ЧЫМЫ JОДЭДЭ МАНДЭJОН -42

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 19 голосов)
Изменить размер шрифта Decrease font Enlarge font
image

 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

42


            Чокнә ки нывыштыме пијо, “һукмәти одәмон” гыләјән чәм ыме ки, һар сәфә де одәми виндемон кардеәдә, вотејдән ки, “шымә фылон һәмро ја дусти, һәмфикири фылон сыханыш воте ја вотә шымә һәхәдә”. Чыми бәпештә вотејдән бә одәми ки, “виндејдәшон, әмә дустимон дешмә, һәтто жыго сыронән вотејдәмон бәшмә, һалбуки, ым чәмә сыре, әмә вотәнин нимон ыми!” Чәјоән тәклиф кардејдән бә одәми ки, “боән и быбән дејәмә, мәһв быкәмон һәмон одәми, чумчыко әв шымә дышмене!

            Бәчәвон бы тәлә еныгыныш вотәјнә, ән чокә чәм ыме ки, әвон жәго вотеәдә бәты, бывот: “Сәдо быкән ә шәхси, быдә бо бәчымы дим бывоты ә сыханон!” Чандә кәрә дәвинәм карде ки, ым чәм һар вахти чокә тәсир кардејдә, чы сыханон вәдә һичи зынејдәнин воте әвон. Бочи?

            Чумчыко әвон димбәдим быкон деты һәмон одәмон, иминәни, бәзне бе ки, чәвон кали гыләјнијон ко кардејдән бәвон. Әве әвон әпинишоне ки, бегули быкән ыштә ҹәсусон. Дыминәни, веј вахти әвон ыштәку песохтејдән ә сыханон, ыштәнән зынејдән ки, хонәхо вотәшни ә сыхан!  Гирәм фәрз быкомон ки, һәтто хонәхо ышты думо вотәшебу гыләј сыхан, һәлә факт ни ки, әв димбәдимән бәвоте әј! Семинәни, лап бывотәмон ки, вотәше, бәшты димән бәвоте! Әмма мәсәлә бымәдәј ки, димбәдим бо деты, тынән пышты гәтәни ки ыштә гәвәдә! Охо тынән гыләј сыхан бәвотеш, бәвәдә һәлә мәлум ни ки, чики сыхан рост бебәше – ышты ја чәј?

            Ружи бәмы вотышоне ки:

            -Ки быә ышты нымојәндә Боку ијән Озорбојҹонәдә?

-Чымы нымојәндә-фылоным быәни!

            -Охо чандә вахте Бокујәдә чајхононәдә, ҹо мәҹлисонәдә гыләј ҹывонә зоә дод кардејдә ки, һичмәсә ышты сәлоһијәтинә нымојәндәје әв Озорбојҹонәдә!

-Чәмә орандыжон вотәјнә, номир бывотән!

            -Акиф Меһтәмәнсон!

-Аз чокнә әзним әј тәјин карде ыштә сәлоһијәтинә нымојәндә ки, детобә ымружнә ружи һәлә виндәмни чәј дим? Тикәјән дырыст бывотом, иминә кәрә Акифи сәдом телефонәдә мәсә “Нефтчи” де “Каспи-Ланкони” Гәнҹәдә һәнәк кардедәдә. Бәвәдә аз Минскәдәбим, Каһин гәп жәјдәбе телефонәдә де и кәси. Ыштә сыханыш сә карде, чәјо телефоныш дој бәмы ки, “гәп быжән, Акифе!” Азән ды-се кәлимә гәпым жәј деәј! Вәссәлом!

            Ыштә сәдошон бырније, һәни и кәрән оныгардин чы сыхани сәпе. Хәјли дәварде, ружи виндыме Акиф, таныш бимон. Һәрби хыдмәто тәхсис быәбе. “Нәриманов” метро стансијә тоно гыләј чајхонәдә камиши гәпымон жәј. Бәвәдә әј гәпыш жәј бомы ым ғәзијә: “Гәнҹәдә хыдмәтәдә беәдә хәјли егынин чымы сәпе, рә-рә сәдо кардејдәбин мыни, ҹурбәҹурә парсон дојдәбин Толыши һәрәкоти, чәј нымојондон, шымә һәхәдә. Ружон ружони мыстәнтиғи бәмы вотыше ки, “Әбосзодә перохнијәше ышты ҹон, әј вотәше ки, һич вахти виндәшни ты, ҹәми и кәрә “Нефтчи” де “Каспи-Ланкони” Гәнҹәдә һәнәк кардеәдә, телефонәдә ды-се кәлимә гәпыш жә деты! Быши, һәни комон ни деты!”

            Жыго фактон вејин, әмма чәвон һәммәј һәхәдә нывыштеј фикәдә ним, воҹибән зынејдәним ыми. Әмма гыләјән мәсәлә һәхәдә бынывыштым. Ружи гыләј вәјәдә раст омәјм бәчәмә гыләј чокә толышә зоә. Бәнем, хонәхо хәјли сард быә бәмы, де зубәзу гәп жәјдә демы. Окырниме бә кәно, парсәјм ки, чы мәсәләје? Воте, “Миәллим, Милли Бетәһлукәти вәзарәтәдә вотышоне бәмы ки, һичмәсә, аз 2005-нә сори шәм бә Јереван бә Толышшыносәти конфранс. Мы вотыме ки, охо шәним аз! Әвон вотышоне: -“Ты зынејдәш, ки вотәше бәмә ышты әјо ше һәхәдә?” Вотем, не! Вотышоне ки, “Миәллими вотәше бәмә ки, тынән шәш бә конфранс!”

            Аз сырәјм. Вотем, “иминәниш ыме ки, аз чокнә бәзнем жәго сыхани воте ки, һәмәкәсисә чок зынејдәм ки, ты шәниш бә Јереван, чумчыко аз ыштән әјо быәм. Дыминәни, чымы Билә, ты жыго зынејдәш ки, иглә бәты вотејдән жәго сыхани? Бәмынән анә жәго вотејдән ки, “фылонкәси фылон гәпыш жә ышты һәхәдә!” Аз чич кардәниним? Бовә кардәниним бәвон? Әве аз бәвон вотејдәм ки, “вотәше, лап чок! Интаси сәдо быкән, быдә бәчымы дим бывоты!” Чәвон ко жыгонәје, әве әмә шәјтони идорә вотејдәмон бәвон! И кәрән жәго бывотон бәты ја чымы ја ҹо толыши һәхәдә, жәгоән бывот!

            Пешы әј жәгоән кардәшбе. Һәлбәттә, әвон мынышон сәдо кардәныбе, чумчыко ыштән чок зынејдәбин ки, аз жәго ғәләтым кардәни, сәдо быкон, ыштән сијодим бәбен! Әмма гыләј ҹо одәми ки чәмә чә Билә һәхәдә кали гәпоныш жәбе, әј әвыш доәбе сәдо карде, димбәдим быәбин, каши бешәбе бә дим!

            Пешы есәнә сәфә әј виндедә, бәнем кефыш коке! Воте, “Миәллим, иминә кәрәбе, сыхани рости тарсәјм, ыштәным гин карде, әмма есә һәни тарсејдәним, чумчыко шымә чокә чәмон омуте бәмы!

            Әве, чымы азизон, тади мәбән бо нәтиҹә бекарде! Бәшмә веј бәзнен воте ки, фылон толыши фылон сыханыш вотә шымә һәхәдә! Бовә мәкән бә шәјтонон сыханон! Әвон һежо жәго рыхнәшон еғандә толышон дыләдә!

            Иглән мәсәлә һәхәдә бынывыштым, демијән сә быкәм ым мывзу. Нәвузәли гәте бәпештә мынышон сәдо кардәбе бә МБВ бина, әјо мыстәнтиғ истинтоғ бардејдәбе. Әјән бәмы вотыше жәго гыләј сыхан: “Зә, аз виндејдәм, ты чокә мердиш, ҹигәмандиш, әнәтарсиш, әмма бә отәш шодојдәш ыштәни! “Әвон” пачкә-пачкә һәватејдән тыни! Бој и быбәмон мәһв быкәмон әвони!”

            Вотем, “чымы билә, “әвонән” толышин, азән толышим! Әмә дејәнды дустән бәзнемон бе, бәдән бәзнемон бе дејәнды, дышменән бәзнемон бе! Интаси ым чәмә ыштән које! Әмә ыштән бәзнемон дејәнды, ты бәпе бочи мијонрәв быби чәмә арәдә?

            Мәсәлә молјәт, чымы зынәјку, бымәдәј! Һич вахт имкон мәдән ки, ҹо кәсон дәшун бәшмә арә, бәјәнды быдән толышон! Жыго быкошон, веј ғәдо-бәлон тон бәшен шымәку! 

            Жыгонә, ружон, мангон дәвардин. Һәшт манги бәпештә һукмәти дастыш кәшәј чымыку. Бы вахти дыләдә һозым кардәбе ружномә “Шәвнышт”. 2006-нә сори мартә мангәдә чапо беше чәј иминә нумрә. Шим бә мәтбәә, пегәтыме тираж. Занг омәј бә телефон. Һукмәти одәмонбин. Ым чәвон охонә зангбе (пешы и-ды кәрән Нәвузәли мәсәләсә сәдошон карде мы). “Боку” меһмонхонәдә молағатымон карде. Тәғрибән ним саат гәпымон жәј. Ешимон бә со. Нез омәјм бә машини. Хонәхо воте ки, “мәсәме, ружномәон вадоә, росте?” Вотем, “бәле, вадоәме!” Воте, “чәј гыләј нумрә бәзнешон бәмы дој?” Сырәјм. Вотем, “чымы зынәјку, чәмә ружномә бенышә, чәј иминә нумрә мәтбәәо бошмә вығандејдән. Чокнә бејдә ки, шымә хәбәон ни?” Воте, “не, валлаһ, омәни бәмә”. Вотем, “жәгобу, бевәҹ ко кардејдәшон!” Сырәјмон. Окардыме машини шәләҹо бә, пегәтыме гыләј нусхә, доме бәј.

            Ды-се кәлимә бынывыштым че ружномә ғејдијото дәвоније һәхәдә. Һәмрон вејни нороһатбин ки, ғејдијото дәнибәвонен! Ружи шимон домоне сәнәдон бә Әдлијә вәзарәт.  Вотышоне, дырыст јодәдәм ни, фылон вахти бојшон. Һәмон вахти хәбә беше ки, Илһам Әлијев шејдә бә Минск. Каһини вотыше бәмы ки, ијо Озорбојҹони диаспорә һозы бејдә де Илһами бә виндемон, әмәни ғәбул бәка! Вотем, “де Әлијеви молағати вахти гыләј парс быдәјш бәј. Аз зынејдәм ки, әв тариф бәка ижән ыштәни ки, мәвотбән, Озорбојҹон демократик довләте, сыхани озоди һесте әјо ијән ҹо мәсәлон. Ты быпарсиш чәку ки, мадәм жәгоје, бәвәдә бочи Әдлијә вәзарәт ғејдијото дәвонејдәни чәмә иглә толышә ружномә?

            Маштәнә ружи Әдлијә вәзарәто зангышон карде бәмы ки, “ружномәмон ғејдијото дәвонијә, боән пегәтән ыштә лисензијә!

            Илһам ше бә Минск, әмма де диаспорә һич виндемонышән ныкарде!

            Шәвнышт”и беше гыләј јолә һодисә бе чәмә хәлғи ијән һәрәкоти тарыхәдә. Чы һодисә ән јолә әһмијәт бымәдәбе ки, чәмә толышон һисс кардышоне ыштә зу, бовәшон карде ки, гирәм әмә һәкәм быбомон, бәвәдә мымкуне ко карде! Чыми гыләј нышонә әв бе ки, әлбәһол толышә шаирон ијән ҹо ғәләмбәдастон вығандышоне ыштә нывыштәјон бә редаксијә.

            Ымијән бывотым ки, “Шәвнышт”и бешә вахтон чымы жимони ән хошә ружонбин. Де ружон ко кардејдәбим, кум бастејдәбим, бә шәв ружномә материалон сәпе бә кобим. Сыхани һәғиғи мәноәдә, бахтәвәр зынејдәбим ыштәни, чумчыко гырд озодбим! Виндемон кардејдәбим дештә дыли пијә одәмон, хәј-шәрәдә бејдәбим, һәмән дештә дыли пијә кој мышғолбим!

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|