ЧЫМЫ JОДЭДЭ МАНДЭJОН -23

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 23 голосов)
Изменить размер шрифта Decrease font Enlarge font
image

 
 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

23

 

            Де Намиги сыханымон жыго бе ки, әв сәрбәст бәбе ыштә коонәдә. Ым и. Дәнибәше бә сијоси коон, Фондијән ангыл нибәка бә сијосәти. Әј ыштәнән жыгош пијејдәбе, чәмәнән фикир һежо жәгобе. Ым ды. Һар гылә кој иҹо но-пегәт бәкамон ки, ғырорымон сәһв ныбу. Ым се. Ҹо толышонән ыштә зувышкә комәги бәкан ки, Фонд ко быкә, һежо иглә номыш ныбу! Ым чо. Гыләјән шәртымон бе. Вотыме бәј ки, быпијоше, лап де Озорбојҹони Русијәдә быә сохтемононән нышт-әшт бәзне карде! Ым пенҹ. Охојәдә иглә јолә шәртымонән бе: Чәј кардә ко бәчәмә хәлғи умуми кој вәјнә әзыни бе! Јәне иглә бәчәмә хәлғи хәјонәт ныкә бәпе, нәһваты чәмә хәлғи бә тыркон! Гыләјән мәсәләм воте бәвәдә бә Намиги. Вотем, чымы Билә, које-шајәт гирәм фикир быкош ки, мәшһур бәбеш бы коәдә, чәјо Озорбојҹони һукмәт гыләј вәзифә бәдо бәты Бокујәдә, сәһв бәкаш! Һич гылә вәзифә доәкәс әбыни бәты! Һежо бәпијошоне ки, истифодә быкән ыштыку боштә мәғсәди, пешоыән шобәдон бә кәно! Озорбојҹонәдә вәзифә һәтто бәштә незә оләмонән де пули дојдән. Вәзифә быпијо, ыштә пули быдә бәвон, быши бынышт, ко быкә! Рози бимон, кәсимотымон карде!

            Аллаһ, Мәһәммәд, ја Әли! Намиг дәманде бә ко. Лап гыләј кыртә вахти дыләдә Фонди “сәдо беше”! Русијәдә ијән Озорбојҹонәдә. Намиг мәшһур бе һәм Русијәдә, һәмән Озорбојҹонәдә. Чуне дијә кардејдәбиш, Намиг бә кобе әјо! Хысусән озорбојҹоныжон Москвәдә быә кабелә телевизијә рә-рә дәвәт кардејдәбе әј, едаштејдәбе әј бәнә чәмә фонди Президенти ғәзинә. Әвән де һәвәси гәп жәјдәбе бы телевизијәдә Фонди кардә коон һәхәдә, чәмә хәлғи һәхәдә. Чәјоән Москвәдә бешә Озорбојҹони ружномонәдә рә-рә мысоһибон дојдәбе. Гыләј чокә кош әвбе ки, һич гылә кој бемәслоһат нәкәј! Мәсәлән, һар гылә мысоһибә дојәдә, һукман әј әвғанди бәмы, азән ыштә ғејдон әкәјм, чәјо чап әкәјн әј.  Ымијән хысуси ғејд быкәм ки, һич вахти ыштә нәзәри бә нав нәдәјм. Мәтнон әв ыштән әнывышти, ҹәвоб әдәј бә парсон, азән кали ғејдон әкәјм. Вәссәлом! 

            Жыгонә, Намиги хәјли кооныш карде. Де һәјфи ки, чәмә Милли һәрәкоти тарыхи кам-веј зынәкәсон чок бызнын бәпе ки, веј вахти чәмә ыштә толышон, гыләјни әвомәтику, гыләјни дәмәрәсәтику, гыләјни пәхыләтику, гыләјнијән ыштә бә гыләј одәми мыносибәтәдә шәхси симпатијә ја антипатијәку, дәмандејдә бә одәми нав кындулә шодој, бәчәј кој пәл жәј. Де Намигијән жыго бе. Ҹурбәҹурә толышон һар вырәо дәмандин бо лыбут печокније бәчәј кардә коон, бәчәј ыштә гәтегыри. Бә һар кәси чәј гыләј ҹәһәт хош омејдәныбе. Чанә жыго һәрәкәтон нави быгәтомонән, әвони бынычып мијоно пегәтеј имкони хариҹәдә быә које. Жыго одәмон кардә коон нәтиҹә әв бе ки, Намиг де фатхәши сусард бе ыштә којку. Һежо чыми нәтиҹон гыләјнијән әв бе ки, әв дәманде бо кали сәһвон вадој. Чыми сәпе боәмон Озорбојҹони Русијәдә быә кали тәшкилотон кардә тәсирон, мәнзәрә һартәрәфә бәштә чәши вә вардеј вејән чәтин ни.

            Пиједәме, Намиги һәхәдә бәштә сыхани ијоән сәкыштә быжәным. Чәј бә Фонди рәһбәрәти дәкәшәше детобә 2005-нә сори мајә манги 19. Һәмон ружи аз пәрәнинбим бә Јереван. Бәмышон воте ки, һежо һәмон шәви Намиг бешәнине бә Озорбојҹони Москвәдә быә кабел телевизијә. Ҹонинә ефирәдә әв ҹәвоб доәнинбе бә “тәмшокорон” парсон. Аз дәрәсәјм ки, ым гыләј тәләје бо Намиги. Бәј чымы Јеревани сәфә һәхәдә парс бәзнен дој (һукман әдәјн, чымы шәкым ныбе быми!), әвән јавә вәзјәтәдә бәманде, јаанки, һәнијән јавә, сәһв ҹәвоб бәдо. Әве вотыме бә һәмрон ки, тәҹили гыләј елон бынывыштән чәмә сајтәдә ки, “Н. Әзимов мырәххәс кардә быә Фонди президенти вәзифәо. Азәр Мәммәдов тәјин кардә быә бы вәзифә”.

            Аз пәрәјм шим. Пешы зынәме ки, жәгоән кардәшоне. Намиг шанго бешә бә телевизијә екран. Тыркә кинә парсә чәјку ки, “шымә ком кој сојби ғәзинә гәп бәжәнешон?” Әјән вотәше ки, “Толыши мәдәнијәти овҹи Фонди президенти” ғәзинә. Кинә әлбәһол вотәше ки, “охо шымә сајтәдә нывыштә быә ки, зинә шымәнышон мырәххәс кардә чә вәзифәо!” Намигән сырә, вотәше ки, “бәвәдә аз вәкили ғәзинә ҹәвоб бәдом бә парсон”.  Демијән Намиги бә Фонди рәһбәрәти сә бе. Сыхани рости, һич есәтән зынејдәним ки, Намиг зынејдә, бочи аз жыгом карде ја не? Ыштән парсәни чымыку, азән һичим вотәни.

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|