ЧЫМЫ JОДЭДЭ МАНДЭJОН -45

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 16 голосов)
Изменить размер шрифта Decrease font Enlarge font
image
 
 
 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

45

http://tolishpress.org/news/4259.html

 

            Ҹаваншир беше ше. Ныштәбимон Наманганәдә кафејәдә. Исмоилән әјобе. Хәјли бәпештә занг омәј бә Исмоили телефон. Воте, “Атахане!” Телефоныш ној мијонәдә ки, һәммәј гуш быдәмон. Атахани вотыше бә Исмоили: “Тыны Хыдо, бывот бә Миәллими ки, ғәләтым кардә, и кәрән гәп әжәнним чәј думо!” Исмоил воте, “Атахан, аз хаһиш бәкаме Миәллимику! Интаси пешы ты ижән гыләј сыхан бәвотеш, бәвәдә Миәллим дәбәчыке чымы јәхәку ки, “ты зомин мандиш бәј!”” Атахани хәјли ловә-мыннәтыш карде бә Исмоили. Вотем, чок, нохтәмон ној бы мәсәлә. Әмма и кәрән бымәсым ки, Атахани гыләј гәпыш жә чымы думо, бәвәдә ыштән зынејдәшон чич бәкам деәј!

            Ружијән хәбә беше ки, Атаханышон кујә! Әлбәһол бәјонотымон дој, әмма мәсәлә деми сә ныбе. Ды-се ружи дыләдә гырдә кардыме бы һәхәдә лозим быә информасијон, нывыштыме гыләј “чәмә тәһғиғот” ки, чап быкәм. Чәј ном жыгобе: “Озорбојҹони Милли бетәһлукәти вәзарәти чокнә ефырсынише ыштә ҹәсус бә Владимир Путини де сијоси дидәргини номи”. Кырт-кырти нывыштејдәм ки, чичон чочин омејдәбин бәмы?

            Атахани кујә ружи маштә-маштә Һилали Бокујо зангыш кардәбе ки, “ым гыләј бизнеси тасыбе, сијоси ранг мәдән быми!” Аз чыконҹо зынәме чыми һәхәдә? Һәмон ружи Атахани јолә быјә омәбе Казахыстоно, Исмоил бешәбе бәчәј нав. Әј вотәшбе: “Аз чы Атахани јолә быјәм, аз һәлә зынејдәним ки, бочи кујәшоне әв, әмма чочинә које ки, Һилал Бокујәдә ныште-ныште хәбәдоје ки, мәвотбән, “ым бизнеси тасыбе!” Һилал чыконҹо зынејдә ыми?

            Әмма ымән әсос ныбе бомы. Ружи Исмоил, Елшән ијән Немәт (Бәдәлоныже) шин Атахани тоно бә нохәшхонә. Елшәни веј ловәш карде ки, “Миәллим, бој тынән бошамон, пешы вот-вож бәбе!” Вотем, “ты де ком дими чымыху хаһиш кардејдәш ки, осә бывғандым жәго гыләј ...?! Бышән!” Әвон шин. Огарде бәпештә, ижән ныштәбимон кафејәдә. Исмоил воте, “гыләј чиј дәнырәсәјмхо, һа Миәллима!” Вотем, бывот! Воте, “вотыме бә Атахани ки, зинә Озорбојҹони сәфарәто зангыш кардәбе и кәси, хәбәш сәј ки, Атахан чокнәј?” Атахан парсәј ки, “чичбе чә одәми ном?” Аз вотыме ки, “ты чы зынејдәш әвони, сәфарәти гыләј коәкәбе, заныгш кардәбе, азән росниме бәты чәј сыхан!” Атахани вотыше бәмы: “Аз зынејдәм әвони һәммәј, ты бывот чә одәми номи!” Исмоил: “Сыхани рости, аз ыштән мот мандим бы кој! Ијо одәмон һестин ки, вист соре жијејдән Москвәдә, әмма һич сәфири ки бе зынејдәнин! Ым Атахан ды соре ијој, әв чыконҹо зынејдә сәфарәтәдә ко кардәкәсон һәммәј?

            Пешы Немәтән омәј, һежо ым гәпыш жәј. Әвән мәтәл мандәбе ки, “Атахан чыконҹо зынејдә сәфарәтәдә ко кардә одәмон һәммәј?

            Мылхәс, ҹо мәсәлонән һестбин, һәммәјым нывыште ки, чап быкәм. Әмма и кәс дәхыл гыније бәмы ки, “чап мәкә ыми, боһо сә боме боәмә!” Вотем, “чымы тарсым ни, чап бәкам әј!” Хәјли дәкәшәј чәмә гәп, охојәдә ә хонәхо гыләј сыханыш воте ки, чәјку дәварде нызнәјм! Дырниме ә коғәз, һәни чапым ныкарде!

            Мәсәлә мојә чичбе бәс? Москвәдә ки хысуси хыдмәт органон сијоси кучкун статусышон доәбе бә Атахани, әвон ружон ружони оғо быәбин ки, ај номерд, мәвотбән, ым Атахан ко кардејдәјбән бә Озорбојҹони! Әве чәј гәв-гушышон һырд карде, чәјоән дәрошон карде бә Һолландијә! Әве, бә Атахани һич имконышонән ныдој ки, бызны, чич бе чәј кој истинтоғ!

            Гин бе ше, әмма детобә ымружнә ружијән ... чымы думо!  

            Есән идомә кардејдәм де Каһини Москвәдә бәчәмә сә омә ғәзијон һәхәдә ыштә гәпи. Бәј вотем ки, Мәло пәјдо быкә бомы, деәјән димбәдим быбәмон, чумчыко әјән камә гәпоныш жәни! Каһини пәјдо кардеш нызнәј Мәло! Жыбызын, гин быәбе! Шанго шәви нимәбе, Каһини вотыше ки, “бошамон бә Мәло офис, мәвужи, әјо бәбе!” Зангыш карде бәштә гыләј дијовыжи ки, “әмә омејдәмон бә офис!” Ә хонәхоән бәј вотыше ки, “офисәдәј, чәш бәкарде әмәни!” Омәјмон бә Мәло офис. Бәнемон, ләлә кучыш кардә, јурдыш мандә! Әјо быәкәсон вејни витән шән! Каһини дијовыжән витәбе! Дәшимон бә дылә, бәнемон 5-6 кәс одәм һесте әјо, чәмә Рабил ныштә мијонәдә устелисә! Һол-әһволымон карде. Әғылон парсәјн Рабилику ки, “ты чы әҹәб ијош? Кејнә омәш? Бочи омәш?” Рабил, шык бә Хыдо сәғе, бә һәшә нибәже (лап быжәноән, вәс ғәдәрәдә шојд һестбе әјо!), дәманде бо бәме!  Чәшонош арс ру бејдәбе бәнә овәјзи! Валлаһ, һич јодәдәм мандәни, чичон вотејдәбе?   Тикәј ныштимон әјо, бешимон шимон. Маштәнә ружи детобә шанго Каһин нәвәј бо Мәло, әмма пәјдош нызнәј карде әв! Охој мәҹбур бе, зангыш карде бә Әсғәри Фәрди ки, әв бывоты бә Мәло, быдә “вәју бешу пардәо!” Һәни әзыним воте, Фәрди чичоныш воте бә Мәло, пешы зангыш карде бә Каһини ки, “фылон саатәдә Мәло боме бә фылон кафе. Интаси шәртоныш һесте: 1) Миәллим ҹојли бышу әјо; 2) Мәло еһтијот кардејдә ки, којәни, бердәм жычиј бәбе әјо, әве ҹојли нибоме, һәнијән одәм бәбе чәј тоно!” Вотем, розим!

            Мариноәдә кафе һестбе “Орзу”. Омәјм әјо, бәнем, Мәло омә, чәј тоноән Исмоиле ијән Исмоили амјәзо Мубариз. Тәғрибән се саат гәпымон жәј, чоштәмонән һарде. Бәмы жыго омәј ки, нохтәмон ној һар мәсәлә сәпе. Бешимон, Мәло пијәше бышу. Вотем, жәго ко нибәбе! Бәшемон есә иҹо бә Наманган, Каһин де Елшәни чәш кардејдән әмәни әјо.  Шыкырне-шыкырне бардыме әв. Ныштимон чокәси, вотем, Каһин, Елшән, есә чы парсон һесте, быдән бәмы! Әвонән чы сыханонышон мәсәбе Мәлоку чымы һәхәдә, гылә-гыләшон воте, азән ыштә ҹәвобым дој!

            Вотем, чымы Билон, һәни ҹо парсонон ныманде ки? Вотен, һарчи мәлуме!

            Маштәнәј Каһин огарде ше бә Минск. Азән омәјм бә Боку. Да руж дәкәшәј чымы сәфә.

            Һәшјә: Чымы ым нывыштәјон дәрҹ быә ружику, чәмә кали толышон ыштә рај нывыштејдән сосиал шәбәконәдә. Аз ки бејдәним сосиал шәбәконәдә, әве чәвон вејни хәбәм бејдәни. Әмма чәмә ҹывонон кали рајон вығандејдән бомы ки, бызным чич нывыштејдән! Де ҹо нывыштәјон ком ни, иглә мәсәлә һәхәдә нывыштејдәм. Чәмә билон гыләјни нывыштәше ки, “мемуарон ыштән чокин, интаси ғәрәз һесте ијо, ымән чокә ко ни!

            Сыфтәку нывыштәме ки, азән ҹонинә инсоним, чымынән дыл һесте, әвән дәжејдә һаканә! Һәмән, јоләшәхәти ныбу, чымы дышменон тосә есә һәлә дожнијәшонни чымы дыл! Чымы дыли дожнијәкәс һежо толышон быән! Һежоән пијәме ки, папе ныбум бәвон! Хыдо шојде ки, аз надир һолонәдә ҹәвобым доә бәчымы ыштәни унвон нывыштә быә тәһғирон! Әнҹәх бәвәдә ҹәвобым доә ки, зынәме ки, бочәмә хәлғи ијән һәрәкоти хәто бәзне бе!

            Бочи ымони нывыштејдәм? Бәмы жыго омејдә ки, бәчәмә вејнә толышон хош омејдә мыни тәһғир кардеәдә, чымы думо һәзо гәпон жәјәдә, бәмы шәр ғандеәдә! Надир һолонәдә виндәме ки, гыләј толыш бывоты ја бынывышты ки, “Миәллими һәхәдә нывыштә быә фылон мәтнәдә ғәрәз һесте!” Пијо ки нывыштыме ә ғәрәзи мәсәлә, пијејдәмни чә одәми номи быгәтым, әмма ымијән зынејдәм ки, чандә кәрә әј ыштәнән имзош ноә бәчымы унвон нывыштә быә жәго мәтнон ја бәјонотон жијәдә! Әмма һич вахти вотәшни ки, “ғәрәз һесте ијо!

Идомәш һесте

 
 

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (1 добавлено)

  • Опубликовано Rabil, 08 Октябрь, 2016 13:36:42
    Kahin Mirzalizade! Tınən ofisdə biş oxo... Çımı de Fəxrəddini kom nıbe... Çımı ko dıtı ijən de Elşəni be... Şımə de anonim, leqal ijən şərikinə nikon mınon təhqir kardəbe... Azən fırsət nəvedəbim ki şıməni bıvindim... Vindəcəğın hucumım karde bəşmə... Cıvonəti be... Quya azən ıştə sıxanım vote həni... Tınən ofisdə beşiş və vote ki ƏVON RABİLIŞON BEKARDƏ BƏ ÇƏMƏ VƏ...Halbuki joqo nıbe... Az əyo konco bəmim? Sadəcə əsəbin bıədə çəşədəm ast beşedə... Əncəx bə nohəx dıtım joqo karde... Tıni çok zındə nıbim... Əvvəldə bəmı mehribanəti karde... Azən hucumım karde bə Elşəni... Mande Ataxani həxdə... Ataxani qıləy çiş nıvışte bə Fəxrəddini cavabış doe...Əve Fəxrəddin əsəbin bıə de ğərəzi nıvıştə... Oşko nıvıştə ki Ataxan çe hukməti agente... Im ğərəz ni çiçe? Əv bimi agent votdə ımən bəy...Az çok zındəm ki heç qılə agent nin ovon...Sadəcə Fəxrəddini MTN-i dasdə rəxero muəyyən jestonış kardə...Ataxanən mumkune bənə qıləy bandi odəmi Fəxrəddini votə çiyon həzmış kardə ni... Əncəx Fəxrəddin muəllim yodo bekardə ki əv bənə əsqəri çəy sifarişonış icra kardə dorozə soron...Iştə şəxsi karyero heç vaxt çəyku diəro vitə ni... Çəy moə dəfndə bənə Fəxrəddini bıə...Bə aeroport bənə merdi beşe bə çəy və...Əy çəykuş heç vaxt imtinaş kardə ni.. Fəxrəddini bəy kobudətion vey bıən...Əy hejo səbrış kardə..Fəxrəddini ijən Ataxani fikondə az dərsdəm ki HUKMƏTİ HEÇ TAXSİ Nİ, ÇİÇ KARDƏ TOLOŞON KARDƏ BƏ YƏNDI...Im səhve..Hukməti bə tolışi hərəkatış divon qətə...İmi bə co kəsi qi ekarde əbini...İjən ki tolışi hərəkatda Fəxrəddini de Ataxani xususi vırəş heste...Dı nıvıştəyon əvoni çəşdə eğande əbini...

Главные новости

|