ЧЫМЫ JОДЭДЭ МАНДЭJОН -38

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 30 голосов)
Изменить размер шрифта Decrease font Enlarge font
image

 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

38

 

            Есә јодәдәм мандәни манги чандбе, чымы хыјзон де әғылон омәјн бә Боку. Бардымоне ыштә әјн-унон, екардымоне кәдә. Әмма чәмә мәнзыл жыго гыләј ружәдәбе ки, жијеј мымкун ныбе әјо. Әмә Русијәдә беәдә, гыләј жен кирәкәш мандәбе кәдә, молјәтиш ғандәбе кә. Тәмир кардејро пул ныбе, әғылонән бә Минск шәнинбин бә институт. Әве бә ғәрор омәјм ки, бәһватым кәј.

            Һаруж шејдәбим бә паспорти идорә. Боштә паспорт сәнинбим ки, чәјо бо зоонән быстәным. Бә ше-омә дәғандејдәбин, дојдәныбин ки дојдәныбин! Ружон ружони и кәрән омәбим бә паспорти идорә, рәиси бәмы вотыше ки, “фылон кабинетәдә шымәни бә чәшин”. Дәшим, бәнем се кәс ныштән әјо. Сәломым дој, ныштим. Әвон вотен, “әмә чы Дылә коон вәзарәти коәконимон, омәмон ки, гәп быжәнәмон дешмә паспорти һәхәдә”. Гәдә бығәсырәјым карде, вотем, “кејнәку Дылә Коон вәзарәти коәкон мышғол бејдән де жыго коон?” Сырәјн, вотышоне, “мадәм ки, шымә сәрәсәјшон, бәвәдә рости вотејдәмон: Әмә че Милли Бетәһлукәти вәзарәти коәконимон!” Вотем, “ым ҹо мәсәлә! Есә бывотән, ым чы мәсәләје, бочи омәшон?

            Тәғрибән се саат ныштимон дејәнды кабинетәдә. Чәмә һәмрон гыләјни чәш кардејдәбе мыни соәдә. Әлбәһол сәрәсәбе ки, чы мәсәләј. Һар 2-3 дәғиғәдә занг омејдәбе бәчымы телефон. Һар вырәо чәмә толышә һәмрон занг кардејдәбин ки, “конҹош?” Ым зангон нороһат кардејдәбин омәкәсон...

            Жыгонә, чымы де һәмон одәмон молағатон дәкәшәјн һәшт манг! Һафтәдә 2-3 кәрә сәдо кардејдәбин мыни, 5-7 саат гәп жәјдәбимон. Жијо бәнывыштем чә гәпон һәхәдә. Ијо паспорти мәсәлә һәхәдә нывыштејдәм.

            Бәвон вотыме ки, “чымы әғылон шәнинин бо һанде. Чымы паспорти огәтән ыштәку, ајбыш ни, әмма имкон быдән, әғылон быстәнын ыштә паспортон, бышун”. Әмма рози ныбин. Сәбәб?

            Мәсәлә бымәдәј ки, иминә ружи һежо әвон парсәјн чымыку ки, “комонин шымә планон?” Вотем, “иминәни, пијејдәме, бышум бо жије бә Ланкон, дыминәни, ыштә номижә быдәм бә парламент Ланконо”. Де әдәб-әркони хаһишышон карде ки, бә Ланкон куч ныкәм, ыштә номижән ныдәм бә парламент. Рози бим.

            Интаси әвон еһтијот кардејдәбин ки, паспорт быдон бәмы, аз ыштәнбәсә бәшем, ыштә номижә бәдом бә парламент. Әве паспортышон дој бәмы августи 28-дә – бә парламенти номижон ғејдијот сә бе бәпештә. Манги 27-дә маштә-маштә аз чәвон тонобим. Паспорти идорәо зангышон карде бәвон ки, “Әбосзодә паспорт һозыје, бәзне пегәте”. Аз әштим сәпо ки, бышум быстәным паспорти. Әвон нороһат бин. Вотем, “чи бе ижән?” Вотен, “шымә әзјәт мәдән бәштә, әмә бәстемон паспорти, бәдомон бәшмә”. Аз сәрәсәјм чәвон нороһатәти сәбәби. Вотем, “шымә тарсејдәшон ки, аз паспортым сәј, әлбәһол бәшем бә Ланкон, ыштә сәнәдон ебәдаштем бә сәчыни комиссијә?” Сыре-сыре вотышоне: “Һарчи бәзне бе”. Вотем, “һәни сыханым ни бәшмә!

            Мылхәс, паспортым сәј. Әмма детобә бо әғылон паспорти сәј сыпә әзобым кәшәј! Бы вахти дыләдә кәм һәвате, гыләј отағым бә кирә гәте, кучымон карде әјо. Октјабри 25-дә әғылоным дәро зынәј карде! Минскәдә ғәбулышон кардәныбе әғылон. Фәғырә Каһини де һәзо әзоб-әзјәти розиш еғандәбе әвон...

            Шим бо кәј нәве. Бинәдә чәмә әғылон вотышоне ки, “ијо быһырош кәј, чок бәбе, дејәмә иврәдә бәбеш”. Хәјли нәвәјмон, охој гыләј кәмон бәгәм карде. Коләфә кәбе, чоглә диво, тәмирыш ныбе. Ыштә һәмром варде ки, дијә быкә. Суте-суте бәмәј ки, “әмә чокнә бәжијемон бы коләфә кәдә? Пулымон ни ки, тәмир быкәмон, навоән зымыстон омејдә!” Де тәһәри ашишым карде әв.

            Чәмә диј әғылон сәғ быбун, һәммәјәво гырдә бин, дәмандин бо кәј тәмир карде. Чымы бибизоә Әсәд дечымы рукә быјә Арази шәв-руж бә кобин, мандә әғылонән бәруж шејдәбин бәштә ко, шанго омејдәбин. Харҹи вејнијән чымы биби әғылон, чымы быјон ијән чәмә дијовыжә әғылон кәшәшоне. Хыдошон комәг быбу! Жыгонә, тәһәри дәмојә вардымоне кә. Оваштимон бә тожә кә.

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|