ЧЫМЫ JОДЭДЭ МАНДЭJОН -40

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 53 голосов)
Изменить размер шрифта Decrease font Enlarge font
image

ЧЫМЫ ЈОДӘДӘ МАНДӘЈОН

40

 

            Дыминә мәсәлә. Ыми азән чок сәрәсејдәбим (есән сәрәсејдәм), жыго зынејдәм, веј ҹо толышонән сәрәсејдән ки, хысуси хыдмәти органон кој һестыше ыштә хысусијәтон:
            1) Әвон де һар воситә пијејдәшоне ки, одәм бовә быкә бәвон. Әве де һәзо чәми нам-нами гәп жәјдән де одәми ки, хомә одәм бәвоте, һежо чымы лап незә дустин әвон! Ым чәвон које, әве һички сыханыш әзыни быми бе! Интаси дејәвон сыхан кардә одәм бызно ымони, һәнијән чок ијән роһат бәбе бочәј ыштәни!

            2) Әвон һежо бәпијошоне ки, де тәһәри бә тәлә еғандын одәми. Чыми һестыше чандә гылә чәмон. Чәвон гыләјни һәхәдә гәпым жәј пијо: Бекардејдән одәми бә телевизијә, дојдән бәј кали сыханон воте, чәјоән кәноку даскә кујејдән ки, “ыштә комон винде!

            3) Һар сәфә де одәми виндемон кардеәдә, вотејдән ки, “шымә фылон һәмро ја дусти, һәмфикири фылон сыханыш воте ја вотә шымә һәхәдә”. Чыми бәпештә вотејдән бә одәми ки, “виндејдәшон, әмә дустимон дешмә, һәтто жыго сыронән вотејдәмон бәшмә, һалбуки, ым чәмә сыре, әмә вотәнин нимон ыми!” Чәјоән тәклиф кардејдән бә одәми ки, “боән и быбән дејәмә, мәһв быкәмон һәмон одәми, чумчыко әв шымә дышмене!

            4) Әвон һич вахти ыштә дијәни генҹән кардејдәнин де одәми сыхан кардеәдә. Хомә одәм жыго бәзне ки, бәлкәмән һич әсәбышон ни чы шәхсон! Нәтиҹәдә одәмику жыго  тәсәввур бә әмәл бәзне оме ки, “чымы вотә сыханон һәммәј хош омејдән бәвон, аз һарчи сәрост вотејдәм”. Чиче чы чәми тарс? Ыме ки, ты гин кардејдәш ыштә сәзукинәти, јодо бекардејдәш, деки һәмсыханиш, әве ләс бејдәш, дәмандејдәш бо веј чијон воте!

            Һәлә ки нывыштыме ым хысусијәтон, иншаллаһ, лозим быбо, вәомәдә бәнывыштем ҹо гылонән. Ыштә гәпи идомә кардејро, һәлә ки ым шәртон нывыште воҹиб зынејдәм.

            Бино кардејдәм иминә хысусијәтику. Пијо нывыштыме ки, әвон чанә дастпочә бин ки, мыни бекән бә телевизијә. “Нумрә” дәныварде. Әмма чыми мәно ым ныбе ки, әвон дастышон кәшәј ыштә чә хосјәтику, чәмику! Бәвәдә әвон оваштин бә “план Б”.

            Сыфтә мынышон сәдо карде бә ружномә “Зеркало” редаксијә. Мәғсәд ымбе ки, мысоһибә быдәм бәвон. 2-3 саат гәпымон жәј, ҹәвобым дој бәчәвон парсон. Әмма бәвон вотыме ки, ыштә ҹәвобон азән нывыштејдәм ки, гирәм шымә тәһриф быкошон чымы вотәјон, бәвәдә әмә ым ҹәвобон бәдомон ыштә сајтәдә. Рози бин. Әмма мысоһибә беныше...

            Ружи кәдә ныштәбим, занг омәј бәчымы телефон. Гыләј мојнәбе. Едаштыше ыштән:
 -Аз чы Информасијә әгентәти АПА сәр редакторим (Номыш јодәдәм мандәни). Имконон һестебо, әмә пијејдәмоне гыләј мысоһибә пегәтәмон шымәку.
            Вотем,
розим! Мојнә воте, “жәгобу, бәвәдә маштә гыләј зәһмәт быкәшән боән бәчәмә редаксијә, ыштә парсон бәдомон бәшмә, бәнывыштемон шымә ҹәвобон”. Вотем, чок!

            Маштәнәј шим бәчәвон редаксијә. Гыләј ҹывонә зоә беше бәчымы нав. Вотем, “кыве шымә сәр редактор?” Воте, “әв һәлә омәни, әмма шымә боән быныштән чымы кабинетәдә, тикәј бәпештә әв боме”. Ныштим чәј отағәдә. Ә хонәхо бәштә кобе ыштә компјутерәдә, и кәлимәшән хәбә ныстәнәј чымыку. Камиши чәшым карде, пешы сәрәсәјм ки, ә мојнә омәкәс ни, чәвон мәғсәдән мысоһибә пегәте ни чымыку! Зынәме ки, бәвон лозим быә чиј әве ки, аз бом бә редаксијә, мыни бывиндын ијо! Зынәме ки, чәвон кәләкышон һесте!

            Тикәј бәпештә бешим шим бә шәһр. Маштәнә ружи чымы “мысоһибә” беше кали һукмәти сајтонәдә! Бә һандәкәсон чок мәлуме ә мысоһибә мәтн, әве сәнибәтон нывыштејдәним әј ијо.   Ымијән чок зынејдәшон ки, детобә ымружнә ружи кали номердә толышон һар вырәдә дастәвуз кардејдән ыштә дастәдә ә мысоһибә, иттиһом кардејдән мыни “бә Әләкрәми хәјонәтәдә” (Һилали һәхәдә быә гәпоным нывыштәбе пијо, әве тикрор кардејдәним әвони)! Ым “хәјонәтән” ыме ки, һичмәсә, аз вотәме әјо ки, “әмә иттиһом кардејдәмон Әләкрәми охонә бәјонотон”!?

            Һәшјә. Һички шәк ныкә ки, аз Һолландијәдә беәдә, де Әләкрәми но-пегәтымон кардәбе чымы бә Озорбојҹон ше мәсәлә. Сыхани рости, һежо чәј јолә тәсирыш быәбе чымы ым ғәрори ғәбул кардеәдә! Һежо вотејдәбе ки, “әмә бәпе быбәмон ыштә хәлғи дыләдә, ше лозиме бә Озорбојҹон!” Азән бәј вотыме ки, “гирәм веј јолә ғәһрәмонәти һисоб кардејдәшбу бә Озорбојҹон ше, быдә жәгоән быбу, аз бәшем!” Әмма ымән һесте ки, әмә но-пегәтымон кардәбе чымы бә Озорбојҹон ше шәртон. Чәвон гыләјни ымбе ки, мадәм бәмә лозиме ыштә хәлғи дыләдә быбәмон, бәвәдә бәпе “нам” быкәмон ыштә кали нәзәрон ијән мовғејон! Охо бәчәмә хәлғи һичи әдәни, гирәм һәбс быкән шәкәси! Бәмә лозиме ки, шәкәс ко бызны карде де хәлғи! Әве, кәсимотымон кардәбе ки, аз ки шим бә Озорбојҹон, бәвәдә мыәјјән мыддәти дыләдә чәмәһон һар гыләјни тикәј һоди бәбе ыштә гәпәдә ијән һәрәкәтонәдә ки, аз ко карде бызным де хәлғи! Һәмән бә ғәрор омәбимон деәј ки, нә әв, нәәнки ҹо һички чәмәку бехәбә һич гылә бәјонот нибәдо! Һар гылә бәјонот ја мәғалә, ја мысоһибә әмә коллектив мызокирә бәкамон, чәјо охон варианти бәвғандемон бә мыәллифи, чәј ғејдоныш быбон, әвонијән бә нәзәр бәстәнемон, чәјо материал бәше бә чап.

Идомәш һесте

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (1 добавлено)

  • Опубликовано Rabil, 03 Октябрь, 2016 21:33:21
    OTƏĞ sıxani tırkizme...

Главные новости

|