ЧЫМЫ JОДЭДЭ МАНДЭJОН -41

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 26 голосов)
Изменить размер шрифта Decrease font Enlarge font
image

 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

41

 

            Бәс чич бе чәмә кәсимоти нәтиҹә? Һежо бә ружони гыләјнијәдә Каһини вығандыше бомы Әләкрәми гыләј бәјонот. Һандәкәсон, мәвужи, һандәшоне, зынејдән чәј мәзмуни. Аз иглә ыми бывотым ки, сәбәб бе ја ныбе, һа ружбәмијон бәјонот дој ыштән гыләј беҹоә мышғолоте! Бәјоноти вахтәдә, гыләј әломәтдорә һодисә беәдә бәдон ки, чәј хәјышән быбу! Әмма аз чич быкәм ки, ым бәјонот дој нохәши Әләкрәми (һежо кали ҹо кәсонән!) ҹонәдә Хәлғи ҹәбһә вахтику мандә! Бәвәдә Сәвети һукмәти вахтбе, чәј вахти мәмурон пемужијәныбин ки, кәси бәјонот бәдо, “рысво бәка” әвони! Әве, Хәлғи ҹәбһә одәмон шејдәбин мәмурон сәпе ки, “фылон мәсәлә быә, әмә бәјонот бәдомон!” Ә хонәхоән тарсику рәјрә фылон ғәдәр пули дәнојдәбе бәчәво ҹиф, әвонән шејдәбин бәштә ро!

            Мылхәс, бәјонотым һанде, сыхани рости бәчымы хош номәј, әмма чок-чоки редактәм карде, вығандыме бо Каһини. Әјән вығандәшбе бо Әләкрәми, әвән рози быәбе дечәј мәтни. Чәјо Каһини дәрҹыш карде һәмон бәјонот чәмә сајтәдә.

            Маштәнә ружи и кәрән бәнемон Әләкрәми һәмон бәјонот чәј ыштән дештә дасти нывыштә формәдә бешә “Јени Мусавати” сајтәдә! Аләм гарде бәчымы сә! Азә бә Каһини, Каһин бәј, пијәмоне умутәмон чыми сәбәби! Әләкрәм чич бывото, чоке? Вотәшбе ки, “Елхани доәше ә бәјонот бә һәмон сајт”. Елханән, шык бә Хыдо, пәрәныбе бә Марс, Һолландијәдәбе! Каһин парсәбе чәјку, әј ым ҹәвобыш доәбе: “Бәмы ки доәшбе ә дастинывыштәј ки, азән быдәм әј бә “Јени  Мусават?

            Бә коврә бәрәсе, “ебардыме” ым мәсәлә, вотем, “гыләј сәһве, быә һәни, мәһол хәробә быәни!” Әмма ды руж дәныварде, бәнемон Әләкрәми ижән нывыштәше гыләј бәјонот, һежо тәғрибән һәмон мәзмунәдә, һәмән һич нишош доәни бәмә, доәше әв бә “Јени Мусават”, әвонән чапышон кардә әв ыштә сајтәдә!

            Бочи? Сәбәб чичбе? Тосә ымружнә ружи нә Әләкрәми, нәән гыләј ҹо бәндә бәмы вотәшни чы парси ҹәвоб! Охо әмә кәсимотымон кардәбе, бәс чичбе чәј доә сыхани молјәт? Чичбе чә хонәхо мәғсәд?

            Һукмәти одәмон демы сыхан кардеәдә, и кәрә парсәјн чымыку бә бәјонотон чымы мыносибәти. Вотен ки, “шымә јио вотејдәшон ки, дустон беј пијејдә де һукмәти, әмма чә тәрәфоән Әләкрәм бәјонот дојдә “нахчыван-јераз клани һәхәдә”, әмә чы ғыјмәт быдәмон быми? Жыго бешедә ки, шымә дытирә һәнәк кардејдәшон дејәмә!” Азән вотем ки, “һич ыштәнән сәрәсејдәним, бочи әј доәше ым бәјонот, әве аз ыштәнән норозим чәвонку!

            Әмма чымы бә “мысоһибәдә” сәрловһә жыго нывыштә быәбе: “Әмә иттиһом кардедјәмон Әләкрәм Һуммәтови бәјонотон!” Интаси чок дығғәт быдошон, бәвиндешон ки, мәтни ыштәнәдә чымы сыханон чокнә һестбин, жәгоән доәшонбе. Әмма бо кали толышон һежо ә сәрловһә вәсбе ки, аләми бәјәнды быжәнын!

            Каһини әлбәһол зангыш карде бәмы. Мәсәләм воте бәј. Вотем, “тәкзиб быдә сајтәдә чымы номо!” Әмма әј зангыш кардәбе бә АПА сәр редактори, парсәбе ки, “ым чы мәсәләје, әмә тәкзиб дојдәмон, шымәнән тәкзиб быдән ки, Әбосзодә вотәшни жыго сыхан, сајтәдә сәһв шә!” Кинә вотәшбе бә Каһини ки, “Әбосзодә бо бәчәмә офис, нывыштә формәдә тәкзиб быдә бәмә, әмәнән тәкзиб быдәмон!

            Каһини вотыше ым сыхан бәмы. Вотем, “Биләма, ымән тәләје бомы! Охо аз мысоһибәм доәни бәвон. Есә бәшем тәкзиб бәдом, демијән ыштән бәштә сыбут бәкам ки, һәғиғәтән, мысоһибәм доә! Әве, шәкәс ним әјо, ты тәкзиби быдә сајтәдә!” Жәгоән кардымоне. Әмма ымијән вәсыш ныкарде бо кали толышон...

            Бә мысоһибәдә гыләјән мәсәлә аидбе бә Ирони. Ружи Масалоно омејдәбимон бә Боку. Елшәни быјә јасо омејдәбимон. Елшән ијән аз. Бә Әләти кам мандә занг омәј бәчымы телефон. Һукмәти одәмонбин. Бәмы вотышоне ки, “Ирони рәдио тәнғыдыш кардә шымә ки, бочи незкијәти кардејдәшон де Илһам Әлијеви һукмәти! Шымә нәзәр чокнәј бы мәсәлә?” Вотем, “аз есә машинәдә ро шејдәм, гушымән доәни бә Ирони рәдио, чы нәзәрым бәзне бе бә чиј ки, мәсәмни әв дештә гушон?” Вотен, “рәдион чокнә вотәше, жәгоән вотејдәмон бәшмә! Бәмә лозиме, шымә мыносибәти умутәмон!” Вотем, “һа биләма, охо машинәдә ше-ше, һәмән мәсәлә ыштән нымәсе-нымәсе чы мыносибәт бәзнем воте, ым ҹидди нихо!” Мылхәс, һәкәм мандин ки, кәлимәј бывотым. Вотем, “чы ғејри-ади ко һесте ки бымәдә? Ирон гыләј јолә довләте, чандә милјон мәхлоғыш һесте! Жәго әзыни бе ки, Иронәдә һәмәкәс рози быманды чәмә де Әлијеви һукмәти незкијәти кардејку! Әве, бәзне бе ки, жәләвонә норозијә одәмон гыләј сыхане вотәшоне, аз һич фаҹиә виндејдәним бымәдә!

            Ым мәсәлән жәгоән бешәбе чымы бәлобәсә “мысоһибәдә”. Каһини зангыш карде бәмы ки, “бочи жәго бәјонотон дојдәш, охо бәчәмә зијоне әв?” Һалим карде әв мәсәләку. Ашиш бе. Ымымән воте ки, “се руж һовсәлә быкә, һарчи мәлум бәбе!

            Зынәкәсон, мәвужи, чок зынејдән ки, де мәсәлә әлоғодор Мәло Фамили гыләј јолә кампанијәш тәшкил карде бәчымы вәјнә Москвәдә! Аләмыш бәјәнды жәј ки, һичмәсә “Фәхрәддин бә Ирони әкс бешә!” Чы кампанијә һәмә деталон нывыштејдәним ијо, лозимән зынејдәним ыми! Әмма ыми бывотым ки, һәғиғәтән, се ружи бәпештә әвон һәммәј пәшимон бин бәштә кардә ғәләти!

            Иминәни әј бывотым ки, бә Ирони әкс бешеәдә, чич бәбе ки? Һәмән ә дәмәрәсон ја һич дәрәсејдәныбин, јаанки зыне-зыне јаһу жәјдәбин ки, мәвотбән, аз “бә Ирони әкс бешәм”! Быдә һар гылә толыш чок-чоки ыштә јодәдә огәты ки, Ирон ҹоје, Ирони һукмәт ҹо! Әбосзодә һич вахти әкс шәни, нибәшејән бә Ирони! Чумчыко Ирон боәј Вәтәне! Интаси һәмон дәмәрәсон фәрғ ној зынејдәнин чы Вәтәни ијән һәвојә еһсани арәдә! Чымы бә Ирони меһиббәт чымы ијән Хыдо арәдә быә које, әј реклам кардеј фикәдә ним, бә һички чәшән дәфырсынејдәним! Әмма Ирони һукмәтән иборәтә ҹонинә инсононку, нә аз, нәәнки ҹо гыләј толыш мәҹбур ни ки, бәгәм быкә чә һукмәти сијосәти һәммәј! Мәсәлән, ком зоә бәштә толыш бәвоте ки, гирәм әв бәгәм быкә Ирони һукмәти 1993-нә сори әмәни һәвате? Бәгәм ироныжон ныбин, пијејдәшонбе ки, чәмә нымојондон бышун бә Ирони Осторо, әјо быгәтын Әләкрәми, тәһвил быдән бә Һејдәри? Һәлә ијо кали ҹо сыронән һестин ки, нывыштејдәним әвони! Әмә чич кардәнинимон, бәгәм кардәнинимон Ирони бәвәдә быә һукмәти ә номердәти? Бәлкәм һәлә тариф кардәнинимон?!

            Гыләјән мәсәлә. Ирони ыштә чандә гылә јолә вәзифәсојбә мерди бәвәдән вотәшбе бәмы, пешыән вотәшоне ки, “Иронәдә веј јолә мыхолифәт һесте Толыши мәсәләдә!” Жыго бешејдә, әвон ыштән бәзнен ыми воте, әмә әзынимон?

            Әве вотејдәм ки, се ружи бәдигә әвон һәммәј пәшимон бин бәштә кардә ғәләти! Ирони ыштән нымојәндә ки, Москвәдә бәвәдә иштирокыш кардәбе бә кампанијәдә, се ружи бәдигә бә гијыш гәтәбе ки, “әмә сәһвымон карде, чумчыко чәмә бардә кампанијә хәјыш бе бә Абосзодә”. Ымән че Мәло кардә ко!

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|