КИ КЫШТЭШЕ hЭЗИ ЭСЛАНОВ ? – Толышпресс ТВ

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 30 голосов)
Изменить размер шрифта Decrease font Enlarge font
image
 
 

КИ  КЫШТӘШЕ ҺӘЗИ ӘСЛАНОВ ? Толышпресс ТВ

ТМВ_23_09_2016_

            Чымы азизә быјон ијән һовон!

            Шымә чок зынедәшон ки, Лејла һовә бәфоманде бәштә сыхани! Дәвардә сәфә сыханым доәбе бәшмә ки, чәмә хәлғи јолә Мерд, генерал Һәзи Әсланови ғәттоли һәхәдә гәп бәжем, де објектив фактон ијән дәлилон исбот бәкам ки, ком мәлун баис бә бәчәј марде! Ымһа, есә әмәл кардедәм бәштә доә сыхани, едаштедәм бәшмә һәмон фактон ијән дәлилон. Нез быныштән бәчәмә екрани, де дығғәти гуш быдән бәштә һовә!

            Чымы азизон! Аз зынедәм ки, чәмә толышон вејни чок зынедән әфсонәви генерал Һәзи Әсланови тәрҹумеји-һоли, чәј дәвардә шәрәфинә рој. Әве ијо чәј жимони кали мәсәлон һәхәдә мәлумот бәдом ки, веј ныдожным шымә сәј.

            Һәзи Әһәди зоә Әсланов пенҹо пенҹминә әлоһиддә танки полки командир, сивы пенҹминә гвардијә танки бриғәдә сәрһәнг, - моәку бә и һәзо нәвса даминә сори јанвари висты дыәдә Ланкони ди Гамәтукәдә чы коәкә хыјзонәдә. И һәзо нәвса сивы һафтминә сорику Коммунист партијә узв бә. Тәһсилыш ниманҹулә мијонә тәһсиле. Ланкони кәрпуҹи кархонәдәш ко кардә. И һәзо висты нәвминә сорику Ғызылә Ордујәдә хыдмәтыш кардә. Һандәше чы Зағафғазијә һәрби һозыәти мәктәбәдә Бокујәдә. Сәш кардә Ленингради кавалеријә мәктәб, чәјоән чы Симинә ләшғәрон Һәрби академијә. И һәзо сивы нәв-и һәзо чылминә соронәдә ҹангыш кардә совети-фини ҹангәдә. Јолә Вәтәни ҹанги бино быә ружику ҹәбһәдә бә. Иминә кәрә Сәвети Иттыфоғи ғәһрәмон номыш ијән “Ғызылә астовәш” сә и һәзо нәвса чылы дыминә сори декабри висты дыәдә. Фик быдән, чич нывыштедәбе бәвәдә ружномә “Краснаја звезда”: “Ҹанги тарыхи һәлә виндәшни бәнә Һәзи Әсланови ијән чәј ҹанги һәмрон”.

            Пешы гвардијә генерал-мајор Һәзи Әсланови командирәтиш кардә бә сивы пенҹминә танки бриғәдә. И һәзо чылы пенҹминә сори јанвари висты пенҹәдә Литвәдә шә ҹангон гыләјнијәдә шәһид быә. Һәзишон дәкандә Озорбојҹони појтахт Боку шәһрәдә. И һәзо нәвса нәве иминә сори Һәзи Әсланови пеш марде дыминә кәрә сәше Сәвети Иттыфоғи ғәһрәмони ном. Медал “Ғызылә астовә”шон бәвәдә едаште бәчәј авлодон.

            Дустон вотедәбин бәј “Генерал-Шимон!” ијән “танки Суворов”. Әв бә һар ҹанг шеәдә, “Шимон!” әвоти, демијән бә һәвәс әвәј ыштә сәрбозон. Һежо ым сыхан вәс кардедә ки, әмә бызнәмон ки, чәј миллијәт толыш бә!

            И һәзо нәвса чылы пенҹминә сори јанвари вистәдә гыләј ҹангәдә Һәзишон јарәжә карде. Әвышон ној бә ҹәбһә һоспитал. Чәјо сәдошон карде әв ки, гәп быжәны де Москвә. Бәј хәбәшон дој ки, әвышон тәјин кардә Озорбојҹони республикә мыдофиә назир!

            Детобә јанвари висты сеј Һәзи әвәз кардедәбе гвардијә полковник А. Новиков. Әмма чәј ко хош омедәныбе бә генерал Обухови. Әве әј сәдош карде Һәзи бә думо, тәбрикыш карде әв де тожә вәзифә, чәјо әжош карде ки, Һәзи ыштән бышу осә быкә ҹәбһәдә һәрби вәзјәти. Јанвари висты чоәдә Һәзи шәхсән нәвәј ҹәһбә чы сә-бә сә. Јанвари висты чоәдә Приекуле мәнтәғәдә отәшпори отәшыш окарде бәчәј мандә вырәј, јарәжәш карде әв. Оружи Һәзи асбардыше! Бәвәдә чәј сивы пенҹ син дамәбе, бо Ғәләб ружијән мандәбе ҹәми се манг! Ән чочинән әвбе ки, чәј дуст мајор Бегишвили нывыштедә ки, Һәзи тазыш чокбе, әмма бәмә хәбәшон дој ки, се саати бәпештә әв ибердәмәдә асбардыше! Ым ко боәмә веј чочин манде!

            Чымы азизон! Ыми бывотым ки, бо һар гылә толышијән веј чочинә мәсәлә һежо бымәдәј ки, чокнә бе ки, һәзишон жәј мандә вырәдә, чокнә бе ки, чәј таз чок бе-бе, ибердәмәдә әв бә рәһмәт ше? Боән бә иҹо вағиф быбәмон бә кали сырон.

            Ыми зынедәшон ки, Һәзи Озорбојҹонәдә игләлијә мердбе ки, ды кәрә сәшбе Сәвети Иттыфоғи ғәһрәмони ном. Ымән бәшмә мәлуме ки, һәлә дынјо ҹанги бәнав Сталини мәслоһатыш зынәбе бә Озорбојҹони јолон ки, әвон бынывыштын ыштә хәлғи ијән довләти тарыхи, бысохтын әј. Әве Бокујәдә тадибәсә дәмандәбин бо тарых нывыште. Бы китобонәдә чәмә толышә хәлғи чан һәзо сорнә тарыхышон ијән чәмә чандә гылә тарыхи ғәһрәмононышон нывыште бәнә “озорбојҹоныжи”, јәне елонышон карде әвон “тырк”! Һәзи Әсланови ғысмәтән жыго бе. Чәј мардә ружику жыгошә, Озорбојҹонәдә лу-пуст кардедән ыштәни ки, сыбут быкән бә дынјо ки, һичмәсә, Һәзи тыркебән! Чәј һәхәдә нывыштә китобонәдә нывыштедән ки, мәвотбән, Һәзи Гамәтуки тыркә кужәдә бә дынјо омәјбән! Шымә чок зынедәшон ки, Гамәтукәдә детобә ымружнә ружи и кәсән тырк жијәни!

            Чәјоән, Озорбојҹони һукмәти бә толышон вәјнә кардә һәзо-һәзо ҹинојәтон номијән гәтедәнин, әмма һежо бә даст-почән ки, ыштәку әфсонә песохтын Һәзи Әсланови ғәттолон һәхәдә, нијо быкән чәј марде сәбәбкорон! Озорбојҹони рәсми һукмәти консепсијә иддо кардедә ки, гуја генерал Баграмјани суи-ғәсдыш крадә бо Һәзи, нәтиҹәдән әв мардә! Бәчәмә вејнә толышон мәлуме чы версијә мәғсәд!

            Чандә соронин, әмә нәведәмон бо етибојнә дәлилон ијән сыбутон ки, бызнәмон кије чы Һәзи марде сәбәбкор? Шык бә Хыдо, чәмә зәһмәти ыштә бәһрәш дој. Жәго дәлилон ијән фактон есә һестин чәмә дастәдә. Есә чәвон һәхәдә гәп бәжем бошмә.

            Вејнә толышон мәвужи мәсәшоне Сәвети һукмәти јолә мәнсәбсојбә мерди, Довләти плани комитә сәдр, Бокујәдә моәку быә Николај Бајбакови ном. Ды һәзо иминә сори мәрһум Бајбакови гыләј китобыш нывыштәбе, чәј ном “Чымы вәтән Озорбојҹоне”. Бәвәдә ым китоб һозы беәдә, Москвәдә жијә Физули Мәммәдов номәдә гыләј нахчываныжә бизнесмени әлбәһол чапыш кардәбе ә китоб, әмма һич дијәшән кардәныбе ки, чичон нывыштәше Бајбакови ыштә китобәдә.

            Әмма китоб чапо бешенҹән, гымон бәбе карде ки, әв егынијә бә вахти Озорбојҹни президент быә Һејдәр Әлијеви даст. Еһтимолән, Һејдәри һандәше, чә китобо доәше бекарде Һәзи Әсланови марде сәбәбкорон һәхәдә быә вәслә. Чәмә шәкымон ни ки, мәһз Һејдәри доәше гырдыку карде чә китоби иминә нәшр һәммәј, чәјо чәсбони доәше дыминә кәрә чап карде ә китоб. Әмма Русијә толышон диаспорә јол чәмә билә Исмоил Шабанови бә вахти шәхсән һандәше бә китобәдә Һәзи һәхәдә нывыштәјон. Чәјоән Исмоил шә Бајбакови тоно бәчәј боғи кә, әјо димбәдим гәпышон жә Һәзи һәхәдә, Бајбакови шәхсән тәсдығыш кардә ки, чәј нывыштәјон һәғиғәтин!

            Әмә чан соронин нәведәмон Русијә китобхонәнәдә чә китоби иминә нәшри, әмма әв ни ки ни! Һәтто мәшһур китобхонә Ленинкәдән ни ә китоб! Чә китобхонәо китобон иглә Һејдәр әзни пегәте! Китоби дыминә нәшрәдә Һәзи һәхәдә мәлумот мандәни. Иглә ҹумлә һесте: “Әмә һич јодо бенибәкамон Һәзи Әсланови!”. Вәссәлом!

            Шык быбу бә Хыдо ки, бы незони Бајбакови гыләј авлод рози бе ки, бәһваты бәмә чә китоби гыләј иминә нәшри. Бунән, чич нывыштедә Бајбаков Һәзи һәхәдә:

            Ҹанги вахти Сталини сохтыше һар гылә мыттәфиғә республикәдә Мыдофиә Хәлғи комиссариат, јәне Мыдофиә вәзарәт. Чә республикон Мәркәзи Комитон иминә котибон автоматик тәјин бин чәвон Мыдофиә назир. Интаси Сталини Озорбојҹонәдә мәлун Мир Ҹәфәр Бағыровыш тәјин ныкарде Мыдофиә назир. Чумчыко Сталин норозибе Бағыровику. Бәј хәбә рәсәбе ки, Бокујәдә чандә гылә мивә-һавзә дуконон ко кардедән бо Бағырови. Әве әј сәдош карде Беријә, асбардыше бәј ки, әв мыфәттиш бывғанды бә Боку, быдә осә быкән Бағырови коон. Һәмән асбардыше бәј ки, быдә мыфәттиш шанго ныһыты Бокујәдә, де електрики ғатәри һа руж шанго бо бә Дәрбәнд, маштәнәј ижән бышу бә Боку.

            Бә Бағырови рымуз рәсенҹән, әв дәманде бо мыфәттиши бо компрамат сохте. Ружи шанго мыфәттиш бә Дәрбәнд шеәдә, артист Лејла Бәдирбәјлишон гуҹили-гуҹили дәфырсыније бә мыфәттиши купе, әлбәһол кәшәшоне чәвон шикил, Бағырови вығандыше әв бә Москвә”.

            Чымы хосә хәлғ! Ијо нимәдә һаштедәм Бағырови кәләкон һәхәдә ыштә гәпи. Боәмә мәрағин әв ни, Һәзије!

            Бунәмон, Бајбаков чич нывыштедә бы һәхәдә. Әв нывыштедә:

            Бағыров чок сәрәседәбе ки, Озорбојҹони Мыдофиә назир тәјин быә Һәзи Әсланов автоматик чы Мәркәзи Комитә иминә котиб бәбе, јәне Озорбојҹони јол бәбе! Әве Бағырови тәшкилыш карде суи-ғәсд бо Һәзи, доше әв кыште!

            Һа, чымы азизгирамијон! Есә зынәоне, ки кыштәше Һәзи Әсланов? Есә зынәоне ки, бочи Һејдәри доәше суте Бајбакови китоб? Есә әмә зынедәмон ки, бочишон кыштә Һәзи ијән ки кыштәше әв! Хыдо ләнәт быкә бә Һәзи ғәттолон!

            Хыдо ләнәт быкә бәчәмә хәлғи дышменон!

            Хыдо озод быкә чәмә хәлғи!

            Быжијы чәмә хосә хәлғ!

            Быжијы сәбәсожә Толышстон!

            Быжијы Толышстони Милли телевизијә!

 

Толышпресс ТВ: КИ КЫШТӘШЕ ҺӘЗИ ӘСЛАНОВ ?

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|