СЭЛЭНДЭРЭ БОЭ НЭFЫЛ

СӘЛӘНДӘРӘ БОӘ НӘҒЫЛ

            Гыләј һестбе, гыләј ныбе, ғәрәјз Хыдо һички ныбе. Ды гылә боә һестбе. Рукә боә веј сәләндәрбе. Јолә боә һа бәј бы барәдә танә жәјдәбе, һич хәјрыш бејдәныбе.

И руж јолә боә бәрк нохәш гыније. Ыштә таспеш дој бәштә рукә боә, вотыше: - Ыми мыку јодигор огәт, гин мәкә.

Јолә бо ше бә Хыдо рәһмәт. Рукә бо бардыше ғәбыстонәдә әвыш дәканде. Дәкандејәдә фикыж ныбе, боә доә таспе егыније бә ғәб, едоше әчәј сәпе. Омәј бә кә. Бәчәј јод дәше таспе. Чәнә нәвәј, пәјдош карде нызнәј таспе. Женикуш хәбә сәј. Әјән нызнәше чы таспе вырә. Огарде бә тыбәсо дештә омә рој. Роәдән пәјдо ныбе таспе. Боә ғәбыш канде. Бәне боә мард ни ғәбәдә, ијо гыләј һыл - ләғым һесте. Дәше бә ләғым, рош гәте ше. Се сор рош карде, бә гыләј кәјбә раст омәј. Окардыше кәјбә, бәне, чәј јолә боә де јол-јолә одәмон ныштә, таспејән чәј дастәдә гордынејдә. Нез бе бә боә. Јолә боә де танә дијәш карде бәј, вотыше: -Быши, ыврә вәјште, ышты вырә ни. Таспешән ныдој бәј.

Рукә боә ку-пәшимон огарде де ләғыми бә думо. Омәј бә кә. Виндыше, жени кәдә чич бә һәватәже, һардәшоне. Әғылоныжән бо ҹо-ҹо одәмон нокәти кардејдән. Бәрк пәшимон бе. Ҹәмати бәј танәш жәј ки, бәс ты шәш соре конҹош, ышты кә хәробә бә, әғылонән бә дастон мандән? Рукә боә ыштә сәләндәрәти дастәдә бә бевәҹә руж манде сәрәсоән, һәни ди бе.

Осмонәдә се гылә сеф егыније: гыләј чымы, гыләј чы нәғылбывоти, гыләјән әчәј бынывышти.