ТОЛЫШИ ДОВЛЭТ РЕАЛ hЭFИFЭТЕ! -ТОЛЫШПРЕСС ТВ

Разделы

Архив

Пн Вт Ср Чт Пт Сб Вс
12345
6789101112
13141516171819
20212223242526
2728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 32 голосов)
Изменить размер шрифта Decrease font Enlarge font
image
 

ТОЛЫШИ ДОВЛӘТ РЕАЛ ҺӘҒИҒӘТЕ!

ТМВ_12_09_2016_

            Чымы азизә быјон ијән һовон!

            Дәвардә сәфә гәпым жәј бошмә Толыши Милли һәрәкоти ијән сәбәсожә Толышстони идејә бә мәјдон бешеку, кырт гыләј мыддәтәдә чәмә хәлғи сәфәрбәр бејку, һәмән тәғрибән вист сори дыләдә чәмә бә һан шә милли руфи ибердәмәдә пебе, бәчәмә ајәндә рушнә сәғанде һәхәдә.

            Чәмә хәлғи ајәндә чәмә сәбәсожә довләте, ыми есә һәмә толышон сәрәседән, бы һәхәдә гәп жәјдән, ијо дыминә сыхан әзыни бе!

            Чәмә хәлғи вәомә довләтмәдарәти чәмә милли тәфәккори гыләј елементи ғәзинә  һәни ғојм быә чәмә шуурәдә, чәмә иҹтимои-сијоси шуурәдә. Бовә быкән бәмы, чымы азизон, ым чы дынјо јолә довләтон сијоси мәронәдә шә гәпонсән веј воҹибә мәсәләје, чумчыко әмә бәпе ыштән һәлл быкәмон ыштә вәзифон! Јәне толышон ыштән! Әмә бә һәмә дынјо сыбут кардәнинимон ки, чәмә хәлғ лојиғе бә боштә довләти бе. Чанә әмә ымымон сыбут кардәни, чанә чәмә довләтмәдарәти идејә һәкк быәни бәчәмә ҹони ијән бәчәмә хуни, бочәмә ыштәни реал быәни, һич гылә семинә ғыввә, әј чанән быпијоше, комәг әзыни карде бәмә! Әве, ыштә јодәдә огәтән: бә семинә ғыввә дәвите лозим ни, чәјку комәг чәш карде лозим ни! Әмә ыштән сохтәнинимон ыштә ајәндә, ыштән ро окардәнинимон боштә сәбәсожәти, ыштән озод кардәнинимон ыштә хәлғи чы тыркон зылләтику!

            Чымы азизә толышон! Ком хәлғ ҹо ғыввон геосијоси һәнәкәдә кәрт быбо, әв һежо дәбәбохте, мәғлуб бәбе! Чыми ән чокә нымунә чәмә амјәзон кырдонин. Әвон чы дынјо јолә довләтон дастәдә һежо гулмәчә быән. Әмә чәвон рој әзынимон ше!  

            Бы вырәдә шымә парсе бәзнешон чымыку: “Бәс Косово?” Чокнә бе ки, региони бумијә хәлғ ныбә албанон сәшоне Сербијәку и јолә вәслә зәмин, сохтышоне әјо ыштә довләт?

            Сәбр быкән, ҹәвоб дојдәм бәшмә. Ыштә јодәдә огәтән ки, ә довләтышон сохтә нә бо албанон, нәәнки бәчәвон хото! Чы дынјо гәтымкорә довләтон, де Әмерикә Ибыә Штатон сәдә бе шәрти, сохтышоне ым довләт боштә хото. Әвон огордынишоне ым зәмин боштә ҹинојәткорә әмәлон, јәне бо наркотик һәвате ијән одәми дыләтони органон һәвате, һәмән бә Авропә ијән Незә Шәрғи террористә дастон авжор һәватејро!  Әве чы Косово албанон мәһз жыго гыләј довләтәдә жимон кардәнинин. Әмма аз һәлә Косово нојдәм бә кәно. Һич дијәро ше лозим ни. Бәгәм чәмә есә жијә Озорбојҹон жәго гыләј нахшә ныбе? Мәғсәдон ијо ҹо-ҹон, әмма молјәт ије! Ым гыләј бејнәлхәлғә ҹинојәте! Жәго довләт лозим ни бәмә! Әмә аләф нимон, зәмино бешәнимон! Әмә ғәдимә хәлғимон, ыштә зәмини бынәјнә хәлғимон, чәј сојбимон, Зағафғазијәдә чоминә јолә хәлғимон. Әмма ермәнијон, гырҹијон ијән озорбојҹони тырконку фәрғымон иглә бымәдәј ки, мәһрумимон ыштә довләтику! Һәлә әј вотејдәним ки, тырки зывонәдә гәп жәкәсон воһид гыләј хәлғ әбыни һисоб карде, әмма әвон Озорбојҹони титулә милләтин. Лап бывотәмон ки, шәрти мәноәдә әвон гыләј етносин. Әмма чыми чы дәхылыш һесте бәчәмә ыштә довләти бе ја ныбе?

            Есән ыштән ҹәвоб быдән бә жыго гыләј парси: Бочи дынјо зынедәни Хәрәбоғи јаанки Приднестровјә сәбәсожәти? Охо чә зәминон бумијә хәлғон сохтәшоне ә довләтон! Һәмән әвон бејнәлхәлғ һуғуғи әсосәдә сохтәшоне ыштә довләт. Чанәдәшонән ғырбон доә ыштә сәбәсожәти роәдә! Әвон де-факто һестин, әмма де-јуре әвони зынәкәс ни. Әмма бандитә довләт Косово зынәшоне чандә гылә довләти!

            Һежо ымән сыбут кардејдә ки, Озорбојҹони довләти ыштән песохтә гыләј чије, һәмән чәј умр вејән дыроз ни! Ым довләт чы дынјо империалистон гыләј песохтә нахшәје!

            Жәго довләт лозим ни бәмә! Бәмә лозим ни мывәғғәти гыләј тәсисот. Бәмә лозиме чәмә ғануни довләт, чәмә толышә довләт! Ә довләт ки, чә тарыхи әсосыш һесте, чумчыко әмә чы зәмини сојбимон! Әмә имконәдәнимон ки, шәри ғыввон ыштә аспибытожнын чәмә дәдә-бобо зәминонәдә! Әмә гыләј демократик довләт бәсохтемон ки, быдә региони һәмә хәлғонро нымунә быбу әв!   

            Бочи аз ымони вотедәм бәшмә? Охо иминә нәзәрәдә ымон ади чијонин, һәмәкәс һостон бәзне әвони винде, сәрәсе. Әмма чымы воте сәбәб ыме ки, чәмә кали толышон сәбәсожә Толышстони һәхәдә гәп жәјәдә, әлбәһол едјәседән бә Русијә, Ирони јаанки бә Әмерикә. Кали толышон вотедән ки, Русијә комәг бәка бәмә, ә гыләјнијон вотедән, Ирони комәг лозиме бәмә, и поән ыштә нәзәрон сәрутедән бә Әмерикә. Иглә сәводинә ијән фәросатинә толышон сәрәседән ки, һарчи банде бәчәмә ыштәни! Әмә гирәм ыштән быпијомоне, бәвәдә ә довләтон һәммәј комәгән бәкан бәмә. Ја ныпијәмоне, һич гылә комәги хәјыш әбыни бәмә! Чәмә зуј бывиндон, әвон ыштән пәјдо бәкан әмәни. Һич гылә довләт комәг әкәни бә һытә хәлғи, бә нәзәр быстәнән ыми! Һесте жыго гыләј Јолон сыхан: Ыштыку һәрәкәт, Хыдоку бәрәкәт!

            Бы незони Толышстони гыләј јолә шаир чәмә меһмонбе. Ныштәбе демы вәбәвә, чај пешомедәбе. Чәмә сипириш дәше бә дылә. Дәмандин бо чәмә хәлғи тале һәхәдә гәп жәј. Фәғырә меһмон пәшимон бе ки, Путини де Әлијеви молағатыш бә јод варде. Воте, ныбобәныбо, чәвон сәхтышон быбо дејәнды, урусон комәг әкәнин бәмә! Сипириш кам манде бытыпы бәчәј бы сыхани! Де зубәзу ашишым карде әв. Бәвәдә әј вотыше чымы пијо бәшмә вотә сыханон.

            Әве, чымы хосә толышон, ижән сәнибәтон вотедәм: Әмә бәчәмә тарыхи жыго гыләј лынгә ғәдәмымон ноә ки, бы лынгәдә чәмә ыштә сәбәсожә довләти сохте тәбии гыләј ғануни које! Һички әзыни чы просеси нави гәте. Һички әзыни әмәни огәте.

            Әмма чыми мәно ым ни ки, әмә бәпе дыроз быкәмон ыштә даст-почә, чәшкәмон ки, ҹо довләтон бон, довләт бысохтын боәмә! Ҹәми толышон рост быәнинин бә хәлғи озоди ҹанг. Бәвәдә әмә бәрәсемон бәштә мығәддәсә мәғсәди! Әмә ыштән дештә дасти сохтәнинимон ыштә довләти!

            Чәмә довләти бә мәјдон беше ыштә мәнтығыш һесте, шәртоныш һесте: Иминәни тарыхи аспекте, дыминәни етнодемографик аспекте, семинәни регионал аспекте, чоминәни геосијоси аспекте, пенҹминәнијән мәнәви аспекте. Ым аспектон һәммәј есә имкон дојдән ки, сәбәсожә Толышстон бо бә дынјо дим!

            Әве вотедәм ки, ыштә чәши зығи екарде, норынык карде вахтон дәвардин һәни! Вәсе һәни чајхононәдә әнг бимон дејәнды, ләкытымон жәј! Ко карде вахте! Сәбәсожә Толышстон геосијоси зәрурәте, тарыхи реал һәғиғәте, мәнәви ҹәһәто бәчәмә хәлғи Хыдо доә һәхе!

            Быжијы сәбәсожә Толышстон – чәмә мығәддәсә орзујон вәтән!

Быжијы чәмә хосә хәлғ!

            Быжијы Толышстони Милли телевизијә!

     
Толышпресс ТВ : ТМВ_12_09_2016_ТОЛЫШИ ДОВЛӘТ РЕАЛ ҺӘҒИҒӘТЕ!

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|