ЧЫМЫ JОДЭДЭ МАНДЭJОН -47

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 24 голосов)
Изменить размер шрифта Decrease font Enlarge font
image

 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

47

 

            Гыләјән мәсәлә һесте ијо. Аз ки дәмандим бо Һилали һәвари кәше, чәмә кали толышон нывыштышоне ҹурбәҹурә сыханон чымы һәхәдә. Кали кәсон нывыштышоне ки, һичмәсә “Миәллим Һилали һәвари кәшејдә ки, тарсејдә, Һилал мәһкәмәдә бәһвате әј!” Ружи вотыме бә Һилали ғәјни: “Чымы Билә, жыго сыханон вотејдән-нывыштејдән чымы һәхәдә. Ты ыштә јодәдә чок-чоки огәт: Һилали мыныш анә һәватә ки, һәни нәһватә вырәм мандәни! Бы чандә сорон дырози Һилали ко-сәнәт һежо ым быә ки, һәватәше мы бә Озорбјоҹони һукмәти! Әве, чымы чы тарсым бәзне бе чәјку? Аз Һилали һәвари кәшејдәним, аз ыштә хәлғи һәвари кәшејдәм, Һилал ја ҹо толыш ыми дәрәсоән, дәнырәсоән!

            Ружи маштә-маштә чәј ғәјни зангыш карде бәмы. Һытәбим, әштим, ҹәвобым дој. Сыхани рости, сыфтә һич сәнырәсәјм ки, чич вотејдә бәмы?! Ыштә гәв-гуши ҹујејдәбе, һәј-һәј-һәј-һәј, һа данҹејдәбе екардејдәбе! Чандибәчандон вотем, “зә, бәнә одәми бывот һәлә, чич быәхо?” Мәлум бе ки, Јутубәдә чәмә гыләј видеочәхышон ноә – 1993-нә сори ғәзијон һәхәдә, мынијән нишо дојдән әјо! Вотем, “ышты вотәј чиче?” Воте, “ыштәни реклам кардејдәш, һәмән пијејдә ки, Һилали егәтын бә дылә!” Нам-нами гәп жәјдәбим. Вотем, “һа биләм, охо ә видеонывыштәјон чымыку нин, һич вахтијән быәнин, әвон чә вахтику Һилалику быән, гирәм ҹо кәсикујән һестенбу, чымы хәбәм ни, аз охо чокнә бәном әвони бә Јутуб, һәмән бәчымы чичи лозиме ыштәни реклам карде?” Һа вотыме, нымәсәше мы, ыштә вотәјыш воте! Охој вотем, “зә, ... , аз нам-нами гәп жәјдәм деты, ты вотејдәш, һәлбәт чымы зывоным ни гәвәдә? Тынән жыго-жыго быбуш, ышты Һилалән, ә видеочәхи ноәкәсән!” Һәмушым карде телефон. Интаси деми һәлә сә ныбе ым ко. Шымә фик быдән бы одәмон беһәјоәти, һежо һәмон ружи мәлум бе, ки ноәше ә видеочәх бә Јутуб. Ә ... гыләј зангышән ныкарде, узрхаһишән ныкарде ки, бәс жыго, “Миәллим, быбахш, гонә сыханоным воте бәты!” Ымән һәлә бә ҹәһәнным! И ружи бәпештә бәнем ижән занг кардејдә бәмы. Вотем, бәлкәм ағылыш гәтә! Ај-һај! Чич бывото бәмы, чоке? Воте, “ымруж ижән пикет дәвонејдәмон сәфарәти навәдә, тынән бој!” Чы одәмон нә дими бејдәни зыне, нәән остори! Жыго бызын, анә гонә сыханон ноһәх-ноһәхи бәмы вотәкәс әв ныбе! Вотем, “быши ыштә митинги дәвон, дәварде һәни чымы әјо оме!

            Веј чијон бәзнем нывыште, әмма ижән нәһләт вотејдәм бә шәјтони!

            Әв ки манде бә Әләкрәми, “хыдмәтон” мәсәләдә әј һич вахти мығојисән әбыни кардеј де Һилали, зәмини-осмони фәрғ һесте чәвон мијонәдә! Әләкрәми, ја овәләку ја зылзыләку, һәғиғәтән хыдмәтыш һесте Толыши роәдә, дештә дә номијән егынијә бә тарых! Ыми бә һәшә жәј әзыним нә аз, нәәнки ҹо гыләј толыш!

            Әмма Әләкрәми охонә соронәдә кардә коон гыләј сырафә сијо ријәшон кәшә чәј навконә хыдмәтон һәммәј сәпе!

            Толышстони телевизијәдә ки кали сыханоным вотәбе Әләкрәми һәхәдә, чәј навәдә дум чадоә кали толышон әлбәһол јаһушон рост карде ки, һичмәсә, аз “чәј женым тәһғир кардә!” Әј тобә! Мыни зынәкәсон чок зынејдән ки, чымы женә ком ни, жени номијән гәтәкәс ним, де женијән гәп жәкәс ним, хысусән, сијоси мәсәлон һәхәдә! Чичым вотәбу, Әләкрәми ыштәни һәхәдәм вотә!  Аз әјо вотәме ки, “Әләкрәми бардә сијосәт “мамженә” сијосәте!” Есән тикрор кардејдәм ә сыхани! Жәгоје ки һесте! Чандә сорон пијәме ки, Әләкрәм бә һонә бо, бызны сијосәт чиче? Аз чич быкәм ки, һич незән омәни! Дәвардә әсри 80-нә сорон охојәдә чокнә ки әвон биношон кардә ым Хәлғи ҹәбһә һәнәкон, детобә ымружнә ружи һежо әјоән мандә, и выжән бә нав омәни! Охо ым чымы гыно ни!

            2009-нә сори сыфтә-сыфтәбе, Каһини вотыше бәмы ки, “Бојли пијејдәше бо бә Москвә”. Вотем, “чымы Билә, аз һәлә тожә омәм ијо, есә-есә пијејдәме бәрпо быкәм кали контактон. Мы пијејдәмни ки, әв тәј-тәј бо, жәгоән огарды бә пешо! Быдә тикәј сәбр быкә, аз гәп бәжем ијо ки, быдә чыврәј һукмәти һич ныбо гыләј нымојәндә ғәбул быкә әј! Кејнә рајым зынәј, бәвәдә хәбә бәкам, боме!

            Жыгоән манде ым мәсәлә. И кәрән – 2009-нә сори мартә мангәдә (дырыстә тарых чымы јодәдә ни) Исмоили зангыш карде бәмы. Воте, “хәбә һесте, ымруж Әләкрәм омејдә бә Москвә!” Вотем, хәбәм ни! Воте, “Заһирәддини зангыш кардәбе бәмы, ијој, Москвәдәј, әј вотыше бәмы, чич быкәмон?” Вотем, “хонәхо һәни омејдә, чич кардәнинимон? Бој, иврәдә бошамон, пишвоз быкәмон әј!” сыхани рости, Исмоил сыфтә рози ныбе, әмма розим еғанде әв. Тикәј дәварде, де Заһирәддини омәјн, азән ныштим бә машин, шимон бә Шереметјево. Әләкрәм омәј. Бешимон аеропорти бинао.  Әнәһој дәныварде, Адил омәј де Мурвәти ијән Ханоғләни. Шимон бә Химки, әјо Ханоғләни һарды-һәшыш дој бәмә. Пешы әмә ныштимон ижән бә Исмоили машин, омәјмон бә шәһр. Роәдә Әләкрәми вотыше ки, “Исраил консерт дојдә ымруж Лублиноәдә гыләј ресторанәдә, бошамон әјо!” Аз вотем, “Исраили ыштә мәғсәдыш һесте бы консертәдә. Бәмынән дәвәтномәшон доә, әмма шеј фикирым ни, быдә әв ыштә кој быкә, боән мәшәмон әјо!” Әләкрәм воте ки, “Исраили ыштән дәвәтыш кардә мы, һукман бәпе бышум!” Бә коврә бәрәсе, шимон. Ныштимон консертәдә, тикәј гәпымон жәј, дарды-дылымон карде. Әв ше де Заһирәддини, әмәнән певыло бимон һар кәс бәштә кә.

            Маштәнә ружи ижән гырдә бимон. Дастәј толыш омәбе. Лублиноәдә гыләј ҹо кафеәдә ныштимон. Әләкрәм воте, “чымы омеәдә мәғсәд әве ки, гыләј тәшкилот бысохтәмон, чәмә һәмә тәшкилотон – Русијәдә ијән Авропәдә быә тәшкилотон и быбун!

            Аз ныштәбим кәноәдә. Чымы нәзәрышон зынеј пијәј, вотем, “аз Русијә шәһрванд ним, әве һичи әзыним воте, ыштән бәзнешон!” Әләкрәм һәкәм манде ки, аз бывотым ыштә нәзәри.

Ымијән бывотым ки, әјо быә гәпон һәммәј һәхәдә нывыштејдәним, кырт кардејдәм. Веј гәпонышон жәј. Һәмән жыго сәрәсәјм ки, әвон ыштә арәдә дот-бызышон кардә һарчи, есә һежо жыго, формал гыләј гәпе жәјдән ки, быдә бывотын ки, бә мәслоһат омән! Заһирәддини нывыштәшбе һәмә сәнәдон, иглә мандәбе ки, гыләј һышкә һа бывотын ныштәкәсон! Ымијән сәрәсәјм ки, чәвон нәзәрәдә гәтә чиј сијоси гыләј тәшкилот сохтеје, мәғсәдән ым тәшкилотон һәммәј Әләкрәми дасти жијәдә гырдә кардеје! Пешы умутыме ки, мәвотбән, шанго шәнбән Ханоғләни тоно, розишон кардә әв ки, быдә јолјәти быкә бы тәшкилоти!

            Вотем, “чымы принсип һежо иглә быә: гыләј ко кардеәдә, ғануни зыне ијән бәј әмәл кардеј лозиме! Русијә ғанун иҹозә дојдәни ки, Һолландијәдә быә гыләј тәшкилот и быбу де Русијәдә быә гыләј тәшкилоти! Шымә чич вотејдәшон быми?

            Һәммәј ерәхәјн бәјәнды, мәвужи, сәрәсәјн ки, ым һич бәчәвон ағылән омәни! Сыхани жыго, сыхани жәго, бә рај омәјн ки, чок, быдә Русијә тәшкилотон гырдә быбун бә иврә, тәшкилоти ном быбу “Русијәдә Толышә тәшкилотон Координасијә шурә”, Ханоғләнән быбу чәј јол.

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|