән боән, дешмә бә иҹо фик быдәмон ки, бочи әмә озоди ҹанг бардәнинимон, бочи әмә ыштә бә Һусејни быә меһиббәти исбот кардеро, бәпе де ғалибијәти бә сә быжәнәмон ыштә озоди ҹанги?

            Бы ружонәдә ныфузинә Әмерикә ружномә The Wall Street Journal-и, бә Барак Обамә рык дојро, нывыштәшбе ки, Путин де Обамә гәп жәјәдә, бә одәми жыго омедә ки, әв гәп жәјдә де Озорбојҹони президенти! Ым сыханон бәнә гуллә гынијән бә Озорбојҹони һукмәти журналистон. Әвон де ғыјзи нывыштедән ки, ружномә тәһғирыш кардә ијо Обамә не, әј тәһғирыш кардә Илһам Әлијев! Лејла һовә бәшмә бывоты ки, ым һәғиғәтән жыгоје! Интаси ымијән зијод быкәм ки, ружномә демијән тәһғирыш кардә һәмән Озорбојҹони песохтә довләт, чәј колһындә иҹтимои-сијоси сохтемон, чәј гырд бемәнтығә идорә систем, мылхәс, чәј һәмә идорә механизми мырдоләти!

            Шымә јодәдәј ки, бы незони шымә һовә вотәшбе бәшмә ки, Озорбојҹон номәдә нахшә охој-охоје, ым нахшә сохтәкәсон һәни чәј Фатиһәшон доә, чәј вырәдә ҹо тожә нахшон, јәне довләтон бешәнинин бә мәјдон!

            Есә әј бывотым ки, Илһам Әлијеви бемәхә тәблиғоткорон бо сәһви нәведән Ғәрби мәтбуотәдә Озорбојҹони һәхәдә нывыштә мәғалонәдә, һәмән пиједәшоне ки, ҹури дәнгулә тәфсирон быдән бәвон: Чәвон вотәјонку жыго бешедә ки, һичмәсә Ғәрби пиједәше глобал зу быбу, һәмән ғәрби довләтон зәһләшон шедә исламику, гја әве чәвон чәш пегәтедәни ки, Һајми Ғафғазәдә бәнә Озорбојҹони ғәзинә гыләј мијоннангырон вылзорә довләт быбу. Әвон иддо кардедән ки, гуја империалистон бурузи виндедәнин ыштә чәшәдә, бо муј нәведән Озорбојҹони чәшәдә!

            Де Илһам Әлијеви хәлғику дыздијә пулон ко кардә бы ахмәхон ағылән омедәни ки, ијо әмә виндедәмон Ғәрби бә Озорбојҹони мыносибәтәдә бә жимон дәвонијә системә мыносибәти! Охо әвон һич сәрәседәнинән ки, Ғәрбәдә чок зынедән ки, песохтә Озорбојҹони охој рәсә! Чәмә Илһамә Хаными дәвардә бәрномәдә вотәшбехо, “Нахшә сә бе – дукони дәбастән!

            Һа, чымы азизгирамијон! Һәлә ки бы һәхәдә ыштә гәпи нимәдә огәтедәм. Чумчыко чымы ымружнә гәпи мывзу ҹоје! Мәвужи шымәнән зынедәшон ки, бы мыборәкә Ашурә ружәдә чәмә сәрзәмин Толышстон, чәмә хосә појтахт Ланкон бә мысибәти мәруз мандә! Илһам Әлијеви јәзидә ләшғәрон һыҹумышон кардә бәчәмә моминон!

            Һодисә жыго быә: Октјабри ијо бә ды дәвардә шәви Озорбјоҹони һукмәти ләшғәрон һәбсышон кардә чандә гылә шиә мысылмон ијән сијоси активистон Ланконәдә. Чәвон авлодон бә и гәв вотедән ки, ым һәбсон әлоғодорин де Ашурә!   Әвон вотәшоне ки, демијән Озорбојҹони полис ијән хысуси хыдмәти органон  пиједәшоне ки, наһаштын ки, толышон Ашурә мәросими дәвонын Ланконәдә!

Һалијәдә һәбсәдә быәкәсон кали гыләјнијонышон вадоә бәчәвон кәон, әмма чәвон вејни һәлән зиндонәдән. Сывој ымон, тәғрибән си кәсән гин быә, һич гылә мәлумот ни чәвон һәхәдә. Ым одәмон бехәбә-әтә гин быән!

            Әмә навбәнав хәбәмон доәбе бәшмә ки, Озлрбојҹони һукмәти ғәдәғәныш кардәбе Ашурә мәросимон мәчитонку кәноәдә дәвоније. Хысуси гыләј комиссијәшон сохтәбе ки, нәзорәт быкә бы коон, һәмән мәрузә быкә ғануни дарыштәкәсон һәхәдә.

            Бәло бымәдәј ки, ғафғази мысылмонон јол, Һоҹи Аллаһшукур Пашазодән фитвош доәбе ки, Ашурә мәросимонәдә мәхлоғ мәчито бенышу бә кәно. Јәне фактик сурәтәдә Пашазодән ғәдәғәныш кардәбе Ашурә мәросимон дәвоније!

            Ымән мәрағине ки, ҹәмати сәј бә даст дәнојро, елонышон кардәбе ки, Ашурә ружи Бокујәдә ијән Толышстонәдә ҹәми чордә мәнтәғәдә мәхлоғ дештә хоши хун бәдо! Һәлбәттә, чәмә һич етирозымон ни бә мәхлоғи дештә хоши хун дој мәросими. Интаси ымијән зынедәмон ки, һәмон хунијән һукмәт пешы һәватедә бә нохәшинон, чәвоән пул бекардедә!  

            Есәтнә вахти Ланконәдә ијән чәмә сәрзәмин Толышстони ҹо шәһронәдә вәзјәт веј гывоне. Одәмон гырдә бедән дастә-дастә, но-пегәт кардедән ым вәзјәти, етироз кардедән бә һукмәти әмәлон. Вәзјәт һәддисә беһудә гывоне!

            Әмма чич бедә быбу, чәмә хәлғи дәвонише ыштә Ашурә мәчитонәдә ијән ҹо выронәдә. И һәзо чоса сор һич гылә ғыввә ғәдәғәныш зынәныбе карде бәчәмә хәлғи Ашурә дәвоније, Әлијеви һукмәтијән һынә ни ыми карде! Јутубәдә быә чандә гылә видео-чәхон быми әјони сыбутин!

            Дијә быкән бы видео тәсвирон: Чәмә хәлғ һәммәјәво бәмедә, синә жәјдә. Әмма бы Ашурәдә чәмә толышон һәммәјсә веј бәмедән иглә бо Кәрбәло шәһидон не, һәмән бочәмә хәлғи, бочәј бы гонә ружи, Әлијевон бәчәмә хәлғи сә вардә мысибәтон!

            Әмма шымә ымијән чок зынедәшон ки, толышон ыштә һәзо-һәзо сорнә тарыхәдә иминә кәрә ни бәмедән боштә еғволи. И һәзо нәвса нонзәминә сори тыркон мәһвышон карде чандә кәс толыш, дәвардә әсри симинә соронәдә ижән чәмә чандә гылә рушинфокә зоә ғырбон ше, и һәзо нәвса нәве семинә соријән са-са толышә мердон ғырбон шин чәмә хәлғи роәдә. Бы просесонәдә мәһв быәкәс әмә – толышон бимон, әмәни ғыр кардәкәс тыркон ијән чәвон песохтә довләт бе! Тосә ымружнә ружи идомә кардедә чәвон бәчәмә хәлғи вәјнә кардә дышменәти ијән номердәти! Мәһз әвон кыштышоне алим Нәвузәли Мәммәдов зиндонәдә, кыштышоне чәј дыглә игидә зоә, дидәргинышон еғанде чәј һәмро Мәрјәм ханым!

            Интаси чымон һич гыләјни арыште зынәшни чәмә хәлғ! Чумчыко толышә хәлғ бәнә әлмочи гыләј мәхлоғе: чанә тәзјығ быконән бәј, чанә тәғиб быконән әј, анән бәнә мырхути и бедән толышон! Ымон һәмән тикәјән ғојм кардедән чәмә хәлғи һафизә: чәмә хәлғ чок-чоки ыштә јодәдә огәтедә әвони һәммәј! Ым зулм веј вахте ныштә бәчәмә хуни, бәчәмә генон!

            Чымы азизон! Мы пијејдәме чәмә Толышстони Милли телевизијә ијән Толыши Милли һәрәкоти номо бовәманд быкәм шымәни: Чәмә хосә хәлғ! Бәчәмә һар гыләјни, бәчәмә хәлғи, бәчәмә вәтәни, бәчәмә дини вәјнә чәвон кардә һар гылә әмәл и кәрән нишо дојдә ки, ым песохтә довләт сәкәротәдәј, марде-мардејәдәј!

            Бәштә јод бијән пролетар шаири ым мисрон:

Һа чымы хәлға! Һа мәрдә мердон,

Гыләјән зәрбә быжәнән бә мытләғијәти,

Әв выло бәбе бәнә пыхә кәј!

            Ыврәшән һесте ки, мытләғијәт бо Озорбојҹони јолә тарифе! Һәғиғәтәдә Озорбојҹон ади гыләј выжори дуконе, ым дукон бы незони бәгыне! Чумчыко Хыдо пијәј ыме, чәј азизә хәлғә толышон пијәј ыме, тарыхи мәнтығ ыме!

            Быжијы чәмә игидә мысылмонә хәлғ!

                        Быжијы сәбәсожә Толышстон!

                                   Быжијы Толышстони Милли телевизијә!

 

Толышпресс ТВ : ТМВ_14_10_2016 : ЛАНКОНӘДӘ АШУРӘ МЫСИБӘТ

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|