ЧЫМЫ JОДЭДЭ МАНДЭJОН -33

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 67 голосов)
Изменить размер шрифта Decrease font Enlarge font
image

 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

33

 

            Де минволи, 2003-2005-нә соронәдә ды кәрә Иронәдә бим, и кәрән Ермәнистонәдә. Русијәдә быә вәзјәтым пијо һартәрәфә тәсвир кардәбе бошмә. Чәмә вәзјәт анән чок ныбе. Русијә һукмәт хос-хосинә ко кардејдәбе де Боку. Ирони һукмәтику һич хәбә беныше.  Бәчымы јод омәј вотәјнә, гыләј мәсәлә нывыштејдәм ијо: 2003-нә сори аз Иронәдә беәдә, гыләј жыго гәп бе де Ирони һукмәти одәмон. Чәвон гыләјни вотыше ки, “чәмә дашти коон вәзир бы незони Авропәдә молағатыш кардә де Илһам Әлијеви. Әј вотәше бәчәмә назири ки, “чымы пыә пијәмердбе, һукмәтијән де канә ғајдон идорә кардејдәбе. Шымә комәг быбән бәмы, аз президент быбум. Аз ҹывонә зоәм, де тожә ғајдон идорә бәкардем довләти. Президент быбом, лап чок бәбен чәмә де Ирони мыносибәтон”. Әве әмә комәг бәкардемон бә Илһами”. Бәј вотыме ки, “бә вахти чәј пыән жәго вотејдәбе бәшмә. Шымә һукмәтијән ыштә дасто омәјыш карде ки, Һејдәр президент быбу. Пешы чич бе? Һејдәри бә бызи ғыјмәт һәватыше Ирон бә Әмерикә! Есән шымә јолон сутејдән, әмма дастошон һичи омејдәни! Ыштә јодәдә огәтән: Илһам ыштә пыәсән бевәҹ бәбе! Чәј пыә шымәныш бә даст дәној, зоәшән бә даст дәбәно, пешы ди бәбе!

            Бәштә синә жәј фикәдә ним, әмма Ирони һукмәти кардә коон жыгобин! Илһам президент бе, әмма әлбәһол дышменыш елон карде Ирон! Һәлбәттә, ым чәвон ыштән које.  Әмма ыми бывотым ки, бо 2005-нә сори Ирони һукмәти тәрәфо һичи чәш нәзнимон карде!  Манде Ермәнистон, чәјкујән һичи чәш нәзнимон карде. Чәј сәбәбым пијо нывыштәбе:   Хәрәбоғи һәхәдә чымы вотәјон вәс кардышоне ки, ермәнијон чәшәмур быдән бәмә!

            Чич кардәнинбимон? Әзнимон карде, бымандәмон Русијәдә, кали коон быкәмон, ружномә бекәмон. Интаси быми аз әвотим “ыштә вырәдә зәвәријон кардеј!” Әмма бәмә зәвәријон кардеј дамејдәныбе, әмә бә нав шәнинбимон! Чыми иглә ро әве ки, есә бәпе әмә быбәмон дештә хәлғи иҹо, чәј дыләдә быбәмон, ко быкәмон дештә хәлғи! Ҹо чорәмон ни, бәпе ыштә хәлғи һозы быкәмон бо ә ружи ки, дәгиш бәбе дынјоәдә геосијоси вәзјәт, бәвәдә бәкамон ҹо коон!

            Јеревано огардә ружику һежо бә мәшвәрәтбимон. Ижән ружоным (рости, шәвоным) дәвардејдәбин ғатәронәдә.

            Мылхәс, мәсәлә жыгобе. Аз вотыме ки, есә әмә әнҹәх иглә ко кардәнинимон. Ијо чымы манде мәнош ни. Бә Боку бышом, чок бәбе!

            Мәлуме ки, чәмә һәмрон һәммәј әлбәһол вотејдәбин ки, “бә Боку бышош, бәгәтен тыни!

            Чымы ҹәвоб игләбе: “Азән зынејдәм ки, бәгәтен мыни. Әмма дыглә мәсәлә бә нәзәр быстәнән бы коәдә: Позәдә парламенти сәчынон дәбәварден Озорбојҹонәдә. Чымы зынәјку, Ғәрби довләтон тәзјығ кардејдән бә Илһами ки, парламенти ја һәммәј быдән бә мыхолифәти јаанки һич ныбо хәјли мыхолифәткори дәнән бә парламент. Чыми гыләј нышонә әве ки, Ғәрби чандә нымојәндә омә емә бә Боку. Жыго гыләј шәроитәдә мыни гәтеј сәрф әкәни бо һукмәти, чумчыко әвон деми гыләјән зијодә вонә бәдон бә Ғәрби даст. Не, лап быгәтонән, бәвәдә веј онибәгәтен мыни зиндонәдә. Һәмән бочи бәгәтенхо мыни? Аз һич вахти ғануным дарыштәни. Бәвотен бә Ермәнистон шәш? Һа быдә бывотын! Бә Ермәнистон шеј кејнәку ҹинојәт һисоб бејдә? Әве, һич нороһат мәбән. Быдә аз бышум! Ыштәнән бәпе есә бышум, пешы һич вахти әзыним ше!

            Әзыним воте ки, чәмә һәмрон әлбәһол ғәбул кардејдәбин чымы дәлилон. Сыхан ни, рози бејдәбин дејәвон, әмма ижән нороһат бејдәбин бомы!

            Де минволи мәшвәрәтонымон карде детобә ијулә манги. Де тәһәри розим еғанде зынәј чәмә һәмрон. Охонә кәрә Москвәдә гырдә быәбимон. Ғәрорымон ки ғәбул карде, вотем, һа, билети лозиме һыријеј. Ијоән ишкил һестбе. Аз чандә сорон Русијәдә нәвејдәбим де канә сәвети паспорти. Пешы әғылон бомы сәшонбе Озорбојҹони хариҹи паспорт. Интаси дә паспорти нәби ше бә Озорбојҹон. Чумчыко әјо јәғын зынејдәбин ки, аз шәним бә Боку ки, паспорт быстәным. Гирәм дә паспорти шәбәјм, һежо аеропортәдә әгәтин мыни, әвотин ки, ғәлпә сәнәде бәтыку. Быми һәни һич гылә Авропән комәг нәзни карде! Әве дырниме ә паспорт, шодоме. Зангым карде бә Колпино, вотыме бәштә һәмро ки, бышу бә Озорбојҹони консуләти, гыләј әрајиш быстәны бомы. Жәгоән кардыше.

            Һәшјә. Бокујәдә аеропортәдә һежо жәгоән бе. Паспортышон сәј чымыку. Тәғрибән 40 дәғиғә чәшымон карде. Сәдошон карде мы. Кинә парсәј чымыку: “Шымә ҹо сәнәдон ни?” Вотем, “ым әрајиш Озорбојҹони консуләти доәше бәмы. Шымә вотејдәшон, јәне әв сәнәд ни?” “Не, не, һәлбәттә, сәнәде! Интаси чәмә зынәј әве ки, шымә ҹо сәнәдонән быәнинбе!” Вотем, “шымә зынәјон аз зынејдәним. Чымы зынәј ыме ки, ым әрајиш һесте чымы дастәдә, әвән ғануни гыләј сәнәде, имкон дојдә ки, аз сәрбәст бом бә Озорбојҹон, боштә паспорт быстәным ијо!” Манде ерәхәј бәмы, һәни һичиш нывоте. Иглә ымыш воте ки, “камишијән сәбр быкән, есә дәро бәкамон шымәни”. Тикәјән ныштимон, сәнәдышон дој бәмы, бешимон чәјо.

            Гыләјән мәсәлә. Пешы де һукмәти одәмон гәп жәјәдә, әвонән сыханышон варде паспорти сәпе. Веј чыјо-чәјо гәпонышон жәј ки, “охо шымә хариҹи паспортон һестбе, ки сәшбе бошмә ә паспорт, чуне ше әв?” Вотем, “һестымбе Озорбојҹони хариҹи паспорт. Әмма һички сәшныбе бомы. Се ружнә омәјм бә Боку, 300 долларым рышвә дој, тәҹили дошоне бәмы паспорт”. Вотен, “бәс марзи чокнә дәвардиш, охо һич гылә ғејд ни әјо ышты бә Боку оме һәхәдә!” Вотем, “бымиро сәғби бывотән бәштә һумәти! Жыго гыләј системыш сохтә ки, һар кәс де рышвә дәварде бәзне марзи. Деғыстонәдә чәмә дустон гәпышон жәј, дәвонишоне мы марзо!” Сәшон евә жәј, һәни һичишон нывоте. Иглә ымышон хәбә сәј ки, “бәс кыве ә паспорт?” Вотем, “Колпиноәдә гыләј ру һесте. Мандәбим осынә парди сәпе, дијә кардејдәбим бә руј. Паспорт чымы шәј синә ҹифәдәбе. Егыније бә ов”. Бығәсырәшон карде, һәни һичишон нывоте.

            Жыгонә, ијулә манги 13-дә гырдә бимон Москвәдә. Чымы ым сәфә һәнијән веј гонбе бо әғылон бәсә Еревани сәфәсә! Сыхани һәғиғи мәноәдә вај-шивәнбе! Де һәзо әзоб-әзјәти ашишым карде әвон, вотем, һички ныво бә аеропорт. Елшәни вардыше мы бә Домодедово аеропорт. Ыштәни де зубәзу огәтејдәбе. Дамә кардәбәј, әбәми! Һежо дылванди дојдәбим бәј. Бә коврә бәрәсе, ыштә иминә һиҹрәтику 10 сор 18 ружи бәпештә аз ижән пәрәјм бә Боку! Хыјзон һәлә ки манде Колпиноәдә!

            Ијо мәҹбурим, ижән огардым чәмә ғәрори сәпе. Бәлкәмән детобә ымружнә ружи кали одәмон, – һәм чәмә толышон, һәмән чәмә ҹо-ҹо мәмләкәтонәдә жијә дустон, - мызокирә кардејдән чымы бә Боку ше һәхәдә ғәрори. Чандә сыханоным мәсә, есән мәсејдәм, һарки ҹури гәп жәјдә, изоһ кардејдә ыми, ғыјмәт дојдә быми. Чәвон һич гыләјни һәхәдә ијо гәп жәј фикәдә ним. Иглә ыми бывотым ки, тарыхи исботыш карде ки, ростә ғәрорымон ғәбул кардәбе бәвәдә! Детобә бә ружи, һәмән чәј бәпештән чәмә ғәророн рост бе сәбәб иглә ыме ки, һарчимон кардә де мәслоһати! Сәғ быбун чәмә ағылмандә мердон ки, имконышон доәни бәмы сәһв быкәм! Ијо веј чијон бәзнем нывыште чәвон һар гыләјни һәхәдә. Интаси һич вахти тарифым кардәни әвон, есән кардејдәним! Умдәвом ки, Хыдо ғысмәт бәкарде бәчәмә хәлғи жәго гыләј имкони ки, толышон ыштән вәомәдә ғыјмәт бәдон бә һар кәси әмәли ијән чәј ғыјмәти! Ијо иглә ыми бывотым ки, Хыдо бәрһәхе чәмә сәјсә, иглә Әв чок зынејдә дылон сыри! Азән һежо дәвитәм бә Хыдо, ымружән дәвитејдәм Бәј! Ки чич вотејдә, бывоты, чы ғыјмәт дојдә бәчымы ғандә гәмон, быдә, ым чә одәмон ыштә виҹдони ијән имони које! Әм ым һәғиғәте ки, аз ыштә кардә коон иглә бә Хыдо ном кардејдәм, Бәчәј офәјә толышә хәлғи хото кардејдәм!
           
Хыдо комәг быбу бәмынән, бәчәмә хәлғијән!
            Амин!

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|