ЧЫМЫ JОДЭДЭ МАНДЭJОН -44

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 30 голосов)
Изменить размер шрифта Decrease font Enlarge font
image

 

 

 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

44

 

            Ружи Насири зангыш карде бәмы ки, Нәвузәли гин быә, чунешон бардә, һички зынејдәни! Гырдә бимон “Лидер” телеканали бина палијо гыләј чајхонәдә. Азбим, Насирбе, вәкил Рамизбе, Атаханбе, һәнијән 5-6 кәс ҹо чәмә һәмрон. Рамиз воте, һол-ғәзијә жыго, Миәллимышон дыздијә, конҹо огәтејдән, хәбәмон ни! Һар вырәдә быәмон, хәбәмон сә, һички вотејдәни ки, конҹој әв?

            Мылхәс, мәлум бе ки, Нәвузәлишон гәтә! Һар кәси ыштә фикирыш воте. Сыхан бәмы рәсәј. Вотем, Рамиз, ты чәј амјәзош, әве һарчи быкомон, бәпе дешты рај быкәмон! Чымы вотәј ыме ки, боән сијоси ранг быдәмон бы мәсәлә, бәјонот быдәмон, һај-ку рост быкәмон, һуғуғи гәрдәнкәшон ҹәлб быкәмон бы кој, пикетон тәшкил быкәмон!

            Рамизи бәвәдә окардыше кали сырон. Воте, “мы виндәме Нәвузәли, әмма әв мәслоһат зынејдә ки, һәлә һај-ку рост мәкәмон, бунәмон чич бедә?” Вотем, конҹо винде әв? Воте, “Нәвузәлишон сәдо кардә бә МБВ, әјо вотәшоне бәј ки, дастәј Ирони “ҹәсусымон” гәтә. Чәвон телефони зангон дыләдә ышты нумрә бешә. Тынән де Ирони кәшфијоти органон гәпы жә. Ым чы мәсәләје?” Нәвузәлијән вотәше ки, “аз һич вахти гәпым жәни де Ирони, ыштәнән зынејдәним, чокнә које ым?” Пешы бәштә јодыш вардә ки, ды кәрә Елмани дечәј телефони зангыш кардә бә Ирон. Парсән чәјку, “бочи?” Вотәше ки, “Елман шартук каштејдә дијәдә, динг лозиме бәј. Әмма динги деталон нин ијо. Әве, әј ироныжонку хаһишыш карде ки, чәјо бывғандын боәј әвони”. Чәјо вадоәшоне әв бә кә. Әмма Нәвузәли омә бәштә машин ныште пијәдә, ды кәс полис омән, һәбсышон кардә әв. Пешы мәһкәмә бе, 15 суткә кошон бырније боәј”.

            Вотем, ыштән бәзнеш, чокнә вотејдәш, жәгоән бәкамон! Чәјо һәмрон вотен, “ышты зынәјку, бочишон гәтә Нәвузәли?” Мы чоглә версијәм воте. Чоминә гылә Ирони һәхәдәбе. Вотем, “мандәјон һәммәј һич, Хыдо ныкардә, Ирони мәсәлә быбо, ым ҹидди мәсәләје!” Чәјо вотем ки, “әмәни һәммәј сәдо бәкан, гирәм Ирони мәсәлә быбо. Чымы шәхсән тарсым ни, чумчыко ән гонә мәсәлә, мәвужи, пули мәсәлә бәбе. Чики жәго кош быәбу де ироныжон, әв бытарсы! Әли, ышты тарсы һесте?” Әли Насир воте, “не!” Вотем, лап чок. Сәдо бәкан, хәбә-әтә бәстен, чәјо вабәдон, һич нороһат мәби! Әсос мәсәлән ыме ки, тарсе лозим ни! Бы вахти Әли Насир огарде бә Атаханиш дијә карде, вотыше: “Амјәзо, чич быә бәты?! Сијо-сәмутә быәш!” Атахани вотыше: “Амјәзо, әвон мәһв бәкан әмәни һәммәј!

            Бә ғәрор омәјмон ки, Рамизи сыхани чәш быкәмон, әв чокнә бывото, жәгоән быкәмон. Пешы умутымоне ки, Елманышонән гәтә. Чы мәсәлә кали деталон бегули бин. Мәлум бе ки, һукмәти одәмон шән бә Елмани кә, бәј вотәшоне ки, Нәвузәли һәватыше ты, вотыше ки, ты гәпы жә де Ирони кәшфијоти одәмон! Елмани бовәш кардә бәвон, чич һесте, вотәше! (Мәһкәмәдә аз шојди ғысмәдә ифодә дојәдә, Елман һежо вотејдәбе ки, “Нәвузәли һәватәше мы, әве аз мәһв бәкам әј!”).

            Жыгонә, аләм гыније бәјәнды. Ружи Әли Насири сәдош карде мы, воте, “Атахани быјә Һәзәрхан омәбе чымы тоно, вотыше ки, “Миәллими һәватәше чәмә әғылон!”” Әли ыштән чы ҹәвобыш доәбе бәј, ыми огәтәмон. Ше-ше бәнем ҹо әғылонән вотејдән ым сыхани. Ружи ижән омәјм Әли Насири тоно бә “Ғәләбә” тоно быә чајхонә. Машино ешим, бәнем, Әлије, мәрһум Сәдрәддине ијән Атахан. Де Әли ијән Сәдрәддини дылисыхт  диммачонемон карде, сардын-сардыни дастым дој бә Атахани. Әли Насир воте, “Зә, дејәмә диммачоне карде, әмма бәчымы амјәзо дасты дој! Ым чы мәсәләје?” Вотем, “рост вотејдәш! Дард бымәдәј ки, ышты амјәзо даст доәнинә одәм ни! Есә кали гәпон бәжем деәј, пешы мыәјјән бәкам ки, диммачоне бәбе деәј карде ја не?!” Бә Атахани вотем: “Зә, ... , ты чымы дасти әғылиш! Ым чы гәпе, ијо-әјо вотејдәш ки, аз Нәвузәлим һәватә! Ты вотеј пијејдә ки, аз ... боты, одәм һәватејдәм?! Ты вотејдәниш ки, жыго сыханисә аз мәһв бәзнем тыни карде?!” Дәманде боштә гәв-гуши ҹује! Вотем, “еһанә аз һәватәмбу Нәвузәли, чымы ... ..., ја ты ду вотејдәбуш, ышты ... ...!” Сәдрәддин певаште ыштә ныштә вырәо, воте, “Миәллим ым чы које, аз иминә кәрәје ки, дымжон мәсејдәм ышты зывоно!” Вотем, “Сәди, быбахш мыни, әмма де жыго ...  ҹо ҹур мымкун ни!” Атахан ларзе-ларзе воте ки, “тынән чымы һәхәдә жәго гәпон жәјдәшхо!” Вотем, “зә, ај ..., аз ышты думо гәп жәјдәм? Аз бәки лозиме, бәчәј дим вотејдәм һар гәпи! Бәтынән есә вотејдәм, ҹәвоб быдә бәчымы бы парсон: -Чокнә бе ки, де Рамиз Меһдијеви сифориши шиш бә сәчын, Шејхы тәһғир карде, чәјоән Муртуз Әләсгәрови кош дој бәты ыштә фирмәдә? Ты гирәм чы һукмәти дышменишбу, чокнә Муртузи фирмәдә ко кардејдәш? Ты дышменишбу дын һукмәти, чокнә ыштә һәмро Әдлијә вәзарәтәдә пәрдиси рәис ко кардејдә! Һәлә әј вотејдәним ки, ым һукмәт бәштә дышмени быјә орден дојдәни! Ҹәвоб быдә бымон!” Ларзејдәбе! ...

            Әли виндыше һәво гузәке, әште сәпо, воте, “аз сәјдим, боән ыштә ростә дасти бынән чымы синәсә, ғәссәм бәһән ки, сә кардејдәшон ым сыхани!” Вотем, “Әли, аз ғәссәм бәһаме, әмма чок зынејдәм ки, ым ... ыштә вотәј бәвоте! Ғәссәм бәһом, бәвәдә пешы дәбәчыкем ышты јәхәку!” Әли һәкәм манде, һар дыјнән дастымон ној чәј синәсә, ғәссәмымон һарде!

            Интаси пешы чымы вотәј бе. Атахани дастыш ныкәшәј ыштә беномусәтику, һар вырәдә ыштә гәпыш жәј. Тарсику бәчымы чәшијән чијејдәныбе ки, тәнбе бәкам әј. Тикәј дәварде, мәсәме ки, витә шә бә Москвә, әјоән һежо лил кардејдә ови, ...  чымы думо.

            Ыштә хариҹи паспортым сәј. Каһин һежо һәкәм бејдәбе ки, “и кәрә беши бој ијо”. Ружи мәсәме ки, Исраил шејдә бә Минск бә вәјә. Дыкәси пәрәјмон бә Минск. Ды-се руж мандим әјо, чәјо Каһинымән пегәте, омәјмон бә Москвә. Сыхани рости, Каһини пијејдәшныбе бо бә Москвә. Вотем, “чымы билә, дыл гужде! Анә гәпонышон жә чымы думо, дыләдә ләкә бәзне манде. Бошамон, димбәдим быныштәмон де ... Атахани ијән де кали ҹо кәсон, тынән ожгәвон быби боәмә!” Де тәһәри розим еғанде әв, иҹо омәјмон. Рәсәјмон бә Москвә, бәмәшон хәбә дој ки, Атахан шә бә Боку!

            Ијо нимәдә огәтејдәм ыштә һикојоти, пијејдәме сә быкәм Атахани мәсәлә. Вотем, һичи әкәни, бәшем Бокујәдә бәгәтем әј! Әмма омәјм бә Боку, вотышоне ки, Атахан ижән шә бә Москвә!

2008-нә сори октјабри 8-дә омәјм бә Москвә. Мыни виндәкәсон вејни иглә Атахани һәхәдә гәп жәјдәбе. Ружи Ҹаваншир омәј. Әв чәмә мастәјлыже, әмма Ланкони Нујәдијәдә ныштејдән. Москвәдә рестораныш һестбе, Атаханән ко кардејдәбе әјо. Ҹаваншир воте ки, “Миәллим, ым Атахан һежо ҹурбәҹурә гәпон жәјдә ышты думо, быми гыләј нохтә ној лозимехо!” Вотем, “Ҹаваншир, ты дәрәсә одәмиш, ыштән чок зынејдәш ки, сыхани бә мерди дим бәвотен, әвән ја гынокорбу, бәштә гиј бәгәте, ја гирәм гынош ныбо, ыштә сыхани бәвоте! Ты ки бәмы вотејдәш ым сыхани, бызын, Атахани бәмыш вотәни әвон, ты бәмы вотејдәш әвони! Чокә зоәш, һәғиғәтән пијејдәбу нохтә бынәј бы мәсәлә, быши пегәт Атахани, бијә ијо. Димбәдим быныштәмон деәј, быдә бәчымы дим бывоты һәмон сыханон! Исбот бәка бәмы ки, һәхи вотејдә, аз дештә чич бәкам, бәвиндеш бәвәдә, ја исбот нызно карде, бәвәдә деәјән чич бәкам, әјән бәвиндеш! Ја ыми быкә, јаанки аз һежо бәвотем ки, ты бәмы вотејдәш ә сыханон!

Идомәш һесте 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|