КАГИ ЭВЭЗИ СОВЭ КИЖЭ

КАГИ ӘВӘЗИ СОВӘ КИЖӘ

Бәһмән Салеһ

            Ҹынбәдуши пегәтыше ғәләм-коғәз, нывыштыше шикат-мәлумот бә пе. “Һај, һәрај, бырәсән! Фермә мудир Мыфтәбәһә де кәлхози сәдри – Чәшдәхыли и быән дејәнды, һардәшоне ым фермә кагон, боәнән!”

            Ҹынбәдуши ки мәктуб рәсәј бә рәјони јолон, әвонән бә ҹуш омәјн: һардә вырәј, һајди, бошамон! Рәјкоми, рәјисполкоми, прокурори, милисә нәчәнники, рәјони сәр  һәкими, чан кәс нымојәндә, дастәј милис, һәни ки, ки… егынин бәдијәнды, сәгынин бә кәлхози идорә, фермә ыштәни. Виндышоне ки, фермәдә бәпе бәбәј ды һәзо каг-кижә, сәломәт мандә пенҹса каг, анән кижә. “Һај ибәды һардәшоне, Ҹынбәдуши рост нывыштәше”. Әмма гыләј әкт һесте арәдә: әнә каг мардә овәләку, әнә каг шәғоли бардәше, әнә кижә рујәдә тәсә… Бәчәвон марде-тәләфбе әкти кәлхозику тожә рәјони һәмә молә һәкимон имзо кардәшоне, мыһи екујәшоне. “Әһсән!” вотышоне бә Мыфтәбәһә, бә Чәшдәхыли.

            Сәдр Чәшдәхыли пеғандыше чәш бә фермә мудири Мыфтәбәһә ки, бәчәвон һар кәси быдә да гылә каг, шодә бәчәвон машини бағәж, быдә рози бымандын чәмәку азизә меһмонон! Каги әвәзи совә кижә быһыр бынә чәј вырәдә! Һәлә бунум Ҹынбәдуш һәни чич нывыштејдә? Быдә бынывышты!