ЧЫМЫ JОДЭДЭ МАНДЭJОН -36

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 26 голосов)
Изменить размер шрифта Decrease font Enlarge font
image

 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

36

 

            Маштә руж обәј, ҹәмати вә обәј. Дијовыжон, ов-авлодон, дустон ијән танышон дестә-дастә омәјн бә пишвоз. Гыләј чәшәдә шојво, бә гыләјәдә гылә-гылә арсон, виндымоным карде де чандә толышон!

            Манги вистәдә Инә сорбе. Әве бәмы лозимбе ки, быстәным ыштә паспорти ки, сәрбәст бызным һәрәкәт карде. Әмма һежо иминә ружи зынәме ки, бәмы паспорт дој фикәдә нин әвон. Әмма ыштәным вәғын ныној, сәнәдоным тәһвил дој бә паспорти идорә.

            Манги нонзәдә шим бә ди. Шәви и нимәдә рәсәјм бә ди. Дијовыжон жены-мерд һәммәј чәмә кәдәбин.

            Маштәнәј шимон Инә ғәбисә. Зијорәтым карде ыштә мардон ғәбон, мәлон Ғыронышон һанде, чәјо еһсанымон дој.

            Кәнокујән омәбе хәјли одәм. Иминә кәрә Аллаһверди миәллимым винде һәмон ружи – де Забили омәбин.

            И һафтә мандим дијәдә. Шәв-руж пур бејдәбе чәмә кә ијән чәмә со. Товыстонә шәвон, ныштејдәбимон чәмә боғәдә, һа гәп жәјдәбимон!

            Бә ди омә ружи машкинәј шанговәсәј ижән ныштәбимон соәдә, бәнем чымы икизә һовон бәме-бәме бешин кәо. Вотем, чич быә? Вотен, бој һәлә дијә быкә бә телевизори, буни чичон вотејдән ышты һәхәдә?!

            Дәшим бә кә, бәнем һукмәти телевизијәдә нишо дојдән Ликәдә ијән Ланконәдә быә “митингон”. Һар вырәдә 10-15 одәмышон де зубәзу рози еғандебә ки, митинг быкән. Ликәдә пеш кој гырдә кардәшонбе Маарифи идорә коәкон ијән ды-се кәс ҹо шәхсон, чәвон ды-се кәс ҹурбәҹурә гәпон жәјдәбе бәчымы унвон!

            Сырәјм, вотем - һич нороһат мәбән, әвон һич ғәләт әзынин карде! Ашишым карде әвон, бешим бә со. Мердон омәјн гырдә бин, ныштимон бә мәшвәрәт. Мәхлоғ һәммәј нороһатбе. Вотен, ышты фикы чиче, чич пијејдә быкәј? Вотем, “сыфтә пијејдәме бызным ки, сипиришон фикир чиче?” Бәмы вотышоне ки, “ыштән һичи мәкә, быдә се кәс сипириш маштә бышу бә Иҹро һакимијәт, бунәмон чич вотејдән?” Вотем, “де шәрти ки, һич хаһиш, ловә-мыннәт мәкәнәһа! Аз рози нибәбем ки, шымә ехроҹ быбән чәвон вәдә! Сыхани рости, аз һич рози ним ки, шымә бышән бәчәвон по! Әмма мадәм ки, жыго мәслоһат зынејдәшон, рози бејдәм ки, быдә нывотон, аз бәштә зынәј зу жәјдәм!

            Маштәнәј се кәс ше бә Лик. Печоштә омәјн. Мәлум бе ки, сәриҹро мәсәше чәвон оме, бешә шә бә Зујән. Чәј иминә мыовини де ҹо гыләј мыовини ғәбул кардәшбе әвон. Бә сипиришон вотәшонбе ки, “Фәхрәддин аеропортәдә ныштә дәғиғәку әмә тарс-ларзи дыләдәмон ки, гин бәкамон ыштә вәзифә. Әве хаһишымон ыме ки, чәмә һич комон ни деәј, әмма быдә бешу бышу бә Боку, ныманды ијо!

            Вотем, “чок, мәсәме шымә! Шымә мәслоһат чиче?” Вотен, “әмәнән һежо чәвон вотәј вотејдәмон!

            Аз тикәј әсәбым карде. Вотем, “шымә вотәј ыме ки, аз бешум бышум ыштә дијо, пешы бывотын ки, Быләбандәдә гыләј мерд ныбе, Фәхрәддин вите ыштә дијо?” Сипиришон һәммәј мот мандин, һичишон нывоте!

            Вотем, “чок, есә бымәсән мыни! Ыми бызнән ки, аз шәниним бә Боку ки, ыштә паспорти быстәным, әмма мадәм ки әвон жыгошон карде, бәвәдә һичуне әшыним, тосә охој бәмандем ијо! Әвон кин ки, аз бывитым чәвон вәдә?!” Бәштә амјәзо Мығәддәси вотыме, “Зә, һозышон бо ҹанги?” Ҹывонон һәммәј бә и гәв вотышоне “һозымон!” Вотем, “чики кәдә тифанг һестебу, пегәтән боән, ҹанг бәкамон!” Сыфтә кали пијәмердон тарсәјн чымы сыханонку, Кали кәсон жәго зынәшоне ки, зәрфәти кардејдәм. Әмма бешы бовәшон карде ки, зәрфәтијә ком ни, ҹидди вотејдәм. Камиши дәварде, гыләј сипириши вотыше: “Зә, марде мардеје, ым хыр-хыр һәни чиче? Чич бејдә, быдә быбу! Һәни бә пешы окырије ни, тосә охој бәмандемон!

            Вотем, “һа бәшмә ғырјәти ғыбон! Есән гуш быдән, һәни чичон кардеј фикәдәм: Маштә әризә бәнывыштем бә сәриҹро ном. Ғанунәдә бәпе 7 руж бәнав әризә быдәј. Бәнывыштем ки, чымы һәхон дарыштејдән, шәр ғандејдән бәмы, әве иҹозә быдән аз ыштә митинги дәвоным Лики мијонәдә! Сеглә әризә бәнывыштем: Бә сәриҹро, полиси рәиси ијән милли бетәһлукәти идорә рәиси. Бәдом бә и кәси, быбәјшон ыштән едаштишон һәмон идоронәдә. Чәјо дијә бәкамон, чиччон бејдән!

            Ҹәмати һәммәј әһвол ибердәмә чок бе. Де шојво идомә кардымоне ыштә гәп.

            Маштәнә ружи тәғрибән саат 10-дә полисәдә ко кардә чәмә гыләј хышәванд омәј чәмә кәј. Әлбәһол зымәне, бочи омә, әмма ыштәным вәғын ныној. Тикәј гәпыш жәј, бәнем воте зынејдәни ыштә мәғсәди. Вотем, “мәтарс, бывот бочи омәш?” Воте, “сыхани рости, маштә-маштә сәриҹро, полиси ијән МБИ рәис иҹо мышовирәшон дәвоније. Бәмышон воте ки, быши, бини, чич карде фикәдәј Миәллим?” Вотыме, чичон кардеј фикәдәм. Бәмыку хаһишыш карде ки, һәлә һичуне әризә мәдә, чәш быкә чымы ҹәвоби. Вотем, “чок, беәјән маштә выжорә руже, чәш кардәниним пашонә ружи. Быши, әмма вахтәдә быросын бәмы чәвон ҹәвоби!

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|