БОЗ ИJЭН ЛУР - Толышпресс ТВ

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 30 голосов)
Изменить размер шрифта Decrease font Enlarge font
image
 
 

БОЗ ИЈӘН ЛУР

ТМВ_16_09-2016

            Чымы хосә быјон ијән һовон!

            Јәғын зынедәм ки, бәшмә чочин боме чымы ымружнә гәпи сәрловһә. Кали толышон һукман бәпарсен: Һич хыјнә вырәје? Мәһол бәјәнды гынијә, чәмә Милли телевизијән гәп жәјдә боәмә бози ијән лури һәхәдә! Хәј быбу?!

            Һа чымы азизон! Һовсәлә быкән, окәм бошмә чы мәсәлә молјәти! Сыфтә-сыфтә бывотым, чиче боз, чиче лур? Зынә толышон зынедән, нызнәкәсонән быдә бызнын: Боз – пәрәндәје. Гәдә пәрәндән быбо, һыкмыш гоне! Чәј ко-сәнәт ыштәсә гәдәли, һәмән һаканә ыштәсән јолә пәрәндон гәтеје. Јәне, бози һард ҹо пәрәндонин. Чәшоныж тиж, гушоныш тингин! Бәчәј фәросатијән һички сыханыш әзыни бе!

            Де бози әлоғодор гыләјән мәсәлә бывотым бәшмә: Веј-веј ғәдимијонку жыго, чәмә кали толышон нечишон кардә де бози! Чандә толышон пероснијәшоне боз, тәлимышон доә бәј, чәјоән дечәј комәги гәтәшоне ҹо пәрәндон. Һәмән чы дынјо чандә мәһолоно одәмон омән, һыријәшоне жәго нечијәвонә бозон, бардәшоне бәштә мәмләкәтон. Жыгонә, толышон һәмән бә бози һисоб номышон бекардә чандә мәмләкәтонәдә!

            Есән ыми бывотым ки, бочи ымруж бәчәмә јод омәј боз. Һәлә ки иглә ыми бывотым ки, боз гыләј озодә пәрәндәје. Чәј жимони мәно осмонәдә пәреје. Гирәм бози дәнош бә ғәфәс, әв жије әзыни бы ғәфәсәдә, дылыш бәтәке!

            Ијо огәтәмон бози һәхәдә ыштә гәпи, бунәмон, лур чиче. Бә лури чәмә толышон кујәлур+ән вотедән. Заһирән бәнә мори гыләј һәјвоне, интаси зәһәш ни, тыкнедәни одәми! Чәј ко-сәнәтән лузәфырс кардеје! Шәв-руж шыкыриједә даштонәдә, банды-кујәдә, һарды-һәш нәведә боштә.

            Бәс бәчәмә гәпи чы аидијотышон һесте чы һәјвонон? Һа бәшмә фәросати һејран быбу шымә Лејла һовә! Чымы мәғсәд ыме ки, ијо изоһ быкәм бошмә чәмә кали толышон де ым һәјвонон. Әлбәһол ыми бывотым ки, одәми де һәјвони мығојисә карде һич гыно ни.  Чумчыко һар гылә инсон мандедә бә гыләј һәјвони. Әмә һәммәј ҹонинә мәхлоғимон, фәрғымонән бымәдәј ки, одәми ағылыш һесте, һәјвони нише! Һәмән ыми бә нәзәр быстәнән ки, чымы мәғсәд әв ни ки, бәкисә боз, бә ҹо гыләј одәми лур бывотым!

            Һәлбәттә не! Чымы мәғсәд чә һәјвонон ијән одәмон әмәлон, һәрәкәтон, жимони тәрзи, хосјәти мығојисә кардеје. Чыми сәбәбијән есә һовә бәвоте бәшмә.

            Ыштә навконә бәрномон гыләјәдә гәпым жәбе бошмә одәмон де кали һәјвонон арәдә быә охшәрәти һәхәдә. Есә тикәјән бә нығыли ше фикәдәм.

            Һа чымы азизона! Чандә вахте чәшәвәно кардедәм бәчәмә толышә хәлғи жимони, гәтегыри, нышт-әшти, бә кали толышон кардә коон, чок-чоки виндедәм ки, чәвон кали гылон бәнә бә бози озодин, тижһушин, фәросатинин, әвонән бәнә бози пемужијән бә пәре!  Жәго толыши һички дәној әзыни бә ғәфәс! Һәтто дәноән, жәго толыш бәчыпне ғәфәси, бебәше бә озоди. Гирәм арыштејән нызно, ыштәни шәһид бәка ки, озод быбу! Һәмән жәго толышон иглә нин, да гылә нин, һәзо-һәзон! Мәһз жәго озодә толышон бы чандә соронин бә дастпочән ки, чәмә хосә хәлғ һәммәј жәго һәвур-һәвур быкә бә озоди, ғәфәсәдә нынышты, табе ныбу бә зылми! Әвон һәммәј озодә толышин! Лап бәнә бә бози!

            Әмма де һәјфи ки, һәмә толышон һәхәдә әзынимон воте ым сыханон. Бомы чанә гонән быбо, бә гиј гәтедәм ки, чымы чәшәвәно кардә толышон дыләдә озодәти чиче нызнәкәсон, бә лузәфырс карде пемужијә одәмонән һестин. Лап бәнә бә лури!

            Жыго одәми жимони мәно һежо лузәфырс кардеје. Жәләвон ыштә жимони мәно бә тырки табе бејәдә, боәј нокәти кардејәдә, чәј жипо лузәфырс кардејәдә виндејдә! Бә жәләвонә толыши һич ағылән омедәни ки, чәмә хәлғи вејни бәнә бози озод бејыш пиједә, пәреш пиједә, ғәфәсыш пиједәни, озодиш пиједә! Әве жәго толыш виндеәдә ја мәсеәдә ки, ҹо толышон бә дастпочән ки, озод быкән чәмә хәлғи, дыләғыппә гәтедә әвони, чәвон дыл кам мандедә бытыпы! Әве әв һежо ҹанг кардедә бә озодә толыши вәјнә, пиједәшни ки, хәлғ озод быбу! Јодәдәонбу, чәмә шаири нывыштәшбе ки, “озоди танге бо нокә!

            Есән боән, бунәмон, чокнә әвон пәл жәјдән бәчәмә хәлғи озоди ҹанги? Бы бәрномә чарчивәдә чәвон ды дастә һәхәдә гәп бәжем бошмә.

            Иминә дастәдә быә кали толышон шәв-руж вотедән бәчәмә толышон ки, “сә бе толыши мәсәлә! Быдә толышон һәммәј бышун дештә коон мышғол быбун!

            Чиче жәләвонон мәғсәд? Һәлбәттә, бә бози мандә һар гылә фәросатинә толыш чок сәрәседә ки, чәвон мәғсәд хәлғи кәш-пори арыште, әј руфо ғандеје!

            Ымијән бывотым ки, бы дастәдә быә толышон вејни рәијәт ни, сәводинә одәмонин. Кәноо дијә кардә толышон жыго зынедән ки, әвон сәводинә гәпон жәјдән. Һәмән чәвон вејни дим, жыго бызын, шәјтони лыштәше! Ыштәни бәнә һури-мәләки нишо дојдән бә әвомә хәлғи!

            Дыминә дастәдә быә кали толышон бәнә бәвон сәводин нин, тәһсилин нин! Чәвон вејни максимум мијонә тәһсилыш һесте. Әмма “лурәти”, “нокәти”, “ғуләти” анә ғојм-ғојми ныштә бә жәләвонә толышон дыли ки, әвон бәштә ағылән зынедәнин варде ки, одәм озод бәзне бе! Жәләвон ыштәни пусты-лу кардедә Озорбојҹони ијән тыркон роәдә, һежо пиједәше ки, толыш нокә быбу бәвон, бәнә кујә лури һежо лузәфырс быкә, сәпо нәшты, һежо дығат быбу тырки навәдә! Һәмән дәһшәт бымәдәј ки, жәләвонон и тикә нуни пули ғәзәнҹ зынедәнин карде ыштә Вәтәнәдә, әвони һич фәһлән пегәтәкәс ни әјо, әве дидәргин егынијән Вәтәно, дәвилә быән бә хариҹи мәмләкәтон! Әмма ижән ыштәни кыштедән бо Озорбојҹони тыркон!

            Есән бунәмон, чич вотедән әвон? Гыләј мисал бәвам бошмә, ыштән сәбәрәсешон! Бы ружонәдә жәләвонә кујә лурон гыләјни жыго нывыштәше сосиал шәбәконәдә: “Чәмә толышә лидерон вотедән ки, Озорбојҹон һукман выло бәбе. Интаси аз товыстонәдә шәбим бә ди, ды манг мандим әјо, әмма чәј һич бујән омедәныбе! 

            Мәвужи , шымә сәрәсәјшон ки, жәләвони иминә мәғсәд толышә хәлғи лидерон, чәј навәдә шә мердон хәлғи чәшо еғандеје! Чумчыко жәләвон һәтто дештә кәжәлә мазгијән дәрәседә ки, хәлғи озоди ҹанго ерәд еғандеро, иминә нубәдә лозиме әј бејол огәте! Хәлғ ки бызно, мәвотбән, чәј лидерон бесәводин, вәрсәғе вотедән, әвон һәвәси бәгынен, һәни ҹанг әкәнин ыштә озоди роәдә!

            Чымы азизон! Бы вырәдә ымијән бывотым ки, чәмә паснә дујәвул рәјрә чәш бекардедә! Пәшимон бедәмон ки, гыләј тәтимә тәнғыд быкәмон гыләј жәләвонә нопокә толыши, бәнә сыпә шылхи егынедән чәмә сәпе ки, һичмәсә әмә “тәһғир кардедәмон әвони”! Һәлбәттә, вејнә толышон, чәмә хәлғи бозә мердон чок сәрәседән ки, тәһғир карде зәифәти әломәте, әмәнән зәиф нимон! Әмә һички тәһғир кардедәнимон! Интаси чәмә нывыштә ијән вотә сыхан анә һәғиғәт бедә ки, жәго лурә толыш әлбәһол бәштә пегәтедә ә сыхани! Ымән чәмә гыно ни! Чәвон гыноје ки, пемужијән бо лузәфырс карде!

            Есән боәмон һәмон нәзәри нывыштә одәмисә. Һәлбәттә, әмә чок зынедәмон ки, есә чәмә вотә сыханонән әв ијән чәј шылх тәһғир бәзне боштә! Интаси әмә һәғиғәти ашығимон! Әмә әзынимон карде ки, һәғиғәти нывотәмон бәштә хәлғи!

            Әве әмә жыго вотедәмон бә жәләвонә толыши: Баләма, ышты сәнәт курәбанд, јәне канализасијә тәмиз кардеје! Әве, ты нәҹиси буј чок зынедәш! Охо ты геосијоси просесон буј әзыниш! Ты дештә кәжәлә мазги чокнә бәзнеш ки, Озорбојҹони выло бе бу омедә ја не?! Һәлбәттә әзыниш!

            Әве әмә ижән вотедәмон бә жәләвонә лурон: Ыштә сәј евә быжәнән, ыштә курәбанди тәмиз быкән! Ыштә сәј дәмәнән бәштә букә дәнышә һыл! Шык быбу бә Хыдо ки, чәмә анә сәводинә мердон ијән мојнонымон һестин ки, әвон чко зынедән ыштә вотә сыхани! Әвон чок зынедән ки, Озорбојҹон выло бәбе, чәмә толышә хәлғән иншаллаһ озод бәбе!

            Чәвон һәхәдә гыләјән мәсәлә бывотым бәшмә. Чәвон кали гылон бәнә мушрикон бә хәлғи нав бешедән мысылмони либосәдә, ыштәни момин нишо дојдән бә хәлғи ки, толышон бовә быкән бәвон!

            Һәни чич вотедән әвон? Әвон шәв-руж бәмә бә дымжонин ки, бочи әмә де ермәнијон дустәти кардедәмон, бочи Толыши телевизијә Ермәнистонәдәј?

            Есән боән дијәкәмон, чәвон ым сыхан һәхе ја ду-тәлбис?

            Һа чымы азизә хәлғ! Һар гылә шиә мысылмон зынедә ки, әв тәғлыд ныко бә мыҹтәһиди, ғәбул әбыни чәј ибодәт! Ымијән чок зынедәшон ки, дынјо шион јол Ајәтуллаһ Хаменеи Әғәје! Шион вејни тәғлыд кардедән Бәј! Тәлғыди мәноән ыме ки, Мәрҹеји-тәғлыд чичи мәслоһат зынедәбу, мандә шионән жәго кардәнинин!

            Чич вотедә бәмә Хаменеји Әғә? Әв һәмән Ирони довләти лидере! Гирәм әј мәслоһатыш зынәбәј, ыштә нышт-әшти де Озорбојҹони һукмәти әкәј. Әмма ымружнә ружәдә Ирони бы регионәдә ән јолә дуст Ермәнистоне! Јәне Хаменеји Әғә Ермәнистони дуст зынедә бо шион!

            Мадәм ки жыгоје, бәвәдә бочи бә момини либос дәшә жәләвонә лурә толышон боәмә гыно зынедән де ермәнијон дустәти? Бочи әвон бәштә јодән вардедәнин ки, Ирони Бокујәдә быә сәфарәти вәдә Хаменеји Әғә довилә сутәкәс һәмон ә Озорбојҹони һукмәт, һәмон ә тырконбин! Ермәнистонәдә һички жәго әмәли нибәка, кардәшәнни!

            Чыјо чы сәкыштә омедә бә мијон: Бызнән ки, жәләвонә толыш һич мысылмон ни, некники шиә! Жәләвони иглә номыш һесте: КОФИР!

            Есә, чәмә хосә хәлғ, шымә мәслоһат чиче бәмә: Әмә бә Хаменеји Әғә тәғлыд быкәмон ја бә жыго лурә кофири?!

            Жыго зынедәм, шымә чок сәрәседәшон чымы вотәјон. Әве ыштә сыхани охојәдә ыми орзу кардедәм бәчәмә хәлғи: Боз быбән, быпәрән, озод быбән, бә ғәфәс дәмәшән, чәмә хосә толышон! Лур мәбән мәфырсән, чәмә хосә толышон! Гуш мәдән бә жәго лурә кофирон вотә сыхани! Бә озоди ҹанг бешән һәммәјәво, быдә озод быбу чәмә хәлғ!

            Хыдо комәг быбу бәчәмә хәлғи!

Быжијы чәмә хосә толышә хәлғ!

            Быжијы сәбәсожә Толышстон!

Быжијы Толышстони Милли телевизијә!

 

Толышпресс ТВ : ТМВ_16_09_2016_Боз ијән лур

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|